ខេត្តកំពង់ធំ ៖ នៅព្រឹកថ្ងៃទី២៣ ខែសីហា ឆ្នាំ២០១៩ ស្ថិតនៅឃុំសូយោង ស្រុកតាំងគោក ខេត្តកំពង់ធំ លោកឧត្តមសេនីយ៍ត្រីមេបញ្ជាការកងរាជអាវុធហត្ថខេត្តកំពង់ធំ អញ្ជើញចូលរួមជាធិបតីក្នុងពិធីប្រកាសចូលកាន់ដំណែងនិងដំឡើងថាន្ទរៈស័ក្តលោក គៀន គឿន ប្រធានស្នាក់ការ៦០៣ មកជាមេបញ្ជាការកងរាជអាវុធហត្ថស្រុកតាំងគោកថ្មី ។ អញ្ជើញចូលរួមមានលោក ប៊ុន ឈួន ប្រធានក្រុមប្រឹក្សាស្រុក លោក ហាក់ ម៉ុងហួត អភិបាលស្រុក និងកងកម្លាំងប្រដាប់អាវុធ មន្រ្តីរាជការ ប្រមាណជាង៤០០នាក់។
ថ្លែងក្នុងពិធីចូលកាន់ដំណែង លោកឧត្តមសេនីយ៍ត្រី ហង្ស ថុល បានមានប្រសាសន៍ថា ត្រូវពង្រឹងនិងការពារសន្តិសុខជូនប្រជាពលរដ្ឋ និងចូលរួមទប់ស្កាត់ការបំផ្លាញធនធានធម្មជាតិនិងព្រៃលិចទឹក ព្រៃរនៀម ក្នុងតំបន់ហាមឃាត់ រក្សាព្រៃលិចទឹកជាជម្រកត្រីពងកូន។ ត្រូវបំពេញការងារក្នុងការគ្រប់គ្រង់អង្គភាពអាវុធហត្ថស្រុកចំនួន១៤នាក់ និងទំនួលខុសត្រូវនិងមានសិទ្ធសម្រេចក្នុងនាមខ្លួនជាមេ។
ថ្នាក់លើមានការអាធ្យាស្រ័យថ្នាក់ក្រោមពេលណាដែលមានបញ្ហាជាយថាហេតុ មិនត្រូវឃាត់ឡានយកលុយ ត្រូវធ្វើការអប់រំអ្នកខុស លើកស្ទួយណែនាំលើកទឹកចិត្ត។ ធ្វើអ្វីមួយអោយបានត្រឹមត្រូវមានចរឹកមហាជន ជួយដល់ពលរដ្ឋក្រីក្រនិងមិនទន់ជ្រាយ កុំអោយគេវាយតម្លៃនិងធ្វើឬកច្រង៉េងច្រងាង នាំអោយគេស្អប់ដល់ថ្នាក់ដឹកនាំរបស់ខ្លួន ក្លាយខ្លួនជាអ្នកដឹកនាំល្អ អនុក្រិតលេខ៧៧ មាត្រាដែលបានចែង។ ឯកសណ្ឋានអោយបានត្រឹមត្រូវនិងបង្កើតស្នាក់ការនៅគិរីអណ្តែតនិងទីតាំងថ្មី និងនៅស្នាក់ការ៦០៣បណ្តោះអាសន្ន ក្នុងនាមនគរបាលយុត្តិធម៌ត្រូវគោរពច្បាប់និងស្មោះត្រង់ជូនប្រជាពលរដ្ឋក្នុងស្រុក៕ដោយ តេច ឆេង
