ខេត្តកំពង់ធំ ៖ ប្រជាពលរដ្ឋចំនួន៧០គ្រួសារមកពីភូមិព្រេន ភូមិរលួស ភូមិគគី ភូមិក្រាំង តំបន់ដីក្រហមចំនួន4ភូមិ ស្ថិតនៅឃុំសុចិត្រ ស្រុកសណ្តាន់ ខេត្តកំពង់ធំ មានការព្រួយបារម្មណ៍ជាខ្លាំង ដោយមន្រ្តីបរិស្ថានខេត្តកំពង់ធំបាន ចុះកាប់បំផ្លាញផលដំណាំស្វាយចន្ទីគាត់ចោលអស់សរុបចំនួន៦០ហិចតា ក្នុងចំណោមប្រជាពលរដ្ឋ៧០គ្រួសារ ដោយគ្រួសារនីមួយៗមានផ្ទៃដីខ្លះ២ហិចតា ខ្លះ៣ហិចតា ទៅ៤ ឫ៥ហិចតា ។
ប្រជាពលរដ្ឋម្នាក់ឈ្មោះ គង់ គី រស់នៅភូមិក្រាំង បានមានប្រសាសន៍ថា លោកបានកាប់ឆ្ការចាប់ពីឆ្នាំ២០១១និងឆ្នាំ២០១២ មកម្លេះ លោកបានដាំដុះស្រូវនិងដំឡូងដោយមានជីវភាពខ្វះខាត់ខ្លាំង លោកបានសម្រេចចិត្តខ្ចីលុយធនាគារមកដាំចន្ទី គ្រាន់បានប្រាក់សងគេវិញ សល់បន្តិចបន្តួចគ្រាន់ចិញ្ចឹមជីវិត លោកបានដាំដុះនៅឆ្នាំ២០១៦ ចន្ទីចំនួន៥ហិចតា រហូតដល់ថ្ងៃទី៧ ខែសីហា ឆ្នាំ២០១៩ ត្រូវបានកម្លាំងជំនាញបរិស្ថានខេត្តកំពង់ធំ ចុះកាប់បំផ្លាញដំណាំគាត់ចោលអស់ ហើយអោយគាត់ផ្តិតមេដៃនិងរុះរើផ្ទះចោលអោយអស់ និងគំរាមវាយខ្នោះបើនៅតែរឹងទទឹង។
ពលរដ្ឋម្នាក់ទៀតឈ្មោះ ឈៀង ខេង រស់នៅភូមិព្រេន បាននិយាយថា លោកបានកាប់ឆ្ការកាន់កាប់ដីនៅឆ្នាំ២០១២ លោកបានដាំដុះស្វាយចន្ទីចំនួន៥ហិចតានៅឆ្នាំ២០១៤ រយៈពេល៣ឆ្នាំ ក៏ត្រូវបានមន្រ្តីបរិស្ថានកាប់ចោលអស់ដែរ លោកមានប្រសាសន៍ទាំងទឹកមុខស្រងូតស្រងាត់ថា លោកគ្មានអ្វីជាទីពឹងទៀតទេ។
លោក ឈុន ឆេន ជំទប់ទី១ ឃុំសុចិត្រ បានមានប្រសាសន៍បន្តថា ប្រជាពលរដ្ឋលោកអាស្រ័យផលតាំងពីឆ្នាំ២០១១និង២០១២មកម្លេះ រហូតដល់ថ្ងៃទី៧ ខែសីហា ឆ្នាំ២០១៩ ទើបមានកម្លាំងជំនាញបរិស្ថានខេត្តកំពង់ធំចុះកាប់ដំណាំស្វាយចន្ទីគាត់ចោលអស់ ដោយមិនរកមូលហេតុដោះស្រាយជូនពួកគាត់ឡើយ។
ប្រធានមន្ទីបរិស្ថានខេត្តកំពង់ធំ លោក តុប កក្កដា បានបញ្ជាក់តាមរយៈទូរសព្ទ័ថា លោកធ្វើទៅតាមផ្លូវច្បាប់ ផលដំណាំដែលបានដាំដុះក្រោយឆ្នាំ២០១៧ ក្នុងនាមជាអ្នកការពារដែនអភិរក្សនៅក្នុងតំបន់ព្រៃឡង់។
ប្រជាពលរដ្ឋចំនួន៧០គ្រួសាររស់នៅឃុំសុចិត្រ សូមអំពាវនាវ ជូនថ្នាក់ដឹកនាំជាន់ខ្ពស់ ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន មេត្តាជួយរកយុត្តិធម៌និងផ្តល់ដីជូនពួកគាត់ បើមិនដូច្នេះ គាត់គ្មានអ្វីជាទីពឹងទៀតទេ ៕
