ខេត្តកំពង់ធំ ៖ នៅព្រឹកថ្ងៃអង្គារ ទី ១៣ ខែសីហាឆ្នាំ ២០១៩ ឯកឧត្តម សុខ លូ អភិបាលខេត្តកំពង់ធំបានអញ្ជើញជាគណៈអធិបតីក្នុងជំនួបពិភាក្សាចងសម្ព័ន្ធមេត្រីភាព រវាងខេត្តកំពង់ធំ ជាមួយរដ្ឋបាលទីក្រុងផានចូវ ប្រទេសចិន ដើម្បីផ្លាស់ប្ដូរកិច្ចសហប្រតិបត្តិការទៅលើគម្រោងវិនិយោគនៅក្នុងខេត្តកំពង់ធំ ដោយមានការអញ្ជើញចូលរួមពី ប្រធានមន្ទីរជុំវិញខេត្ត និងគណប្រតិភូ មកពីទីក្រុងផានចូវ។
ឯកឧត្តម សុខ លូ អភិបាលខេត្តកំពង់ធំបានថ្លែងនៅក្នុងឱកាសនោះថា ខេត្តកំពង់ធំគឺជាខេត្តមួយ ដែលស្ថិតនៅចំណុចកណ្ដាលនៃប្រទេសកម្ពុជា ក្នុងនោះដែរមានផ្ទៃដីដាំដំណាំ ដូចជា ស្វាយចន្ទី កៅស៊ូ ស្រូវ ដំឡូង និងដំណាំឧស្សាហកម្មផ្សេងៗទៀត នឹងមានប្រាសាទសំបូរព្រៃគុក នឹងតំបន់ទេសចរណ៍ជាច្រើន ដែលគួរអោយទាក់ទាញផងដែរ។ ដោយឡែកចំពោះដំណាំ ដំណាំស្វាយចន្ទីនិងកៅស៊ូ មិនទាន់មានរោងចក្រសម្រាប់កែច្នៃនៅឡើយទេ។
ឯកឧត្តម សុខ លូ ក៏បានបន្តថា នេះជាការបោះជំហានទៅមុខរបស់រដ្ឋបាលខេត្តកំពង់ធំ ក្នុងការចាប់ដៃចងសម្ព័ន្ធមេត្រីភាព លើកិច្ចសហប្រតិបត្តិការជាមួយទីក្រុងដ៏ធំរបស់មិត្តចិន ក្នុងគោលបំណងដើម្បីពង្រឹង និងពង្រីកចំណងមិត្តភាព និងកិច្ចសហប្រតិបត្តិការ លើការអភិវឌ្ឍខេត្ត ឱ្យកាន់តែវិវឌ្ឍន៍រីកចម្រើនស្របតាមគោលនយោបាយ នៃកិច្ចសហប្រតិបត្តិការគ្រប់ជ្រុងជ្រោយ របស់រាជរដ្ឋាភិបាលកម្ពុជា ដឹកនាំដោយសម្តេចតេជោហ៊ុន សែន។
ក្នុងឱកាសនោះផងដែរ លោក លី លីងប៊ូ អភិបាលក្រុងផានចូវ ខេត្តគួយចូវ បានថ្លែងអំណរគុណដល់ភាគីកម្ពុជាដែលបានទទួលស្វាគមន៍ ហើយបានលើកឡើងថា ភាគីទាំងពីរនឹងបង្កើនទំនាក់ទំនង កិច្ចសហប្រតិបត្តិការទៅវិញទៅមកយ៉ាងស៊ីជម្រៅ បន្ទាប់ពីចុះហត្ថលេខាលើអនុស្សារណៈយោគយល់គ្នា នៅពេលវេលាសមស្រប នាពេលខាងមុខនេះ។
សូមបញ្ជាក់ថា សេចក្ដីសង្ខេបកិច្ចប្រជុំ ដែលភាគីទាំង២បានចុះហត្ថលេខា បានពិភាក្សាអំពីអត្ថប្រយោជន៍បំពេញបន្ថែម និងទំហំសក្តានុពលសម្រាប់កិច្ចសហប្រតិបត្តិការ រវាងទីក្រុងផានចូវ និង ខេត្តកំពង់ធំ លើផ្នែកកិច្ចសហប្រតិបត្តិការទេសចរណ៍ និងការធ្វើពាណិជ្ជកម្មផលិតផលកសិកម្ម។ ភាគីទាំងពីរបានឯកភាពគ្នា បន្តធ្វើការផ្លាស់ប្តូរ និងកិច្ចសហប្រតិបត្តិការកាន់តែស៊ីជម្រៅ លើកកម្ពស់ការផ្លាស់ប្តូរគណៈប្រតិភូ រវាងទីក្រុងផានចូវ និងខេត្តកំពង់ធំ ដោយមិនមានកំណត់ និងផ្តល់ការគាំទ្រ និងជំនួយដល់ដំណើរទស្សនកិច្ច ធុរកិច្ចគ្នាទាំងសងខាង ការចរចាពាណិជ្ជកម្ម កិច្ចសហប្រតិបត្តិការសេដ្ឋកិច្ច ការតាំងពិព័រណ៍ និងសកម្មភាពសេដ្ឋកិច្ច និងពាណិជ្ជកម្មដទៃទៀត៕ដោយ តេច ឆេង
