ខេត្តកោះកុង ៖ នៅថ្ងៃទី១១ ខែកញ្ញា ឆ្នាំ២០១៩ នៅសាលាស្រុកបូទុមសាគរ ខេត្តកោះកុង មានរៀបចំពិធីប្រកាសចូលកាន់តំណែងរបស់លោក ហាក់ ឡេង អភិបាលថ្មី នៃគណៈអភិបាល ស្រុកបូទុមសាគរ ដែលពីមុន ជាអតីត អភិបាលស្រុកមណ្ឌលសីមា ខេត្តកោះកុង ឥឡូវនេះ មកកាន់តំណែង ជាអភិបាល ស្រុកបូទុមសាគរវិញ ដោយសារ មានស្នាដៃល្អ នៅក្នុងការដឹកនាំ និងមានគោលជំហរល្អ នៅស្រុកមណ្ឌលសីមា ក្រោមអធិបតីភាពលោកជំទាវ មិថុនា ភូថង អភិបាលខេត្តកោះកុង។ ចំណែកលោក ទូ សាវុធ អភិបាលស្រុកបូទុមសាគរចាស់ ត្រូវបានឡើងតំណែងទៅជាអភិបាល រងខេត្តកោះកុងវិញ។ ហើយក៏មានលោក ក្រូច បូរី សីហា មកកាន់តំណែងជាអភិបាលរងស្រុកបូទុមសាគរផងដែរ។
លោក ហាក់ ឡេង ដែលទើបចូលមកកាន់តំណែងជាអភិបាលស្រុកបូទុមសាគរ បានប្តេជ្ញានៅចំពោះ មុខមន្ត្រីរាជការ និង កងកម្លាំង ប្រដាប់អាវុធនៅក្នុងស្រុកបូទុមសាគរ ចំពោះមុខដែលមានការចូលរួមនៅ ពិធីចូលកាន់តំណែងចំនួន២៤៨នាក់។
លោក ហាក់ ឡេង មានប្រសាសន៍ នៅក្នុងពិធីនោះ ហើយបានណែនាំខ្លួនចំពោះមុខអ្នកដែលចូលរួម ដោយមានប្រសាសន៍ថា សូមឲ្យមន្ត្រីរាជការ កងកម្លាំងប្រដាប់អាវុធ នៅក្នុងស្រុកបូទុមសាគរទាំងអស់ ត្រូវចេះ ជួយសហការជាមួយគ្នាឲ្យបានល្អប្រសើរ នៅក្នុងការងារបំរើប្រជាពលរដ្ឋឲ្យបានល្អ និងបំរើប្រយោជន៍សង្គមជាតិយើង ឲ្យបានល្អ ហើយត្រូវចេះមើលថែរក្សាគ្នា ជួយគ្នា នៅក្នុងការងារបទពិសោធន៍ល្អៗ សម្រាប់ ជួយប្រជាពលរដ្ឋនៅក្នុងមូលដ្ឋាន។
នៅក្នុងពិធីប្រកាសខាងលើ លោកជំទាវ មិថុនា ភូថង អភិបាលនៃគណៈអភិបាលខេត្តកោះកុង ដែលជាស្រ្តីវ័យក្មេង ចេះដឹងគោលជំហរនៅក្នុងការងារដឹកនាំនៅក្នុងខេត្តកោះកុង ហើយចេះដឹងពីសុខទុក្ខរបស់ប្រជាពលរដ្ឋ និង កងកម្លាំងប្រដាប់អាវុធនៅក្នុងខេត្តបានផ្ដាំផ្ញើដល់លោក ហាក់ ឡេង ឲ្យបំរើការងារជូនប្រជាពលរដ្ឋ ឲ្យបានល្អនៅមូលដ្ឋាន និងបំរើ សង្គមជាតិរបស់យើងឲ្យបានត្រឹមត្រូវច្បាស់លាស់នៅក្នុងការងារ ហើយត្រូវយកចិត្តទុក្ខខ្ពស់បំផុតពេលដែលប្រជាពលរដ្ឋ ជួបការលំបាកខ្វះខាត និងត្រូវចេះស្រឡាញ់គ្នា សហការជាធ្លុងមួយ។
នៅក្នុងពិធីនោះ លោកជំទាវ អភិបាលខេត្ត មានប្រសាសន៏ចំពោះមុខ មន្ត្រីរាជការ និងកងកម្លាំងប្រដាប់អាវុធ ឲ្យជួយទប់ស្កាត់ អំពើបទល្មើស ការកាប់បំផ្លាញ់ព្រៃឈើ នៅក្នុងមូលដ្ឋាន ដូចជា ព្រៃលិចទឹក ព្រៃកោងកាង ដីព្រៃភ្នំ និង ការកាប់ទន្ទ្រានរានយកដីធ្វើជាកម្មសិទ្ធិផ្ទាល់ខ្លួន នេះជាបទល្មើស ។ លោកជំទាវបន្តថា បើមន្ត្រីរាជការណាហ៊ាន ចូលរួមជាមួយក្នុងការកាប់ព្រៃឈើនោះ និងប្រឈមមុខផ្លូវច្បាប់ មិនតែប៉ុណ្ណោះអាចនឹងត្រូវជាប់ពន្ធនាគារទៀត នេះជាការលើកឡើងរបស់លោកជំទាវអភិបាលនៃគណៈអភិបាលខេត្តកោះកុង។
ប្រភពពីប្រជាពលរដ្ឋ និងមន្ត្រីរាជការ បាននិយាយ ប្រាប់ថា កន្លងមក មានអ្នកមានលុយ មានអំណាច មក ជួលប្រជាពលរដ្ឋឲ្យកាប់ព្រៃ ហើយរងចាំទិញដីនោះ ហើយអ្នកខ្លះទៀតយកគ្រឿងចក្រ មកឈូសឆាយដីព្រៃទៀត តែមិនមានអ្នកណាទប់ស្កាត់នោះទេ។
មន្ត្រីរាជការ និងប្រជាពលរដ្ឋ បាននិយាយទៀតថា បើលោកជំទាវ អភិបាលខេត្តកោះកុង មានប្រសាសន៍បែបនេះ ប្រហែល អ្នកមានបុណ្យស័ក្ដិ មានអំណាច អាចនឹងខ្លាចញញើតខ្លះ។
ប្រជាពលរដ្ឋ បានអរគុណចំពោះលោកជំទាវ អភិបាលនៃគណៈអភិបាលខេត្តកោះកុង ដែលតែងតែ យកចិត្តទុកដាក់ ចំពោះប្រជាពលរដ្ឋ មិនគិតការនឿយហត់នោះទេ ដើម្បីប្រយោជន៍ប្រជាពលរដ្ឋ និង សង្គមជាតិយើង។ ដោយ យួនឈីវ
