រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានបន្តអះអាងថា ដីការបស់តុលាការកម្ពុជា ស្តីពីការតាមចាប់ខ្លួនទណ្ឌិត សម រង្ស៉ី និងបក្ខពួកនោះ ត្រូវបានបញ្ជូនទៅដល់ប្រទេសជាសមាជិកអាស៊ានរួចអស់ហើយ ។ សម្តេចបានថ្លែងយ៉ាងដូច្នេះនៅក្នុងពិធីប្រគល់វិញ្ញាបនបត្រ និងសញ្ញាបត្រជូនសិស្សថ្នាក់វិជ្ជាជីវៈ គរុកោសល្យ និងនិស្សិតបញ្ចប់ថ្នាក់បរិញ្ញាបត្រ និងបរិញ្ញាបត្រជាន់ខ្ពស់នៃសាលាប៊ែលធី អន្តរជាតិ កាលពីព្រឹកថ្ងៃពុធនេះ។
ទាក់ទិនទៅនឹងសម្តីនាយករដ្ឋមន្ត្រីម៉ាឡេស៊ី លោក មហាធៀ ដែលបានបញ្ជាក់ប្រាប់សារព័ត៌មានកាលពីថ្មីៗនេះថា មិនទាន់ទទួលបានដីកាតុលាការពីកម្ពុជានោះ គឺប្រហែលជាបែបបទនីតិវិធីដែលនាំឲ្យមានភាពយឺតយ៉ាវមិនទាន់ទៅដល់ដៃរបស់លោក មហាធៀ ឬក៏ជាភាសាការទូតតែប៉ុណ្ណោះ ។ ទន្ទឹមនោះ សម្តេចក៏បានថ្លែងចំអកទៅទណ្ឌិត សម រង្ស៊ី និងបក្ខពួកថា កុំសង្ឃឹមខ្ពស់ពេក ។
សម្ដេច ហ៊ុន សែន បានថ្លែងថា អ្នកទាំងឡាយណាដែលហ៊ាន ឬបាននិងកំពុង ចូលរួមធ្វើយុទ្ធនាការ «ម្រាមដៃ៩» ជាមួយទណ្ឌិត សម រង្ស៉ី គឺជាការចូលរួមប្រព្រឹត្តទង្វើក្បត់ជាតិ ដែលប្រឈមនឹងទោសទណ្ឌមិនអាចលើកលែងបានឡើយ។
ទន្ទឹមនោះ សម្តេច ហ៊ុន សែន ថែមទាំងបានព្រមានដល់អ្នកដែលនៅក្នុងស្រុកទាំងអស់ កុំព្រហើន បើសិនជាហ៊ានចូលរួមធ្វើយុទ្ធនាការ « ម្រាមដៃ៩ » ជាមួយទណ្ឌិត សម រង្ស៊ី នោះ ក៏ត្រូវតែហ៊ានទទួលខុសត្រូវចំពោះមុខច្បាប់ដូចគ្នា ខណៈអ្នកចូលរួមកន្លងមក ក៏ត្រូវបានចាប់ខ្លួនជាបន្ដបន្ទាប់ផងដែរ ព្រោះថា សកម្មភាពរបស់ទណ្ឌិតក្បត់ជាតិ សម រង្ស៉ី ឈានចូលដល់ការធ្វើរដ្ឋប្រហារ ផ្ដួលរំលំរដ្ឋនិងប្តូររបប ដែលជាសកម្មភាពក្បត់ជាតិ មិនអាចលើកលែងបានឡើយ ៕
