រាជធានីភ្នំពេញ ៖ នៅទីក្រុងហាឡុង ខេត្តខ្វាងនិញ ប្រទេសវៀតណាម នៅពេលចូលរួមសន្និសីទលើកទី៧ នៃគណៈកម្មការកិច្ចការបរទេស សភាកម្ពុជា ឡាវ និង វៀតណាម (CLV) ចាប់ពីថ្ងៃទី១៧ ដល់ថ្ងៃទី១៨ ខែសីហា ឆ្នាំ២០១៩ ភាគីកម្ពុជាបានបដិសេធសំណើរភាគីវៀតណាម ដែលសុំឲ្យរាជរដ្ឋាភិបាលកម្ពុជា ផ្តល់សញ្ជាតិស្របច្បាប់ ដល់ប្រជាជនរបស់ខ្លួន ដែលកំពុងរស់នៅនិងធ្វើការនៅកម្ពុជា ។
តំណាងឲ្យរដ្ឋសភាកម្ពុជា លោក ឈាង វុន បានថ្លែងប្រាប់ក្រុមអ្នកសារព័ត៌មាន ពេលមកដល់មាតុភូមិវិញថា ក្នុងកិច្ចប្រជុំប្រកបដោយភាពតានតឹងនេះ រដ្ឋាភិបាលនៃប្រទេសវៀតណាម ជាថ្មីម្តងទៀត បានបន្តស្នើសុំឲ្យរាជរដ្ឋាភិបាលកម្ពុជា ធ្វើយ៉ាងណាផ្តល់សញ្ជាតិស្របច្បាប់ដល់ប្រជាជនខ្លួន ដែលកំពុងរស់នៅនិងធ្វើការរកស៊ីនៅកម្ពុជា ប៉ុន្តែលោកបដិសេធ ព្រោះកម្ពុជាមានច្បាប់របស់ខ្លួន។
លោក ឈាង វុន បានពន្យល់ថា កម្ពុជា មានច្បាប់របស់ខ្លួន ហើយច្បាប់ជាច្រើនទាំងអស់នោះរួមមាន ទាំងច្បាប់សញ្ជាតិច្បាប់អន្តោប្រវេសន៍។ ដូច្នេះ កម្ពុជា មិនអាចផ្ដល់សញ្ជាតិដោយស្វ័យប្រវត្តិដល់ប្រជាជនវៀតណាមទាំងអស់ ដែលកំពុងរស់នៅក្នុងប្រទេសកម្ពុជាបានទេ។
លោក ឈាង វុន បានសង្កត់ធ្ងន់ថា រឿងទឹកដី ឬសញ្ជាតិ គឺជាចំណុចរសើប បើភាគីណាមួយហ៊ានលះបង់នូវចំណុចទាំងអស់នេះ វានឹងត្រូវបានគេវាយប្រហារថា ជាមនុស្សក្បត់ជាតិ។ ដូច្នេះ រដ្ឋាភិបាលកម្ពុជា ដឹកនាំដោយសម្តេចតេជោ ហ៊ុន សែន ជានាយករដ្ឋមន្ត្រី មានជំហរច្បាស់លាស់ក្នុងការការពារបូរណភាពទឹកដី ពោលគឺមិនឲ្យបាត់បង់ទឹកដីមួយចំណិត ដល់ប្រទេសណាមួយនោះឡើយ៕
