អន្តរជាតិ ៖ កាលពីថ្ងៃអង្គារ គណបក្សប្រឆាំងថៃទាំង ៧ បានដាក់ញត្តិស្នើសុំឱ្យគណៈកម្មាធិការជាតិប្រឆាំងអំពើពុករលួយ (NACC) ឲ្យស៊ើបអង្កេតលើសម្បថមិនពេញលេញរបស់លោកនាយករដ្ឋមន្ត្រី ប្រាយុទ្ធ ចាន់អូចា កំឡុងពេលស្បថចូលកាន់តំណែង កាលពី ខែកក្កដាកន្លងទៅ។ នេះបើតាមការចេញផ្សាយដោយសារព័ត៌មាន Bangkok Post។
ប្រធានផ្នែកកិច្ចការច្បាប់របស់គណបក្សភឿថៃបានប្រាប់ប្រព័ន្ធផ្សព្វផ្សាយទោះបីមានសេចក្តីសំរេចរបស់តុលាការធម្មនុញ្ញក្នុងការច្រានចោលញត្តិពីមុនលើសម្បថមិនពេញលេញរបស់ឧត្តមសេនីយ៍ប្រាយុទ្ធក៏ដោយក៏គណបក្សប្រឆាំងនៅតែជឿជាក់ថានៅតែមានបណ្តាញជាច្រើនទៀតដែលត្រូវបន្តអនុវត្ត។
សកម្មភាពទាំងនេះរបស់ឧត្តមសេនីយ៍ប្រាយុទ្ធនិងរដ្ឋាភិបាលត្រូវបានគេចាត់ទុកថាជាការរំលោភទាំងរដ្ឋធម្មនុញ្ញ ដោយសារតែមិនបានសូត្រពាក្យសម្បថឱ្យអស់ ជាពិសេសគឺនៅត្រង់ឃ្លាគោរព និងអនុវត្តតាមរដ្ឋធម្មនុញ្ញនៃប្រទេស។
គួរបញ្ជាក់ថា កាលពីថ្ងៃទី១១ ខែកញ្ញាកន្លងទៅ តុលាការធម្មនុញ្ញថៃ បានទាត់ចោលពាក្យបណ្ដឹងរបស់ក្រុមបក្សប្រឆាំងម្ដងរួចមកហើយ ដោយះអះអាងថាខ្លួនមិនមានសមត្ថកិច្ចអ្វីក្នុងការធ្វើសេចក្ដីសម្រេច លើការពិធីស្បថចូលកាន់តំណែងនៅចំពោះមុខព្រះមហាក្សត្រនោះទេ។ មិនតែប៉ុណ្ណោះ លោក ប្រាយុទ្ធ ចាន់អូចា ផ្ទាល់ក៏បាននិយាយដែរថាលោកមិនបានធ្វើខុសអ្វីឡើយ ហើយក៏មិនខ្លាច ការស៊ើបអង្កេតដែរ៕
