ភ្នំពេញ ៖ គណបក្សប្រជាជនកម្ពុជា បានចេញសេចក្តីជូនដំណឹងពីមរណភាពរបស់លោក ប៊ូ ថង សមាជិកគណអចិន្ត្រៃយ៍គណបក្ស ហើយក៏បានសម្តែងការសោកស្តាយនិងក្រៀមក្រំចំពោះ មរណភាពឥស្សរជនរូបនេះផងដែរ ។
តាមសេចក្តីជូនដំណឹងនោះក៏បានបញ្ជាក់ថា គណៈអចិន្ត្រៃយ៍ នៃគណៈកម្មាធិការកណ្តាលគណបក្សប្រជាជនកម្ពុជា មានសេចក្តីសោកស្តាយ និងក្រៀមក្រំជាទីបំផុត សូមទូលថ្វាយ និងជម្រាបជូនសម្តេច ទ្រង់ ឯកឧត្តម លោកជំទាវ លោក លោកស្រី និងសាធារណជនមេត្តាជ្រាបថា ឯកឧត្តម នាយឧត្តមសេនីយ៍ ប៊ូ ថង សមាជិកគណៈអចិន្ត្រៃយ៍នៃគណៈកម្មាធិការកណ្តាលគណបក្សប្រជាជនកម្ពុជា ឧត្តមប្រឹក្សាផ្ទាល់ព្រះមហាក្សត្រ អតីតឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ អតីតអ្នកតំណាងរាស្ត្រ និងអតីតប្រធានគណៈកម្មការទី៤ នៃព្រឹទ្ធសភា បានទទួលមរណភាពនៅថ្ងៃទី១២ ខែកញ្ញា ឆ្នាំ២០១៨ វេលាម៉ោង១៖២០នាទី ទៀបភ្លឺក្នុងជន្មាយុ ៨២ឆ្នាំ ដោយរោគាពាធ ៕
