រាជធានីភ្នំពេញ ៖ អាជ្ញាធរកម្ពុជាបានឃាត់ខ្លួនមនុស្ស៦នាក់ហើយ ដែលពាក់ព័ន្ធនឹងផែនការផ្តួលរំលំ រាជរដ្ឋាភិបាលស្របច្បាប់នៅកម្ពុជា ដែលតាមដឹងមនុស្សទាំង៦នាក់ដែលត្រូវឃាត់ខ្លួន គឺជាអតីតសកម្មជននៃអតីតគណបក្សសង្គ្រោះជាតិ ។ នេះតាមការចុះផ្សាយរបស់បណ្តាញសារព័ត៌មាននៅកម្ពុជា។
អ្នកនាំពាក្យអគ្គស្នងការដ្ឋាននគរបាលជាតិ បានបញ្ជាក់ប្រាប់បណ្តាញព័ត៌មានថា មនុស្ស៦នាក់ដែលត្រូវបានចាប់ខ្លួន មាន ២នាក់ ត្រូវបានឃាត់ខ្លួននៅរាជធានីភ្នំពេញ ម្នាក់នៅខេត្តបន្ទាយមានជ័យ និង៣នាក់នៅខេត្តកណ្តាល។ មនុស្សទាំង៦នាក់ដែលត្រូវឃាត់ខ្លួន ពាក់ព័ន្ធការទទួលយកផែនការមកញុះញង់ ប្រឆាំងរាជរដ្ឋាភិបាល។
តាមព័ត៌មានទទួលបានមនុស្សទាំង៦នាក់នោះត្រូវសមត្ថកិច្ចចាប់ខ្លួនជាបន្តបន្ទាប់ កាលពីចុងសប្តាហ៍មុននេះ ហើយក្នុងចំណោមនោះ មាន៣នាក់ ត្រូវតុលាការសម្រេចឃុំខ្លួនដាក់ពន្ធនាគារព្រៃសជាបណ្តោះអាសន្ន ។
ប្រភពព័ត៌មានក្រៅផ្លូវការឱ្យដឹងថា មន្ត្រីមូលដ្ឋានអតីតបក្សសង្គ្រោះជាតិ៣រូបត្រូវបានឃាត់ខ្លួន នៅព្រឹកថ្ងៃទី១៤ ខែកញ្ញា ឆ្នាំ២០១៩ រួមមាន លោក លី ម៉េងឃាង អតីតសមាជិកគណ:កម្មការប្រតិបត្តិ ស្រុកស្អាង ខេត្តកណ្តាល លោក លី លីន អតីតមេឃុំ សំរោងធំ ស្រុកកៀនស្វាយ ខេត្តកណ្តាល និងលោក ឈុន ថៃយុទ្ធ អតីតជំទប់ទី១ ឃុំព្រែកស្ដី ស្រុកកោះធំ ខេត្តកណ្តាល ។
ចំណែកឯមនុស្សបីនាក់ដែលត្រូវចាប់ខ្លួនកាលពីថ្ងៃទី១៣ ខែកញ្ញា ឆ្នាំ២០១៩ រូមមាន លោក យ៉ាត ភារម្យ អតីតសមាជិកយុវជនបក្ស ស្រុកស្វាយចេក ខេត្តបន្ទាយមានជ័យ ត្រូវចាប់ខ្លួននៅខេត្តបន្ទាយមានជ័យ កញ្ញា យូ ចាន់សុធានី ជាអតីតអ្នកអានព័ត៌មានផេកហ្វេសប៊ុករបស់លោក សម រង្ស៊ី ត្រូវចាប់ខ្លួននៅភ្នំពេញ លោកទុំ ប៊ុនឆន អតីតបេក្ខជនក្រុមប្រឹក្សាសង្កាត់ផ្សារដេប៉ូ២ រាជធានីភ្នំពេញ ត្រូវចាប់ខ្លួននៅខេត្តសៀមរាប៕
