រាជធានីភ្នំពេញ ៖ នៅថ្ងៃទី ១៩ ខែកញ្ញា ឆ្នាំ២០១៩ ប្រជាពលរដ្ឋចំនួន០១នាក់ ក្នុងចំណោម០២ដែលបានបាត់ខ្លួន កាលពីថ្ងៃទី១៥-១៦ ខែកញ្ញា ឆ្នាំ២០១៩ កន្លងទៅថ្មីៗនេះ ត្រូវបានអាជ្ញាធរនិងកងកម្លាំងឈរជើងនៅតំបន់ព្រំដែន នៃស្រុកសំឡូតបានស្វែងរកឃើញ០១នាក់ បញ្ជូនមកសង្គ្រោះនៅមន្ទីរពេទ្យបង្អែកខេត្តបាត់ដំបងហើយដោយសារបួសពេញខ្លួន ។ ជនរងគ្រោះ០១នាក់ដែលបានរកឃើញមានឈ្មោះ ឆាង កុយ ភេទប្រុស អាយុ២៥ ឆ្នាំ ។ ដោយឡែកម្នាក់ទៀតដែលនៅបាត់ខ្លួន ត្រូវជាប្អូនថ្លៃជនរងគ្រោះ ឆាង កុយ មានមានឈ្មោះ ផាន់ រី ភេទប្រុស អាយុ២០ឆ្នាំ ដែលកម្លាំងចម្រុះកំពុងតែបន្តការរុករកទៀតនៅឡើយ ។
សមត្ថកិច្ច បានឲ្យដឹងថា ក្រុមប្រជាពលរដ្ឋទាំងអស់ មានគ្នា៧នាក់ បានឡើងទៅលើភ្នំមួយកន្លែងស្ថិតក្នុងទឹកដីថៃ និងមានចម្ងាយប្រហែល២៥០០ម៉ែត្រ ពីខ្សែបន្ទាត់ព្រំដែនកម្ពុជា ភ្លាមៗនោះក៏មានភ្លៀងធ្លាក់ខ្លាំងបណ្តាលឲ្យមានទឹកហូរច្រោះដី នាំមកទាំងដើមឈើ និងផ្ទាំងថ្មធំៗរមៀលចុះមកក្រោម ទើបធ្វើឲ្យពួកគាត់សម្រេចចិត្តរត់គេចចេញ តែក្នុងនោះមានមនុស្ស២នាក់ក្នុងចំណោម៧នាក់បានរត់ឡើងទៅប៉ែកខាងលើ និង៥នាក់ទៀតបានរត់ចុះមកក្រោម ក្នុងចំនួន៥នាក់ ដែលរត់ចុះមកក្រោម មានរបួស១នាក់ពេញខ្លួននិងក្បាល គឺឈ្មោះ ទ្រិន សល់ នេះតែម្តង បន្ទាប់មកអាជ្ញាមូលដ្ឋានបានបញ្ជូនមកសង្គ្រោះនៅមន្ទីរពេទ្យបង្អែកខេត្តបាត់ដំបង ។ ដោយឡែកជនរងគ្រោះ២នាក់ទៀតដែលបានរត់គេចទៅប៉ែកខាងលើនោះបានបាត់ខ្លួន ទើបតែរកឃើញបានម្នាក់តែប៉ុណ្ណោះ ។
សូមបញ្ជាក់ដែរថាកាលពីថ្ងៃទី១៨ ខែកញ្ញា ឆ្នាំ២០១៩អ្នកភូមិបានប្រទះឃើញស្បែកជើង១គូនិងមួក១ រួមនិងពោះវៀននៅកន្លែងកើតហេតុស្ថិតនៅចំណុចពាមតា ភូមិអូរត្រែង ឃុំតាតោក ស្រុកសំឡូត ខេត្តបាត់ដំបង ជាប់ទល់ដែនកម្ពុជា-ថៃ ។ប្រពន្ធជនរងគ្រោះម្នាក់ក្នុងចំណោម២នាក់ដែលបាត់ខ្លួនអះអាងប្រាប់នគរបាលប៉ុស្ថិ៍រដ្ឋបាលឃុំតាតោកថាស្បែកជើងនិងមួកនោះពិតជារបស់ប្តីគាត់ប្រាកដ ។
នៅរសៀលថ្ងៃទី១៩ ខែកញ្ញា ឆ្នាំ២០១៩ សាខាកាកបាទក្រហមកម្ពុជា ខេត្តបាត់ដំបង ដឹកនាំដោយ ឯកឧត្តមបណ្ឌិត ប៊ុត គឹមស៊ាន ប្រធានគណៈកម្មាធិការសាខាកាកបាទក្រហមកម្ពុជាខេត្តបាត់ដំបង និងសហការី បានចុះសួរសុខទុក្ខ និងនាំយកអំណោយមនុស្សធម៌ផ្តល់ជូនលោក ទ្រីន សល់ អាយុ២៦ ឆ្នាំ ជាជនរងគ្រោះដោយសារដីបាក់សង្កត់ក្នុងពេលដែលកំពុងមានភ្លៀងធ្លាក់ខ្លាំងលើភ្នំ រស់នៅភូមិអូរត្រែង ឃុំតាតោក ស្រុកសំឡូត ខេត្តបាត់ដំបងពេលនេះកំពុងសម្រាកព្យាបាលនៅកមន្ទីរពេទ្យបង្អែកខេត្តបាត់ដំបង ដែលជាជនរងគ្រោះទី១ ត្រូវបាននាំមកជួយសង្គ្រោះនៅមន្ទីរពេទ្យបង្អែកខេត្តបាត់ដំបងដែរ ៕
