ខេត្តបន្ទាយមានជ័យ ៖ យោងតាមប្រភពបណ្តាញពត័មានក្នុងស្រុកបានឲ្យដឹងថា ភ្លៀងធ្លាក់មិនឈប់ឈរតាំងពីយប់រហូតឈានដល់ព្រឹកថ្ងៃទី០៤ ខែកញ្ញា ឆ្នាំ២០១៩ បានធ្វើឲ្យហេដ្ឋារចនាសម្ព័ន្ធមួយចំនួនក្នុងក្រុងប៉ោយប៉ែត កើតមានជំនន់ទឹកភ្លៀង ប៉ុន្តែមិនធ្ងន់ធ្ងរទេ គ្រាន់តែបង្កឱ្យមានការលំបាកដល់អ្នកស្រុកក្នុងការធ្វើដំណើរចាកចេញពីលំនៅដ្ឋានទៅប្រកបអាជីវកម្មផ្សេងៗតែប៉ុណ្ណោះ។
បើទោះជាថ្មីៗ មានព័ត៌មានថា ខេត្តមួយចំនួននៅប្រទេសថៃ មានភ្លៀងធ្លាក់ខ្លាំង តែអូរព្រំដែនកម្ពុជា-ថៃ ជាពិសេសចំណុចស្ពានព្រំដែននៃច្រកទ្វារអន្តរជាតិប៉ោយប៉ែតខ្លងលឹក មានទឹកនៅបាតអូរដដែល។ យ៉ាងណាក៏ដោយ គ្រោះធម្មជាតិនេះពុំមានរបាយការណ៍ពីគ្រោះថ្នាក់ណាមួយដែលកើតមានលើពលរដ្ឋនោះទេ។
នៅតាមដងផ្លូវបេតុង និងផ្លូវលំមួយចំនួនមានជំនន់ទឹកភ្លៀង ជំនន់ទឹកភ្លៀងជន់លិចដោយកន្លែងខ្លះមានទឹករាក់ងាយស្រួលធ្វើដំណើរ តែកន្លែងខ្លះទៀតមានទឹកជ្រៅបង្កឲ្យយានយន្តរលត់ត្រូវរុញបណ្តើរក៏មាន ប៉ុន្តែចំណតរថយន្តក្រុងមានទឹកដក់តិចតួចនោះទេ ព្រោះក្រុមហ៊ុនចំណតមានម៉ាស៊ីនបូមទឹកចេញ ៕
