ប្រទេសថៃ ៖ នៅរសៀលថ្ងៃទី០៧ ខែកញ្ញា ឆ្នាំ២០១៩ នៅក្នុងសាលប្រជុំទីស្នាក់ការសហព័ន្ធអ្នកសារព័ត៌មានអាស៊ាន UMA ក្នុងស្រុកអរញ្ញប្រាថេត ខេត្តស្រះកែវ ប្រទេសថៃ គណកម្មការនាយកនិងទីប្រឹក្សាសហព័ន្ធអ្នកសារព័ត៌មានអាស៊ាន ដែលហៅកាត់ថា UMA ថៃ-កម្ពុជា ចំនួន៥៥នាក់ បានជួបប្រជុំពិនិត្យមើលការងារកន្លងមកនិងលើកគំរោងរកការរីកចម្រើនទៅមុខទៀត ។
លោក ប្រាស៊ិត សែនរុងរឿង អគ្គលេខាធិការ UMA បានប្រកាសបង្ហាញអំពីការរៀបចំរចនាសម្ព័ន្ធយូម៉ា ដែលកន្លងមកតែងមានការយល់ច្រឡំ រួមមានលោក ប្រាស៊ិត សែនរុងរឿង ជាអគ្គលេខាធិការ UMA លោក ប្រូយ សម្បត្តិ អគ្គលេខាធិការរងប្រចាំប្រទេសថៃ លោក សុខ សុវណ្ណ អគ្គលេខាធិការរងប្រចាំប្រទេសកម្ពុជា និងលោក កូកូ ជី អគ្គលេខាធិការរងប្រចាំប្រទេសភូមា ដែលត្រៀមចូលប្រកាសនាពេលឆាប់ៗ ខាងមុខនេះនៅ មឿយ៉ាវឌី ក្នុងប្រទេសភូមា ។
លោក ប្រូយ សម្បត្តិ អគ្គលេខាធិការរងប្រចាំប្រទេសថៃ បានថ្លែងថា សកម្មភាពរបស់ UMA ក្នុងប្រទេសថៃ កំពុងផ្តោតលើការកើនឡើងសមាជិកដែលមានរហូតដល់ចំនួន ៤ ១១៦នាក់ ហើយកំពុងមានសមាជិកថ្មីបន្តមកចូលរួម បន្ថែមទៀត ដោយសារការយល់ឃើញតាមទស្សនៈរៀងៗខ្លួនអំពីការផ្សព្វផ្សាយរបស់យូម៉ា លើវិស័យសេដ្ឋកិច្ច ទេសចរណ៍ វប្បធម៌ ប្រពៃណី ដែលត្រូវជំរុញកំណើននៃការរីកចម្រើនទំនាក់ទំនងគ្នាល្អប្រសើរ នៅក្នុងតំបន់អាស៊ាន។
លោក សុខ សុវណ្ណ អគ្គលេខាធិការរងប្រចាំប្រទេសកម្ពុជា បានបង្ហាញអំពីគម្រោងផ្សព្វផ្សាយតាមបណ្តាញសង្គមរបស់យូម៉ានៅកម្ពុជា ដែលកំពុងតែរួមគ្នាទប់ស្កាត់បន្សាបរាល់ព័ត៌មានក្លែងក្លាយបំពុលសង្គម និងផ្សព្វផ្សាយនូវការអភិវឌ្ឍ មិត្តភាព និងសន្តិភាព ប្រទេសក្នុងតំបន់អាស៊ាននិងពិភពលោក។ ទន្ទឹមនិងនោះលោក សុខ សុវណ្ណ អំពាវនាវសុះឲ្យសមាជិកយូម៉ាចូលរួមឧបត្ថម្ភក្នុងដំណើរការផ្សាយបណ្តាញសង្គមរបស់យូម៉ានៅកម្ពុជា។លោក កូកូ ជី តំណាងខាងប្រទេសភូមា បានត្រៀមរៀបចំប្រកាស់បង្កើត UMA នៅពេលខាងមុខនេះបន្ទាប់ពីទឹកជំនន់បានស្រកទៅវិញ ហើយក៏កំពុងដកបទពិសោធន៍បន្ថែមទៀតពីការរីកចំរើនរបស់យូម៉ាប្រទេសកម្ពុជាផងដែរលើវិស័យព័ត៌មាន។
លោក ប្រាស៊ិត សែនរុងរឿង អគ្គលេខា UMA បានបញ្ជាក់ថា សន្មិបាតប្រចាំឆ្នាំ២០១៩របស់ UMA ត្រូវធ្វើនៅខេត្តផេតចាប៊ូន ប្រទេសថៃនៅថ្ងៃទី២៥ ខែវិច្ឆិកា ឆ្នាំ២០១៩ ដែលជាតំបន់មានអាកាសធាតុត្រជាក់ មានចម្ងាយពីស្រុកអរញ្ញ ព្រំដែនកម្ពុជាទៅចម្ងាយ៤៤០គីឡូម៉ែត្រ ទៅប៉ែកខាងជើង និងមានគ៉រោងទៅប្រជុំនៅប្រទេសភូមានិងត្រៀមត្រូវទៅធ្វើទស្សនៈកិច្ចសិក្សានៅសា្ថនីយទូរទស្សន៍ NHK នៅប្រទេសជប៉ុន នាដើមឆ្នាំក្រោយ។ ប្រតិភូក៏បានអញ្ជើញទៅទស្សនកិច្ចនៅប្រាសាទស្តុកកុកធំ នៅស្រុកគោកធ្យូង ខេត្តស្រះកែវផងដែរ៕