ខេត្តកំពង់ធំ ៖ ប្រជាពលរដ្ឋដែលកំពុងរស់នៅតាមដងស្ទឹងសែនក្នុងស្រុកប្រាសាទសំបូរនៅតាមភូមិមួយចំនួនកំពុងទទួលរងគ្រោះដោយសារទឹកជំនន់។ ស្របពេលនោះដែរ ប្រជាពលរដ្ឋតាមបណ្តាភូមិ កំពុងតែខិតខំស្វះស្វែងរកទីទួលសុវត្ថិភាព ដើម្បីការពារទ្រព្យសម្បត្តិរបស់ពួកគាត់ដូចជាសត្វពាហនៈជាដើម។
នៅព្រឹកថ្ងៃទី១០ ខែកញ្ញា ឆ្នាំ២០១៩ន ឯកឧត្តម សុខ លូ និងសហការី បានចុះពិនិត្យមើលស្ថានភាពទឹកជំនន់នៅតាមដងស្ទឹងសែនក្នុងស្រុកប្រាសាទសំបូរ ខេត្តកំពង់ធំ។ ក្នុងឱកាសនោះដែរ ឯកឧត្តម បានក្រើនរំលឹកឲ្យអាជ្ញាធរនិងជំនាញពាក់ព័ន្ធ បន្តតាមដាននិងត្រៀមលក្ខណ:ជួយប្រជាពលរដ្ឋក្នុងគ្រោះមហន្តរាយទឹកជំនន់ នៅក្នុងឆ្នាំនេះឲ្យបានទាន់ពេលវេលា។ ចំពោះភូមិដែលអាចនឹងប្រឈមនឹងការលិចខ្លាំងជាងគេ អាជ្ញាធរត្រូវជួយរកទីទួលសុវត្ថិភាពដើម្បីរំដោះសត្វពាហនៈរបស់ពួកគាត់ឲ្យមានសុវត្ថិភាព។
ឯកឧត្តមបានបន្តទៀតថា សូមឲបងប្អូនរស់នៅតាមដងស្ទឹងសែនមេត្តាបន្តការប្រុងប្រយ័ត្នខ្ពស់ក្នុងការស់នៅប្រចាំថ្ងៃ ជាពិសេសកុមារតូចៗ ដែលអាចប្រឈមនឹងការលង់ទឹកស្លាប់បាន។ នឹងត្រូវមានការត្រៀមទុកជាមុននូវស្បៀងអាហារថ្នាំសង្កូវជាដើម។ ព្រោះស្ថានភាពទឹកឆ្នាំនេះសម្រាប់ស្រុកប្រាសាទសំបូរមិនទាន់ដល់កម្រិតប្រកាសអាសន្ននៅឡើយទេ។ ដោយឡែកស្រុកសណ្ដាន់គឺបានដល់កម្រិតប្រកាសអាសន្នហើយ។
ចុងបញ្ចប់ ឯកឧត្តម សុខ លូ ក៏បានបញ្ជាក់ផងដែរថា សម្រាប់បងប្អូនដែលមានបញ្ហាក្នុងរដូវទឹកជំនន់នេះ មិនថាទីកន្លែងណាទេ គឺអាជ្ញាធរនៅតាមមូលដ្ឋាននិមួយៗបានត្រៀមខ្លួនជាស្រេចក្នុងការជួយដល់បងប្អូនគ្រប់ពេលវេលា។ ហើយការត្រៀមសម្រាប់រដូវទឹកសម្រកវិញនោះប្រសិនបើមានការខូចខាតផលដំណាំស្រូវរបស់ពួកគាត់ គឺយើងមានគ្រាប់ពូជសម្រាប់ចែកជូនដល់ពួកគាត់ទៀតផងដែរ។
ក្នុងការចុះសួរសុខទុក្ខនេះដែរ ឯកឧត្តមក៏បាននាំយកអំណោយមួយចំនួននិងថវិកាទៅចែកជូនដល់ប្រជាពលរដ្ឋដែលកំពុងតែរងគ្រោះដោយសារទឹកជំនន់ទាំងនោះផងដែរ ៕
