ខេត្តស្ទឹងត្រែង ៖ កាលពីព្រឹកថ្ងៃទី១១ សីហា ២០១៩ អភិបាលខេត្តស្ទឹងត្រែង អមដំណើរដោយមន្ទីរអង្គភាព កងកម្លាំងប្រដាប់អាវុធក្នុងខេត្ត បាននាំយកពូជគ្រាប់ត្នោតចំនួន៣ម៉ឺនទៅដាំនៅតាមខ្សែបន្ទាត់ព្រំដែនកម្ពុជា-ឡាវ នៅចំនុចបង្គោលព្រំដែនលេខ០៤០ និង០៤២។
ឯកឧត្តម ម៉ុម សារឿន អភិបាលខេត្តស្ទឹងត្រែង បានមានប្រសាសន៍ថា សកម្មភាពដាំដើមត្នោតនាពេលនេះ
គឺជាសកម្មភាពប្រវត្តិសាស្រ្តរបស់ខេត្តស្ទឹងត្រែង ក្នុងការបង្ហាញពីវប្បធម៌ដ៏ផូរផង់របស់ជាតិ និងការថែរក្សាអត្តសញ្ញាណនៃដួងប្រលឹងជាតិ ក៏ដូចជាក្នុងការការពារអធិបតេយ្យភាពជាតិ និងបំផុសផ្នត់គំនិតឲ្យក្មេងជំនាន់ក្រោយៗទៀត ឲ្យចេះស្រលាញ់នូវអ្វីដែលជាអត្តសញ្ញាណជាតិ និងដួងព្រលឹងរបស់ជាតិខ្មែរយើង។ ដើមត្នោតជារុក្ខជាតិដែលផ្តល់នូវគុណសម្បត្តិយ៉ាងច្រើនដល់ប្រជាជនខ្មែរ តាំងពីសម័យបុរាណកាលមក តំណាងឲ្យអត្តសញ្ញាណជាតិខ្មែរ និងជាដួងប្រលឹងជាតិ ដែលប្រជាជនខ្មែរ បានសំគាល់នូវទឹកដីរបស់ខ្លួន ពីបុរាណកាលរហូតមកដល់បច្ចុប្បន្ននេះ។
ប្រធានមន្ទីរអភិវឌ្ឍន៍ជនបទបានឲ្យដឹងថា ការដាំដើមត្នោតនេះ គឺជាលើកទី២ហើយ ដែលមន្ទីរអភិវឌ្ឍន៍ជនបទ បានសហការជាមួយរដ្ឋបាលខេត្ត និងមន្ទីរជាច្រើនទៀត រួមគ្នារៀបចំពិធីនេះឡើង ដោយយកគ្រាប់ត្នោតចំនួន៣ម៉ឺនគ្រាប់ ទៅដាំនៅតាមបណ្តោយខ្សែរក្រវ៉ាតព្រំដែន កម្ពុជា-ឡាវ ស្ថិតនៅត្រង់ចំនុចបង្គោលព្រំដែនលេខ០៤០ និង០៤២ ក្នុងភូមិសាស្ត្រនៃស្រុកបូរីអូរស្វាយសែនជ័យ និងស្រុកសៀមប៉ាង ខេត្តស្ទឹងត្រែង ៕
