រាជធានីភ្នំពេញ ៖ យោងតាមទំព័រហ្វេសប៊ុកផ្លូវការស្ថានទូតជប៉ុនប្រចាំកម្ពុជា បានប្រកាសឲ្យដឹងកាលពីរសៀលថ្ងៃទី២ ខែកញ្ញា នេះថា ឯកអគ្គរាជទូតជប៉ុនថ្មីប្រចាំកម្ពុជាបានមកដល់ប្រទេសកម្ពុជាហើយ កាលពីម្សិលមិញជាមួយនឹងសារស្វាគមន៍យ៉ាងកក់ក្តៅ ចំពោះវត្តមាននៅកម្ពុជា។ លោកឯកអគ្គរាជទូតជប៉ុនថ្មីនេះមកជំនួសលោក ហ៊ីដេហ៊ីសា ហូរីណូអ៊ុជិ ឯកអគ្គរាជទូតជប៉ុនប្រចាំព្រះរាជាណាចក្រកម្ពុជា ដែលចប់អាណត្តិ។
ជាមួយនឹងរូបថតមួយសន្លឹកតាមរយៈផេកស្ថានទូតលោកឯកអគ្គរាជទូតជប៉ុនថ្មីបានសរសេរនូវសារខ្លីមួយស្វាគមន៍សម្រាប់ការចាប់ផ្តើមការងាររបស់លោកនៅកម្ពុជា។សារសរសេរថាៈជម្រាបសួរ! ខ្ញុំឈ្មោះ មិកាមិ ម៉ាសាហ៊ីរ៉ូ ឯកអគ្គរាជទូតជប៉ុនប្រចាំនៅកម្ពុជា។ ខ្ញុំទើបតែមកដល់ប្រទេសកម្ពុជាកាលពីម្សិលមិញ។ ខ្ញុំមានកិត្តិយស និងសប្បាយរីករាយយ៉ាងក្រៃលែង បានមកកាន់ប្រទេសកម្ពុជាដែលជាមិត្តជិតស្និទ្ធរបស់ប្រទេសជប៉ុន និងជាប្រទេសដែលមានវប្បធម៌ដ៏អស្ចារ្យ។ ខ្ញុំទន្ទឹងរង់ចាំជួបជាមួយលោក លោកស្រី ក្មួយៗ និងទស្សនាទីកន្លែងនានានៅប្រទេសកម្ពុជា។
គួររំលឹកដែរថាលោករាជទូតជប៉ុនដែលចប់អាណត្តិនៅមុនពេលការចាកចេញរបស់លោកៗបានសរសេរសារមួយប្រកបដោយមនោសញ្ចេតនានិងការវាតតម្លៃខ្ពស់ពីការរីចម្រើនរបស់កម្ពុជា ៕
