ខេត្តកំពង់ធំ ៖ រដ្ឋបាលខេត្តកំពង់ធំ បាននាំយកអង្ក និងស័ង្កសីចែកជូនដល់គ្រួសារចំនួន៥៥១គ្រួសារ ដែលជា របស់គម្រោងបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ចជំហាន២ (LASED II)ដែលទទួលបានការគាំទ្រពីរាជរដ្ឋាភិបាលកម្ពុជា និងទទួលបានហិរញ្ញប្បទានសម្បទានពីធនាគារពិភពលោក តាមរយៈកម្មវិធីសម្បទានដីសង្គមកិច្ច ក្នុងការបែងចែកដីដល់គ្រួសារប្រជាពលរដ្ឋក្រីក្រ គ្មានដី ឬពលរដ្ឋដែលមានដីតិចតួច ក្រោមអធិបតីភាពឯកឧត្តម សុខ លូ អភិបាលខេត្តកំពង់ធំ នាព្រឹកថ្ងៃទី២៧ ខែសីហាឆ្នាំ២០១៩ នៅក្នុងបរិវេណវត្តជ័យរតនរង្សី (វត្តក្របៅ) ក្នុងឃុំដូង ស្រុកប្រាសាទបល្ល័ង្ក។
លោក យ៉ូវ សេងគុណ ប្រធានគ្រប់គ្រងគម្រោងបែងចែកដី ដើម្បីសង្គមកិច្ច និងការអភិវឌ្ឍសេដ្ឋកិច្ចជំហាន២ (LASED II)បានធ្វើរបាយការណ៍ស្វាគមន៍ និងរាយការណ៍ពីលទ្ធផលនែការអនុវត្តការងារកន្លងមក បញ្ហាប្រឈម និងដំណោះស្រាយ នានា ដែលក្រុមការងារគម្រោងបានខិតខំអនុវត្តរហូតបានជាផ្លែផ្កា នាពេលនេះ។
ឯកឧត្តម សុខ លូ អភិបាលខេត្តកំពង់ធំ បានថ្លែងថា ដីសម្បទានសង្គមកិច្ចដែលគម្រោង LASED II ចែកជូនបងប្អូននៅពេលនេះ គឺជាដីរបស់រដ្ឋ មិនមែនជាដីកម្មសិទ្ធរបស់បុគ្គលណាម្នាក់ទេ ដូច្នេះ សូមបងប្អូនដែលទទួលបានដីនេះ កុំមានការភ័យខ្លាចឲ្យសោះ ត្រូវចូលទៅអាស្រ័យផល ត្រូវខិតខំបង្ករបង្កើនផល ហើយយកគ្រាប់ពូជដំណាំ និងដាំកូនឈើហូបផ្លែ។
គួរបញ្ជាក់ថា នេះជាការចែកជូននូវសម្ភារៈគាំទ្រដល់កិច្ចដំណើរការចូលតាំងទីលំនៅរបស់សម្បទានិករបស់គម្រោង LASED II បន្ទាប់ពីគម្រោងបានចែកជូននូវសម្ភារៈកសិកម្ម គ្រាប់ពូជបន្លែ និងកូនឈើហូបផ្លែនាពេលកន្លងមក។
តាមផែនការ នាពេលខាងមុខ គម្រោងនឹងបន្តចែកជូននូវសម្ភារៈមួយចំនួនទៀតដូចជា អំពូលពន្លឺព្រះអាទិត្យ តង់ផ្លាស្ទិក កន្ទេល ភួយ ធុងទឹក ធុងចម្រោះទឹក ដើម្បីបន្តគាំទ្រដល់សម្បទានិកក្នុងការចូលទៅតាំងទីលំនៅដំបូង។ លើសពីនេះ គម្រោងក៏នឹងបន្តអភិវឌ្ឍហេដ្ឋារចនាសម្ព័ន្ធរួមមាន ផ្លូវថ្នល់ សាលារៀន ប៉ុសិ៍សុខភាព អគារសហគមន៍ ផ្សារសហគមន៍ អគារស្នាក់នៅសម្រាប់គ្រូបង្រៀន អណ្តូងទឹក ស្រះទឹក ប្រព័ន្ធស្រោចស្រព ។ល។ និងផ្តល់នូវបច្ចេកទេសធ្វើកសិកម្ម ចិញ្ចឹមសត្វ និងការកែច្នៃផលិតផលកសិកម្ម ដើម្បីឱ្យសម្បទានិកមានមុខរបរ និងបន្តលើកស្ទួយជីវភាពរបស់ខ្លួន។ ទន្ទឹមនឹងនោះ គម្រោងក៏នឹងផ្តល់ទុនបង្វិលប្រមាណជា ២៨០$ ជូនសម្បទានិកក្នុងមួយគ្រួសារ ដើម្បីចាប់ផ្តើមបង្កបង្កើនផល ឬបង្កើតមុខរបររបស់ខ្លួន។
ឯកឧត្តមបន្តថា រាជរដ្ឋាភិបាលគ្រោងនឹងចំណាយទឹកប្រាក់ប្រមាណជា៤លានដុល្លារអាមេរិក សម្រាប់ការអភិវឌ្ឍជូនបងប្អូនប្រជាពលរដ្ឋនៅលើដីសម្បទានសង្គមកិច្ចនេះ ដើម្បីប្រែក្លាយពីគ្រួសារដែលគ្មានដី និងខ្វះខាតដីទាំងនោះ ទៅជាគ្រួសារដែលមានដីលំនៅដ្ឋាន និងមានដីសម្រាប់ផលិតកម្មកសិកម្មប្រកបដោយភាពបៃតង និងពីគ្រួសារក្រីក្រ ទៅជាគ្រួសារដែលមានជីវភាពធូរធារប្រកបដោយសុភមង្គល និងក្តីសង្ឃឹមទៅអនាគត។ឯកឧត្តមក៏បានអំពាវនាវ ដល់បងប្អូនទាំងអស់ ត្រូវខិតខំរក្សានូវសុខភាពឲ្យបានល្អ គេងក្នុងមុងជានិច្ច និងដាក់អាល់បែតក្នុងពាងទឹក អាងទឹក និងលុបបំបាត់ជម្រកមូសខ្លា ទីកន្លែងណាដែលអាចដក់ទឹកបាន ដើម្បីរួមគ្នាទប់ស្កាត់ជំងឺគ្រុនឈាម ព្រោះជំងឺគ្រុនឈាម មិនមែនមានតែកូនក្មេងទេ មនុស្សចាស់ក៏មានកើតជំងឺគ្រុនឈាមដែរ។ ម្យ៉ាងវិញទៀត សូមបងប្អូនចូលរួមគោរពច្បាប់ចរាចរណ៍ រាល់ការធ្វើដំណើរត្រូវ ពាក់មួកសុវត្ថិភាព និងបើកបរដោយប្រុងប្រយ័ត្នខ្ពស់ ជាពិសេសត្រូវនៅឲ្យឆ្ងាយពី គ្រឿងញៀនទាំងអស់គ្នានិងខិតខំចូលរួមអភិវឌ្ឍន៍ជាមួយរាជរដ្ឋាភិបាលដើម្បីប្រទេសជាតិមានភាពរីកចំរើន ៕ដោយ តេច ឆេង
