ខេត្តបន្ទាយមានជ័យ ៖ ឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ ព្រមទាំងលោកជំទាវ ជ័យ ណារី អ៊ុំរាត្រី បានអញ្ជើញជាអធិបតីក្នុងពិធីពិសាសាច់ជ្រូកសុវត្ថិភាព ដែលធ្វើឡើងនៅមុខផ្សារចំការគ (ផ្សារថ្មី) ក្រុងសិរីសោភ័ណ ដើម្បីធ្វើការបញ្ជាក់ឱ្យកាន់តែច្បាស់ថា ជំងឺប៉េស្តជ្រូកអាហ្វ្រិក មិនមាននៅក្នុងខេត្តបន្ទាយមានជ័យទេ នៅព្រឹកថ្ងៃទី១៣ ខែសីហា ឆ្នាំ២០១៩ នេះ។
ឯកឧត្តម អ៊ុំ រាត្រី បានមានប្រសាសន៍នៅក្នុងពិធីនោះថា តាមការបញ្ជាក់យ៉ាងច្បាស់របស់លោកប្រធានមន្ទីរកសិកម្មខេត្ត ដែលមានការិយាល័យបសុពេទ្យ និងក្រុមការងារពាក់ព័ន្ធ បានចុះត្រួតពិនិត្យទាំងកន្លែងចិញ្ចឹម និងសត្វឃាតដ្ឋានទាំងអស់ នៅក្នុងខេត្ត បានបញ្ជាក់ថា សាច់ជ្រូក និងសត្វជ្រូកនៅក្នុងខេត្ត ពិតជាមានសុវត្ថិភាពពិតប្រាកដមែន និងគ្មានជំងឺប៉េស្តជ្រូកអាហ្វ្រិកនោះទេ។ឯកឧត្តម ក៏បានអំពាវនាវឱ្យប្រជាពលរដ្ឋទាំងអស់ និងថ្នាក់ដឹកនាំមន្ទីរអង្គភាព មន្ត្រីរាជការ ពិសាសាច់ជ្រូកទាំងអស់គ្នា៕
