ខេត្តកំពង់ធំ ៖ ពិធីចែកអំណោយដល់សិស្សពិការ២រូបទី១.ឈ្មោះ អ៊ុន កុសល រៀននៅវិទ្យាល័យបារាយណ៍ ស្ថិតនៅស្រុកបារាយណ៍ ខេត្តកំពង់ធំ ពិការដៃទាំងពីរ ទី២ ឈ្មោះ ង៉ោ គឹមណេងរៀននៅវិទ្យាល័យកំពង់ធំ មកពីស្រុកប្រាសាទបាល័ង្ក ពិការភ្នែក ទទួលបានកុំព្យូទ័រ laptop ១នាក់១គ្រឿង។
អ្នកទាំងពីរត្រូវបន្តការសិក្សានៅសាកលវិទ្យាល័យ កំពុងតែតម្រូវការនូវសម្ភារៈប្រើប្រាស់និងថវិកាមួយចំនួន។ ការចែកអំណោយដល់សិស្សពិការមានការចូលរួមពីឯកឧត្តម ហេង សុខណា ជាសមាជិកអចិន្ត្រៃយ៍សហភាពសហព័ន្ធយុវជនថ្នាក់កណ្ដាល និងលោកជំទាវ ប្រធានមន្ទីរអប់រំយុវជននិងកីឡាខេត្តកំពង់ធំ សាខាពន្ធដារខេត្តកំពង់ធំ និងសហភាពសហព័ន្ធយុវជនខេត្តកំពង់ធំ និងនាយិកា លោកគ្រូ អ្នកគ្រូនៅវិទ្យាល័យកំពង់ធំ នៅព្រឹកថ្ងៃអាទិត្យទី១៥ ខែកញ្ញាឆ្នាំ ២០១៩។
ឯកឧត្តម ហេង សុខណា បានសំណេះសំណាលជាមួយសិស្សពិការទាំង២និងឪពុកម្ដាយតើការសិក្សារបស់ប្អូនទាំងពីរមានការលំបាកឬងាយស្រួល ។ អ្វីដែលជាតម្រូវការរបស់ប្អូនៗគឺក្រុមការងារនឹងជួយឧបត្ថម្ភគ្រប់ពេល វេលាពិសេសគឺផ្ដល់នូវអាហារូបករណ៍សម្រាប់ប្អូនៗរៀននៅសាកលវិទ្យាល័យផងដែរ។សូមឲ្យខិតខំនឹងព្យាយាមរៀនសូត្រដើម្បីសម្រេចបំណងប្រាថ្នាដែលប្អូនៗចង់សម្រេចគោលដៅនិងកសាងប្រទេសជាតិឲ្យមានការរីកចម្រើន។ នេះជាឱកាសរបស់ប្អូនៗត្រូវរៀបចំផែនការជីវិតរបស់ខ្លួនក្នុងការបង្កើតទំនាក់ទំនងគ្រប់ទីកន្លែងដើម្បីឱ្យខ្លួនមានការអភិវឌ្ឍ។ ឪពុកម្ដាយត្រូវចំណាយពេលវេលានិងលើកទឹកចិត្តកូនសព្វបែបយ៉ាង ពិសេសរកកន្លែងស្នាក់នៅឲ្យបានសមរម្យសម្រាប់ពួកគាត់។
ឯកឧត្តមបានបន្តទៀតថា ចាប់ពីពេលនេះតទៅសូមឱ្យប្អូនយកចិត្តទុកដាក់ទៅលើជំនាញរបស់ខ្លួនដែលជាតម្រូវការចាំបាច់។ប្អូនៗជាទំពាំងស្នងឬស្សីត្រូវដើរលើវិថីណាដែលត្រឹមត្រូវនិងយុត្តិធម៌ ពិសេសត្រូវជៀសឲ្យឆ្ងាយពីគ្រឿងញៀនធ្វើដំណើរទៅណាមកណាត្រូវពាក់មួកសុវត្ថិភាពឲ្យបានគ្រប់ពេល។
យុវសិស្សទាំង ២ នាក់បានប្ដេជ្ញាចិត្តខិតខំរៀនសូត្រអោយក្លាយទៅជាមនុស្សល្អ មានឆន្ទៈនិងមានការទទួលខុសត្រូវខ្ពស់។យើងខ្ញុំសូមថ្លែងអំណរគុណឥយ៉ាងជ្រាលជ្រៅដល់លោក លោកស្រីទាំងអស់ដែលជួយឧបត្ថម្ភគាំទ្រជាសម្ភារៈប្រើប្រាស់និងថវិការមួយចំនួនដល់ពួកយើងខ្ញុំគ្រប់ពេលវេលា និងប្រសិទ្ធិពរប្រកបតែនឹងពុទ្ធពរទាំងបួនប្រការគឺអាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ ៕
