រាជធានីភ្នំពេញ ៖ កាលពីម្សិលមិញ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានបកស្រាយថា សម្ដេច បានផ្ញើសារទៅអភិបាលរាជធានី-ខេត្ត ដើម្បីណែនាំឲ្យសមត្ថកិច្ច ខិតខំ និងគ្រប់គ្រងសភាពការណ៍ សន្តិសុខសណ្ដាប់ធ្នាប់ សាធារណៈ ក្នុងពិធីបុណ្យកាន់បិណ្ឌនិងបុណ្យភ្ជុំបិណ្ឌ មិនមែនបញ្ជាឲ្យរារាំង ឬគៀបសង្កត់ប្រជាពលរដ្ឋណាម្នាក់ មិនឲ្យចូលរួម ប្រារព្ធពិធីបុណ្យឡើយ។
យោងតាមគេហទំព័រ ហ្វេសប៊ុករបស់ សម្ដចក្រឡាហោម ស ខេង បានសរសេរថា “កាលពីថ្ងៃទី១០ ខែកញ្ញា ឆ្នាំ២០១៩ ខ្ញុំព្រះករុណាខ្ញុំបានផ្ញើសារសំឡេង ទៅអភិបាលរាជធានីខេត្ត ណែនាំឲ្យខិតខំ និងគ្រប់គ្រងសភាពការណ៍ សន្តិសុខសណ្ដាប់ធ្នាប់សាធារណៈ ក្នុងឱកាសដែលប្រជាពលរដ្ឋ ទូទាំងប្រទេស កំពុងប្រារព្ធពិធីបុណ្យ កាន់បិណ្ឌ និងបុណ្យភ្ជុំបិណ្ឌ ដោយមិនបានបញ្ជាឲ្យរារាំង ឬគៀបសង្កត់ប្រជាពលរដ្ឋណាម្នាក់មិនឲ្យចូលរួមប្រារព្ធពិធីបុណ្យនេះឡើយ”។
សម្ដច បន្ដថា ក្នុងនាមជាអ្នកទទួលខុសត្រូវ សន្តិសុខសណ្ដាប់ធ្នាប់ សាធារណៈ សម្រាប់ប្រទេសជាតិ មានសិទ្ធិ និងកាតព្វកិច្ចតាមផ្លូវច្បាប់ ក្នុងការដាក់ចេញ បទបញ្ជាដើម្បីថែរក្សាសន្តិសុខ សណ្ដាប់ធ្នាប់ សាធារណៈសម្រាប់គ្រប់ព្រឹត្តិការណ៍ នានា។
ទន្ទឹមនឹងនេះ រដ្ឋមន្ដ្រីក្រសួងមហាផ្ទៃ ក៏មានសិទ្ធិចេញ បញ្ជាមន្ត្រីក្រោមឱវាទ ក្នុងការគ្រប់គ្រងសភាពការណ៍ ហើយសកម្មភាពទាំងឡាយណា ដែលប៉ុនប៉ងបំផ្លាញសុខសន្តិភាព ស្ថេរភាពនយោបាយ បំផុសឲ្យមានអំពើហិង្សា ចលនាបំបែកបំបាក់ផ្ទៃក្នុងជាតិ ឈានទៅផ្ដួលរំលំរាជរដ្ឋាភិបាល អាជ្ញាធរ សមត្ថកិច្ចគ្រប់លំដាប់ថ្នាក់ត្រូវមានវិធានការច្បាប់ យ៉ាងម៉ឺងម៉ាត់បំផុត។
សម្ដេច ស ខេង បានថ្លែងបែបនេះ ក្រោយពីមានបុគ្គលនិងសារព័ត៌មាន មួយចំនួនដែលមាននិន្នាការ ប្រឆាំងបានយកទៅធ្វើ អាជីវកម្ម បកប្រែបំភ្លើស និងមួលបង្កាច់ ក្នុងន័យថាសម្ដេច បានរារាំងឬគៀបសង្កត់ ប្រជាពលរដ្ឋ ក្នុងការធ្វើបុណ្យ ទៅតាមប្រពៃណី ព្រះពុទ្ធសាសនាទៅវិញ។ សម្តេចថា នេះជាចេតនាអាក្រក់ ដែល សម្ដេចមិនទទួល យកបានឡើយ ៕
