ខេត្តកំពង់ធំ ៖ ឯកឧត្តម ជា អឿង អ្នកតំណាងរាស្ត្រមណ្ឌលកំពង់ធំ បានជួបសំណេះសំណាលជាមួយលោកគ្រូ អ្នកគ្រូ និង
សិស្សានុសិស្សដែលបានប្រឡងជាប់សញ្ញាបត្រមធ្យមសិក្សាទុតិយភូមិ (បាក់ឌុប) នៅវិទ្យាល័យក្រយា និង វិទ្យាល័យប្រាសាទបល្ល័ង្ក ក្នុងស្រុកប្រាសាទបល្ល័ង្ក ខេត្តកំពង់ធំ នៅថ្ងៃទី២១ ខែកញ្ញា ឆ្នាំ២០១៩ប្រមាណជាង១០០ នាក់ ។ ឯកឧត្តម ជា អឿង បានមានប្រសាសន៍លើកពីការសិក្សាពីជំនាន់មួយទៅជំនាន់មួយកាន់តែរីកចម្រើនធ្វើឲ្យធនធានមនុស្សកាន់តែមានចំណេះដឹងទូលំទូលាយ
មិនតែប៉ុណ្ណោះឯកឧត្តម ក៏បានលើកពីការសិក្សាកាលពីជំនាន់របបប្រល័យពូជសាសន៍ប៉ុល ពត ដែលធ្វើឲ្យកូនខ្មែរមិនអាចបំភ្លេចបានឡើយ កាលពីសម័យនោះធ្វើប្រជាពលរដ្ឋវេទនាផ្លូវកាយ ផ្លូវចិត្ត ជាពិសេសការទទួលយកចំណេះដឹងគឺពិបាកជាទីបំផុត។ដោយឡែកបច្ចុប្បន្ននេះមានផ្លូវ ថ្នល់ ស្ពាន វត្តអារាម សាលារៀនគ្រប់ទិសទី កូនចៅអាចទទួលយកចំណេះដឹងគ្រប់ទិសទីបានងាយស្រួល ។
ឯកឧត្តមបានបន្តទៀតថា សព្វថ្ងៃនេះវិស័យអប់រំ ជាចក្ខុវិស័យមួយដែលធ្វើឲ្យប្រទេសរីកចម្រើន ហើយផ្ដាំផ្ញើដល់សិស្សានុសិស្សត្រូវចងចាំជានិច្ចនូវពាក្យថា កូនល្អ សិស្សល្អ មិត្តល្អ និងប្រជាពលរដ្ឋល្អ ម្យ៉ាងទៀតក៏បានលើកឡើងចំពោះលោកគ្រូអ្នកគ្រូដែលសម្ដេចអគ្គមហាបតីតេជោ ហ៊ុន សែនធ្លាប់មានអនុសាសន៍ជារឿយៗកាលកន្លងមកថា ចូរលោកគ្រូអ្នកគ្រូត្រូវចងចាំលក្ខណះសម្បត្តិមានបីគឺ១.សមត្ថភាពអប់រំ ២.សមត្ថភាពស្រាវជ្រាវ ៣.គោរពសីលធម៌វិជ្ជាជីវៈជាគ្រូបង្រៀន។ជាបណ្ដាំផ្ញើចុងក្រោយឯកឧត្តម បានផ្ដាំផ្ញើដល់សិស្សានុសិស្សត្រូវខិតខំប្រឹងប្រែងរៀនសូត្របន្តទៀតដើម្បីទទួលបានលទ្ធផលប្រឡងជោគជ័យក្នុងការឈានជើងទៅចាប់យកសាកលវិទ្យាល័យល្អៗ ហើយមានការងារប្រាក់ខែខ្ពស់នៅថ្ងៃអនាគត ។ឯកឧត្តមបាននាំយកនូវសម្ភារៈសម្រាប់ចែកជូនលោកគ្រូ អ្នកគ្រូចំនួន៣៣នាក់ ក្នុង១នាក់ទទួលបានសារុង១ ថវិកា៥០.០០០ រៀល និងសិស្សប្រឡងជាប់សញ្ញាបត្រ១៣៥ នាក់ ក្នុង១នាក់ទទួលបាន និងថវិកា ៤០.០០០ រៀល ។
គួររំលឹកផងដែរសិស្សនៅក្នុងស្រុកប្រាសាទបល្ល័ង្ក មានបេក្ខជនដាក់ពាក្យប្រឡងចំនួន១៧៤ នាក់ ស្រី ៩៨ នាក់ បានប្រឡងជាប់ចំនួន១៣៥នាក់ ស្រី ៧៨ នាក់ ក្នុងនោះជាប់និទ្ទេស C = ១០ នាក់ ស្រី ២ នាក់ D = ២២ នាក់ ស្រី១១ នាក់និង E=១០៣ នាក់ ស្រី ៦៥ នាក់ ៕
ឯកឧត្តម ជា អឿង សំណេះសំណាលជាមួយ លោកគ្រូ អ្នកគ្រូ និងសិស្សានុសិស្ស ប្រឡងជាប់ សញ្ញាបត្រមធ្យមសិក្សា ក្នុងស្រុកប្រាសាទបល្ល័ង្ក
Filed in: ព័ត៌មានជាតិ
