ខេត្តកំពង់ធំ ៖ ថ្លែងក្នុងកិច្ចប្រជុំ បូកសរុបលទ្ឋផលចុះបញ្ជីគ្រប់គ្រងការស្នាក់នៅ និងការផ្តល់អត្តសញ្ញាណប័ណ្ណសញ្ជាតិខ្មែរ និងផ្សព្វផ្សាយសេចក្តីណែនាំលេខ ០១៥ ស.ណ.ន របស់ក្រសួងមហាផ្ទៃ អត្តសញ្ញាណប័ណ្ណជាតិខ្មែរលោកឧត្តមសេនីយ៍ទោ អ៊ុក កុសល ស្នងការនគរបាលខេត្តកំពង់ធំ បានស្នើឲ្យមន្ត្រីជំនាញអត្តសញ្ញាណកម្មចុះធ្វើអត្តសញ្ញាណប័ណ្ណនិងបំរើសេវាជូនប្រជាពលរដ្ឋឲ្យដល់មូលដ្ឋានដោយមានការអញ្ចើញចូលរួមពីស្នងការរងនគរបាល ប្រធាន អនុប្រធានការិយាល័យ និងនាយប៉ុស្តិ៍ទាំង ៨១ ឃុំ នាព្រឹកថ្ងៃទី២៦ ខែសីហា ឆ្នាំ២០១៩ ។
លោកឧត្តមសេនីយ៍ទោ អ៊ុក កុសល បានលើកឡើងថា មន្ត្រីជំនាញពាក់ព័ន្ធទាំងអស់ត្រូវជំរុញឲ្យប្រជាពលរដ្ឋមកធ្វើអត្តសញ្ញាណប័ណ្ណ សៀវភៅស្នាក់នៅ និងសំបុត្រកំណើតឱ្យបានគ្រប់ៗគ្នា និងឲ្យបងប្អូនស្គាល់ពីរបៀបប្រើប្រាស់អត្តសញ្ញាណប័ណ្ណ សៀវភៅគ្រួសារ និងវិធីថែរក្សាឲ្យបានល្អ ដើម្បីគាត់ប្រើប្រាស់ឲ្យអស់លទ្ធភាព។ ពេលបាត់បង់ឬខូចមិនអាចប្រើប្រាស់បាន ត្រូវមករាយការណ៍នៅប៉ុស្តិ៍ឲ្យបានទាន់ពេលវេលា។ បញ្ហាកែទម្រង់លើឯកសារផ្សេងៗរាយការណ៍មក ប៉ុស្តិ៍នគរបាលនៅជិតមូលដ្ឋានរបស់ពួកគាត់ ។
លោកបានលើកឡើងបញ្ហាបច្ចេកទេសតែងតែកើតមានឡើង ពេលខ្លះថាអត្តសញ្ញាណប័ណ្ណខុសភេទ ខុសអាយុ ខុសឈ្មោះ និងឯកសារផ្សេងៗដែលពាក់ព័ន្ធ។ ពេលមានបញ្ហា មន្ត្រីជំនាញត្រូវពន្យល់ណែនាំដល់ពួកឲ្យគាត់ច្បាស់លាស់ពីការរាំងស្ទះនៃការធ្វើអត្តសញ្ញាណប័ណ្ណ ការធ្វើសំបុត្រកំណើត ភាគច្រើនសម្រាប់ពួកគាត់មិនសូវមកធ្វើសំបុត្រកំណើត ដោយសារផ្ទះគាត់នៅឆ្ងាយ។ ពេលធ្វើអត្តសញ្ញាណប័ណ្ណ និងសៀវភៅគ្រួសារ បានហើយ សូមមន្ត្រីជំនាញទាំងអស់ចុះប្រគល់ជូនដល់ផ្ទះរបស់ពួកគាត់ ជាពិសេស សម្រាប់អ្នកធ្វើចំណាកស្រុក ពេលគាត់ត្រឡប់មកពីស្រុកគេវិញនាបុណ្យចូលឆ្នាំ និងបុណ្យភ្ជុំ សូមមន្ត្រីជំនាញទាំងអស់ចុះផ្សព្វផ្សាយពីសារៈប្រយោជន៍នៃការធ្វើអត្តសញ្ញាណប័ណ្ណ សៀវភៅគ្រួសារ និងសំបុត្រកំណើតឲ្យបានឆាប់រហ័ស និងចុះធ្វើជូនពួកគាត់ដល់ទីកន្លែង ដែលពួកគាត់កំពុងរស់នៅតាមមូលដ្ឋានជនបទនានា។
លោកឧត្តមសេនីយ៍ទោ អ៊ុក កុសល បានបញ្ជាក់ថាសូមឲ្យមន្ត្រីជំនាញស្ថិតិយកចិត្តទុកដាក់ទៅលើគោលការណ៍របស់ថ្នាក់លើ ហើយត្រូវត្រួតពិនិត្យដើម្បីធ្វើការងារបន្តទៀត។ ជាមួយគ្នានេះដែរ ត្រូវត្រៀមកម្លាំងជានិច្ចសម្រាប់អនុវត្តការងារដែលថ្នាក់លើដាក់ឱ្យអនុវត្តដោយមានឆន្ទះច្បាស់លាស់ ត្រូវចុះជួយដល់ប្រជាពលរដ្ឋនៅតាមមូលដ្ឋានដែលគាត់មានបញ្ហាផ្សេងៗ មានការទទួលខុសត្រូវខ្ពស់របស់នាយប៉ុស្តិ៍នគរបាល។
លោកឧត្តមសេនីយ៍ទោ អ៊ុក កុសល បានផ្តាំផ្ញើដល់នាយប៉ុស្តិ៍រនគរបាលទាំងអស់ត្រូវចេះសាមគ្គីភាពគ្នា ចេះពង្រឹងដល់ក្រុមការងាររបស់ខ្លួន ត្រូវដោះស្រាយរាល់ទុក្ខកង្វល់របស់ប្រជាពលរដ្ឋ ដែលពួកគាត់កំពុងតែជួបប្រទះ មន្ត្រីទាំងអស់ត្រូវ អំណត់ ព្យាយាម អត់ធ្មត់ និងពន្យល់ដល់ប្រជាពលរដ្ឋដែលគាត់មានបញ្ហាលើប្រការណាមួយ ដើម្បីឲ្យប្រជាពលរដ្ឋទាំងអស់គាត់មានទំនុកចិត្តនិងជឿជាក់ទៅលើក្រុមមន្ត្រីជំនាញក្នុងការធ្វើ អត្តសញ្ញាណប័ណ្ណ សៀវភៅគ្រួសារ និងសំបុត្រកំណើត ៕ដោយ តេច ឆេង
