ខេត្តកំពត ៖ តាមពត័មានរាយការណ៍ថា មានគ្រោះថ្នាក់ចរាចរណ៍មួយបានកើតឡើង កាលពីវេលាម៉ោង៣ទាបភ្លឺ ថ្ងៃទី១៩ ខែសីហា ឆ្នាំ២០១៩ នៅត្រង់ចំណុចចន្លោះ បង្គោលគីឡូម៉ែត្រលេខ៤ និងលេខ៥ លើផ្លូវជាតិលេខ៣៣ ស្ថិតក្នុងភូមិត្រពាំងធំ ឃុំជុំគ្រៀល ស្រុកទឹកឈូ ខេត្តកំពត បណ្តាលឲ្យមន្ត្រីនគរបាលអន្តោប្រវេសន៍៤នាក់ស្លាប់ ខណៈដែលម្នាក់ទៀតរងរបួសស្រាល ។
សមត្ថកិច្ចបញ្ជាក់ថា រថយន្ដរបស់មន្ដ្រីនគរបាល ម៉ាក Highlander ពណ៌ស្ករ ពាក់ស្លាកលេខភ្នំពេញ2Z-0241 ។ ចំណែករថយន្ដសណ្ដោងរម៉កដឹកស៊ីម៉ង់ គ្មានភ្លើងបំភ្លឺ ពាក់ស្លាកលេខព្រះសីហនុ3A-1861។ សមត្ថកិច្ចមូលដ្ឋានបានឲ្យដឹងថា ករណីគ្រោះថ្នាក់ចរាចរណ៍ខាងលើនេះ បណ្តាលមកពីរថយន្តមន្ត្រីនគរបាលបុករថយន្តសណ្តោងរឺម៉កដឹកស៊ីម៉ង់ពីក្រោយពេញទំហឹង ។
មន្ត្រីនគរបាលដែលស្លាប់ចំនួន៤នាក់រួមមាន ទី១ ៖ ឈ្មោះ ងួន សារ៉ាត់ អាយុ៣៤ឆ្នាំ មុខរបរបម្រើការងារនៅព្រែកចាក (អ្នកបើកបរ) ស្លាប់ពេលបញ្ជូនទៅមន្ទីរពេទ្យ ទី២ ៖ ឈ្មោះ ញឹប ភីរក្ស ឋានន្ដរស័ក្ដិ វរសេនីយ៍ឯក ទី៣ ៖ ឈ្មោះ តាន់ ផេង អាយុ៣៧ឆ្នាំ ឋានន្ដរស័ក្ដិ វរសេនីយទោ ទី៤ ៖ ឈ្មោះ ឃី ឡុក អាយុ៤០ឆ្នាំ ឋានន្ដរស័ក្ដិ វរសេនីយទោ អ្នកទាំងបីស្លាប់នៅក្នុងរថយន្ដតែម្ដង ។ ចំណែកមន្ត្រីនគរបាលដែលរងរបួសឈ្មោះ ថៃ វីរ អាយុ៣៥ឆ្នាំ ឋានន្ដរស័ក្ដិ អនុសេនីយ៍ឯក ត្រូវបានបញ្ជូនទៅសង្គ្រោះនៅមន្ទីរពេទ្យបង្អែកខេត្តកំពត ៕
