ខេត្តបាត់ដំបង ៖ នៅថ្ងៃអង្គារ៍ ៤រោច ខែភទ្របទ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី១៧ ខែកញ្ញា ឆ្នាំ២០១៩ កម្លាំងបញ្ជាការឯកភាពខេត្តបាត់ដំបង និងក្រុមការងាររបស់គណៈកម្មការជាតិដើម្បីទប់ស្កាត់ និងបង្រ្កាបបទល្មើសធនធានធម្មជាតិ បានឃាត់ខ្លួនជនសង្ស័យឈ្មោះ ឡុង វុទ្ធី និងបានបញ្ជូនទៅសាលាដំបូងខេត្តបាត់ដំបង ដើម្បីផ្តន្ទាទោសទៅតាមច្បាប់ ដែលជនសង្សយ័ឈ្មោះ ឡុង វុទ្ធី បានគៀងគរ ញុះញុង់ប្រជាពលរដ្ឋអោយទៅឈូសឆាយ បំផ្លាញព្រៃឈើ កាប់រានទន្រ្ទានយកដីរដ្ឋ (តំបន់ការពាររបស់បរិស្ថាន) មកធ្វើជាកម្មសិទ្ធិឯកជន និងទិញលក់ដូរដើម្បីប្រយោជន៍ផ្ទាល់ខ្លួន និងបក្ខពួកមិនត្រឹមតែប៉ុណ្ណោះបានរៀបចំជាដីពុះជាឡូតិ៍ ដើម្បីលក់ទៀតផង បង្ហាញឲ្យឃើញពួកជនខិលខូចបាននិងកំពុងទន្រ្ទានយកដីរដ្ឋដោយខុសច្បាប់ ពុះជាឡូតិលក់ដូចជាគេពុះដីឡូតិសង់ផ្ទះល្វែងលក់ជាដើម។
សូមបញ្ជាក់ថា នៅថ្ងៃទី១៧ ខែកក្កដា ឆ្នាំ២០១៩ ក្រសួងបិរស្ថាន បានចេញសេចក្តីប្រកាសព័ត៌មានដោយបញ្ជាក់ថា ក្រសួង និងរដ្ឋបាលខេត្តបាត់ដំបង កំពុងចាត់វិធានការចំពោះជនរៀបចំឡូតិ៍តំបន់ អភិវឌ្ឍ ឡុង វុទ្ធី ទំហំផ្ទៃដីជិត ៥ហិកតា តាមបញ្ញត្តិច្បាប់នៃកម្ពុជាជាធរមាន និងអំពាវនាវដល់សាធារណជនកុំចូលរួមទិញ បន្ទាប់ពីមានជនខិលខូច បានទន្ទ្រានកាន់កាប់ខុសច្បាប់ដី មានទីតាំងនៅក្នុងភូមិភ្នំដំបង ឃុំសន្តិភាព ស្រុកសំឡូត ខេត្តបាត់ដំបង ស្ថិតនៅក្នុងតំបន់ស្ថិតនៅក្នុងតំបន់ការពារធម្មជាតិ (តំបន់ប្រើបា្រស់ច្រើនយ៉ាងសំឡូត) ដែលបានកំណត់ដោយព្រះរាជក្រឹត្យ ចុះថ្ងៃទី០១ ខែវិច្ឆិកា ឆ្នាំ១៩៩៣។
ក្រសួងបរិស្ថានបានសង្កត់ធ្ងន់ថា «ក្រសួងបរិស្ថាន និងរដ្ឋបាលសាលាខេត្តបាត់ដំបង កំពុងចាត់វិធានការ ចំពោះជនរៀបចំឡូតិ៍តំបន់អភិវឌ្ឍ ឡុង វុទ្ធី ទំហំផ្ទៃដីសរុប ៤៩,៦០០ម៉ែត្រការ៉េ តាមបញ្ញត្តិច្បាប់ នៃព្រះរាជាណាចក្រកម្ពុជា ជាធរមាន និងសូមអំពាវនាវដល់សាធារណជនកុំចូលរួមទិញ ឬទទួលយកចំណែកដីឡូតិ៍ខាងលើនេះជាដាច់ខាត»។
យោងតាមច្បាប់ស្តីពីតំបន់ការពារធម្មជាតិ ដីសាធារណៈរបស់រដ្ឋ គឺមិនអនុញ្ញាតឱ្យកាប់រាន ទន្ទ្រានកាន់កាប់ លក់ដូរបានឡើយ និងមិនអាចឋិតនៅក្រោមការកាន់កាប់ ដោយលទ្ធកម្មពិសេសនៃភោគៈឡើយ។ ការចាត់ចែងលក់ដូរដីសាធារណៈរបស់រដ្ឋ នៃតំបន់ការពារធម្មជាតិ គឺជាបទល្មើសព្រហ្មទណ្ឌ ដោយអ្នកប្រព្រឹត្ត និងអ្នកជាប់ពាក់ព័ន្ធត្រូវផ្តន្ទាទោស ជាប់ពន្ធនាគារ និងត្រូវបានចាត់ចូលជាឧក្រិដ្ឋកម្ម ដូចមានចែងក្នុងច្បាប់ស្តីពីការប្រឆាំងសម្អាតប្រាក់ និងហិរញ្ញប្បទានភេរវកម្ម៕ដោយ 
លាង ធៀង
