កីឡា ៖ កាលពីល្ងាចថ្ងៃទី១ ខែកញ្ញា ២០១៩ ក្រុមអត្តពលិកតេក្វាន់ដូ ITF ( International Taekwondo Federation ) របស់កម្ពុជា បានត្រឡប់មកមាតុភូមិវិញ បន្ទាប់ពីបានបញ្ចប់បេសកម្មប្រកួតជើងឯកពិភពលោក នៅប្រទេសប៊ុលហ្គារី។
កម្ពុជា បានដណ្ដើមមេដាយកម្រិតពិភពលោកចំនួន៥គ្រឿងផងដែរ ដោយក្នុងនោះ កីឡាករ ប៉ាល់ ជីវ័ន្ដ ដណ្ដើមបានមេដាយមាស លើវិញ្ញាសាមេគុនកម្រិតខ្សែក្រវាត់ខ្មៅ ៥ដាន់។
ចំណែក កីឡាករវ័យក្មេង បួន ចាន់ថារ៉ាត់ ដណ្ដើមបានមេដាយប្រាក់ ១គ្រឿង លើវិញ្ញាសាប្រយុទ្ធទម្ងន់ ៤៥គីឡូក្រាម។ មេដាយប្រាក់មួយគ្រឿងទៀតបានមកពីការសំដែងពិសេសជាក្រុម ៦នាក់ ដែលមានកីឡាករ ប៉ាល់ ជីវ័ន្ដ, តាំង សៀសុង, ស៊ុំ គង់ហេង, យឿន ប៊ុនលាង, យឿន ប៊ុនឡុង និងនេត ហាក់លី ។
ចំពោះមេដាយសំរិទ្ធ ២គ្រឿងវិញនោះ ១គ្រឿងបានមកពីការសំដែងមេគុនជាក្រុម ៤រូប ដែលមានកីឡាករ ម៉េត សុខមាន, សុភ័ក្ត្រ ច័ន្ទឧត្តម, បួន ចាន់ថារ៉ាត់ និងរឿង វណ្ណៈ។ មេដាយសំរិទ្ធមួយគ្រឿង ទៀតបានមកពីវិញ្ញាសាវាយបំបែកក្ដារសម្រាប់ក្រុមប្រភេទអាយុពី ៤០ទៅ៤៩ឆ្នាំ។
សូមបញ្ជាក់ថា នេះជាការប្រកួតជើងឯកពិភពលោក សម្រាប់ថ្នាលលើកទី១៤ និងសម្រាប់កីឡាជម្រើសជាតិលើកទី២១ ការប្រកួតនេះមាន ៧៤ប្រទេសចូលរួមដែលមាន កីឡាករ-កីឡាការិនី សរុប ១,៤១២រូប ចូលរួមហើយការប្រកួតមានចំនួន ១០០វិញ្ញាសា ខណៈកម្ពុជាបានបញ្ជូនកីឡាករ-កីឡាការិនី ចូលរួមប្រកួតចំនួន ២៣រូប ទាំងប្រតិភូ ដែលក្នុងនោះមានកីឡាករ-កីឡាការិនីជម្រើសជាតិ និងថ្នាល៕
