រាជធានីភ្នំពេញ ៖ អតីតមន្ត្រីនិងសកម្មជន នៃអតីតគណបក្សសង្គ្រោះជាតិ ចំនួនបីនាក់ ត្រូវបាននគរបាលខេត្តកំពង់ធំ ចាប់ខ្លួនកាលពីថ្ងៃទី១ ខែកញ្ញា ឆ្នាំ២០១៩ ពាក់ព័ន្ធការជេរប្រមាថថ្នាក់ដឹកនាំ ញុះញុង់អោយមានការរើសអើង ធ្វើអោយប៉ះពាល់ស្ថិរភាពសន្តិសុខសង្គម ។
លោកឧត្តមសេនីយ៍ឯក ឆាយ គឹមខឿន អ្នកនាំពាក្យនៃអគ្គស្នងការដ្ឋាននគរបាលជាតិ ត្រូវបានសារព័ត៌មានក្នុងស្រុកដកស្រង់សំដីយកមកចុះផ្សាយដោយលោកបានបញ្ជាក់បន្ថែមថា មនុស្សទាំងបីនាក់ ដែលចាប់ខ្លួន គឺបានបង្ហោះសារ ជេរប្រមាថសម្តេចតេជោ ហ៊ុន សែន នាយករដ្ឋមន្ត្រី និងរដ្ឋាភិបាល រួមទាំងញុះញុង់អោយមានការរើសអើង ធ្វើអោយប៉ះពាល់ ស្ថិរភាពសន្តិសុខសង្គម។
មន្ត្រីជាន់ខ្ពស់នគរបាលជាតិ បានឲ្យដឹងថា អតីតមន្ត្រី និងសកម្មជន នៃអតីតគណបក្សសង្គ្រោះជាតិ ដែលចាប់ខ្លួន រួមមាន ៖ ១. លោក ស៊ុន ប៊ុនថុន អតីតសមាជិកក្រុមប្រឹក្សាឃុំបារាយណ៍។ ២. លោក នូ ភឿន សកម្មជននៅឃុំបារាយណ៍។ ៣.លោក រស់ គឹមសៀង អតីតប្រធានយុវជនខេត្តកំពង់ធំ។
សមត្ថកិច្ចបានបញ្ជាក់ថា ក្រោយចាប់ខ្លួនមនុស្សទាំងបីនាក់នេះ ត្រូវបានបញ្ជូនទៅកាន់សាលាដំបូងខេត្តកំពង់ធំ កាលពីថ្ងៃទី២ ខែកញ្ញា ឆ្នាំ២០១៩ ហើយត្រូវបានតុលាការ បញ្ជូនខ្លួនទៅឃុំក្នុងពន្ធនាគារខេត្តកំពង់ធំ នាវេលាម៉ោង ៦និង៣០នាទី ល្ងាចថ្ងៃទី២ ខែកញ្ញា ឆ្នាំ២០១៩៕
