សន្និសីទអន្តរជាតិ លើកទី១ស្តីពី « លើកកម្ពស់គុណតម្លៃប្រពៃណី និងបេតិកភណ្ឌ ដើម្បីការអភិវឌ្ឍន៍ទេសចរណ៍ប្រកបដោយចិរភាព » បានដំណើរការពេញ១ថ្ងៃ គឺនៅថ្ងៃទី២១ ខែសីហា ឆ្នាំ២០១៩ ដោយមានការចូលរួមពីតំណាងមន្ត្រីជាន់ខ្ពស់ ពីអង្គការទេសចរណ៍ពិភពលោក (UNWTO) អង្គការ UNESCO ក្រសួង-ស្ថាប័នជាតិ រដ្ឋបាលថ្នាក់ក្រោមជាតិ សមត្ថកិច្ចពាក់ព័ន្ធ វាគ្មិនជាតិ-អន្តរជាតិ អ្នកស្រាវជ្រាវ អង្គការជាតិ-អន្តរជាតិ ដៃគូរអភិវឌ្ឍន៍ សាកលវិទ្យាល័យ និងសាលាបណ្តុះបណ្តាលវិជ្ជាជីវៈផ្នែកឯកជន សិស្ស-និស្សិត សរុបប្រមាណជាង ៦០០នាក់ ដែលមានលោកបណ្ឌិតរដ្ឋមន្ត្រី ក្រសួងទេសចរណ៍ បានធ្វើជាអធិបតីក្នុងពិធីបើកសន្នីសីទអន្តរជាតិនេះផងដែរ ។ ប៉ុន្តែអ្វីដែលកត់សម្គាល់ សន្និសិទក៏នឹងស្នើទៅរាជរដ្ឋាភិបាលកម្ពុជាពិនិត្យលទ្ធភាពក្នុងការដាក់ម្ហូបនិងបង្អែមខ្មែរមួយចំនួនទៅក្នុងបញ្ជីបេតិកភណ្ឌអរូបីយរបស់អង្គការយូណេស្កូ UNESCO ។
លោក ថោង ខុន រដ្ឋមន្ត្រីក្រសួងទេសចរណ៍បានថ្លែងនូវការស្វាគមន៍និងគាំទ្រចំពោះ ការស្នើដាក់បញ្ចូលម្ហូបអាហារខ្មែរ៥មុខ រួមទាំងបង្អែមខ្មែរ៥មុខ ក្នុងបញ្ជីបេតិកភណ្ឌអរូបីយ របស់អង្គការយូណេស្កូ ដែលបានស្នើដោយអង្គសន្និសិទអន្តរជាតិ ។ ប៉ុន្តែលោកថា តាមដឹងនៅមានម្ហូបអាហារបង្អែមខ្មែរច្រើនមុខទៀតដែលនឹងត្រូវស្នើទៅយូណេស្កូផងដែរ ។
លោករដ្ឋមន្ត្រីបានបញ្ជាក់ថា ដូចជាបបរស្ករផ្លែត្នោតខ្ចី ចេកខ្ទឹះ ជាដើមសុទ្ធសឹងជាបង្អែមដែលខ្មែរយើងធ្វើមានរស់ជាតិឈ្ងុយឆ្ងាញ់ណាស់ហើយពេញនិយមថែមទៀត ។ ដូច្នេះគប្បីក្រសួងទេសចរណ៍បន្តសហការជាមួយស្ថាប័នពាក់ព័ន្ធអាជ្ញាធរមូលដ្ឋាន ស្រាវជ្រាវរកឲ្យឃើញមុខម្ហូបអាហារនិងបង្អែមខ្មែរច្រើនទៀត ដើម្បីស្នើដាក់បញ្ជូល ក្នុងបញ្ជីបេតិកភ័ណ្ឌអរូបីយរបស់អង្គការយូណេស្កូបន្ថែមទៀត ៕
