រាជធានីភ្នំពេញ ៖ យោងតាមបណ្តាញពត័មានបានឲ្យដឹងថា នៅព្រឹកថ្ងៃទី ១៥ ខែសីហា ឆ្នាំ២០១៩ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ បានផ្តល់ថវិកាឧបត្ថម្ភ៣លានរៀល ជូនដល់ ក្រុមគ្រួសារ លោកអនុសេនីយ៍ឯក ហួត មុនីពិសាខ នាយរងផ្នែកអន្តរាគមន៍ នៃការិយាល័យនគរបាល
អន្តរាគមន៍ និងតម្រួតបទបញ្ជា ដែលត្រូវបានភ្លើងឆាបឆេះ រោលរាលពេញខ្លួនប្រាណ ខណៈពេលលោកកំពុងចុះជួយអន្តរាគមន៍ បញ្ចៀសប្រជាពលរដ្ឋចេញពីកន្លែងកើតហេតុផ្ទុះធុងហ្គាស នាថ្ងៃទី ១៤ ខែសីហា ឆ្នាំ ២០១៩ វេលាម៉ោង ១៣.១៥នាទី នៅចំណុចក្រុមទី ១១
ភូមិបន្ទាយចាស់ សង្កាត់ស្លក្រាម ក្រុងសៀមរាប ខេត្តសៀមរាប។ ព្រមទាំងបានផ្ដាំផ្ញើសាកសួរសុខទុក្ខពីថ្នាក់ដឹកនាំ អគ្គស្នងការដ្ឋាននគរបាលជាតិ និងចាត់ទុកថា នេះជាការលះបង់របស់មន្ដ្រីនគរបាលគំរូម្នាក់ ក្នុងការជួយសង្គ្រោះប្រជាពលរដ្ឋដោយមិនខ្លាចគ្រោះថ្នាក់ដល់ខ្លួនឯងនោះឡើយ ព្រមទាំងជូនពរ ដល់មន្ដ្រីនគរបាលដែលរងគ្រោះថ្នាក់ ឆាប់ជាសះស្បើយ និងមានសុខភាពល្អ ដើម្បីបន្ដការងារបម្រើជាតិ មាតុភូមិ និងប្រជាពលរដ្ឋ។
ឯកឧត្តមនាយឧត្តមសេនីយ៍សន្តិបណ្ឌិត នេត សាវឿន ឧបត្ថម្ភថវិកា៣លានរៀល និងចាត់ទុកជាមន្ដ្រីនគរបាលគំរូម្នាក់ ដែលលះបង់ក្នុងការជួយសង្គ្រោះប្រជាពលរដ្ឋដោយមិនខ្លាចគ្រោះថ្នាក់។
