ខេត្តរតនគិរី ៖ លោក ខាន់ ខុន បានមានប្រសាសន៍ថា ក្នុងនាមយើងជាពលរដ្ឋខ្មែរទាំងអស់គ្នា គួរគប្បីត្រូវចេះស្រលាញ់រាប់អានគ្នា និងចេះជួយគ្នាទៅវិញទៅមក ពិសេសនៅក្នុងពេលជួបការលំបាកនិងគ្រាមានអាសន្នដោយមិនប្រកាន់ពូជសាសន៍ សាសនា ពណ៌សម្បុរនិងវណ្ណៈនោះឡើយ។
នៅថ្ងៃទី ២៦ ខែសីហា ឆ្នាំ២០១៩ លោក ខាន់ ខុន ទីប្រឹក្សាក្រសួងធម្មការនិងសាសនា និងជានាយកប្រតិបត្តិសមាគមបេសកកម្មដំណឹងល្អ បានចុះចែកអំណោយដល់ប្រជាពលរដ្ឋក្រីក្រ ដែលកំពុងជួបប្រទះនូវការលំបាកខ្វះខាតស្បៀងអាហារនឹងរងផលប៉ះពាល់ដោយសារទឹកជំនន់ ចំនួន ២០០គ្រួសារ ដែលប្រជាជនទាំងនោះ កំពុងរស់នៅក្នុងភូមិលំផាត់ ឃុំជ័យឧត្តម ភូមិព្រួកនិងភូមិប៉ាតាង ឃុំប៉ាតាង ស្រុកលំផាត់ ខេត្តតនគិរី។ ដែលអំណោយទាំងអស់នេះគឺជា ព្រះពររបស់ព្រះយេស៊ូគ្រីស្ទ នឹងសប្បុរសជន ដែលជាដៃគូរសមាគមបេសកម្មដំណឹងល្អផងដែរ។
នៅក្នុងឱកាសនោះដែរ លោក ខាន់ ខុន បានមានប្រសាសន៍ថា ក្នុងនាមយើងជាខ្មែរ យើងត្រូវចេះជួយទុក្ខធុរៈគ្នា ទៅវិញទៅមកនៅពេលដែលជួបនូវបញ្ហា និងការលំបាកផ្សេងៗ ជាពិសេសដូចជាគ្រោះមហន្តរាយជាដើម។ ទោះបីជាយើងជួយតាមលទ្ធភាព តិចក្តីច្រើនក្តី សុំឲ្យយើងទាំងអស់គ្នាចេះជួយរំលែកគ្នា ហើយយើងរៀនពីវប្បធម៌ ចែករំលែកគ្នាទៅវិញទៅមក ដោយមិនប្រកាន់ពូជសាសន៍ សាសនា ពណ៌សម្បុរ និងវណ្ណៈនោះឡើយ។ លោកបានបន្តទៀតថា
សម្ភារៈទាំងអស់នេះ គឺមិនគ្រប់គ្រាន់តាមតម្រូវការរបស់បងប្អូនទេ ក៏ប៉ុន្តែនេះជាការចូលរួមចំណែកក្នុងការជួយគ្នាក្នុងគ្រាអាសន្នដើម្បីជួយដោះស្រាយទុក្ខលំបាកបានមួយគ្រាផងដែរ ។
ជាមួយគ្នានោះដែរ ប្រជាពលរដ្ឋដែលកំពុងជួបប្រទះនូវការលំបាក ខ្វះខាតស្បៀងអាហារ មកពីភូមិទាំងបី ក្នុងស្រុកលំផាត់ ខេត្តរតនគិរី បានសំដែងនូវការត្រេកអរនិងសប្បាយរីករាយបំផុត ដែលទទួលបានអំណោយនៅថ្ងៃនេះ ស្របពេលដែលពួកគាត់កំពុងតែរងផលប៉ះពាល់ដោយសារទឹកជំនន់ គ្រោះរាំងស្ងួត នឹងជំងឺដង្កាត់ផ្សេងៗ ដែលកត្តាទាំងអស់នេះជាបញ្ហា បង្កការលំបាកដល់ជីវភាពរស់នៅរបស់ពួកគាត់ជាប្រចាំថ្ងៃផងដែរ។
គួរបញ្ជាក់ផងដែរថា អំណោយដែលចែកជូនប្រជាជនចំនួន ២០០ គ្រួសារ គឺក្នុងមួយគ្រួសារទទួលបាន អង្ករមួយបេ ៣០គីឡូ . ត្រីខ ១ យួរ. ស្ករសមួយគីឡូ. អំបិល ១គីឡូ. ទឹកស៊ីអ៊ីវ ១យួរ. មុង១. ភួយ១. មី ១កេស. និងធុងចម្រោះទឹកស្អាតរូបទន្សាយ១ ៕
