ខេត្តកំពង់ធំ ៖ ថ្ងៃទី៧ ខែសីហា ឆ្នាំ ២០១៩ ពិធីប្រកាសចូលកាន់មុខតំណែងប្រធានកសិកម្មរុក្ខាប្រមាញ់និងនេសាទខេត្តកំពង់ធំ ក្រោមអធិបតីភាពឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ឯកឧត្តម សុខ លូ អភិបាលខេត្តកំពង់ធំ និងឯកឧត្តម ឈុន ឈន់ ប្រធានក្រុមប្រឹក្សាខេត្តកំពង់ធំ។ដោយមានការអញ្ជើញចូលរួមពី ឯកឧត្តម លោកជំទាវ លោក លោកស្រី ប្រធាន អនុប្រធានមន្ទីរជុំវិញខេត្ត អភិបាលក្រុង/ស្រុក និងកងកំលាំងទាំង៣ប្រភេទ ប្រមាណជាង ២១៥ នាក់។
ឯកឧត្តម វេង សាខុន បានថ្លែងក្នុងកម្មវិធីនេះ គឺសូមឲ្យថ្នាក់ដឹកនាំថ្មីនេះត្រូវចេះធ្វើការសហការគ្នាយោគយល់គ្នាទៅវិញទៅមក ដើម្បីឲ្យមន្ទីរទទួលបានភាពជោគជ័យ។ វិស័យកសិកម្មជាគន្លឹះសម្រាប់ឲ្យប្រជាពលរដ្ឋមានការរីកចម្រើន ត្រូវមានការផ្លាស់ប្ដូរពីមួយខែទៅមួយខែ។ ចុះផ្សព្វផ្សាយពីបច្ចេកវិទ្យាថ្មីៗ ដល់ប្រជាពលរដ្ឋពីបច្ចេកទេសដាំដុះនៅតាមមូលដ្ឋាន។ ប្រធានមន្ទីរត្រូវខិតខំប្រឹងប្រែងទៅលើហេដ្ឋារចនាសម្ព័ន្ធផងដែរ សម្រាប់ឲ្យប្រជាពលរដ្ឋដឹកជញ្ជូនផលិតផលឬដំណាំផ្សេងៗដោយសុវត្ថិភាព ត្រូវរៀបចំប្រព័ន្ធចរន្តអគ្គិសនី សម្រាប់បូមទឹកដាក់ដំណាំរបស់ពួកគាត់។ ប្រជាពលរដ្ឋមួយចំនួនមិនទាន់យល់ច្បាស់ពីការចិញ្ចឹមត្រី និងសត្វ ព្រោះប្រទេសកម្ពុជាមិនទាន់មានបច្ចេកទេសហើយថវិកាពុំសូវសំបូរធៀបទៅនឹងប្រទេសជិតខាង។ ចំពោះបទល្មើសផ្សេងៗ ពិសេសបទល្មើសព្រៃឈើ សូមឱ្យចុះបង្ក្រាបជាបន្ទាន់ដល់ជនល្មើសដែលកំពុងតែដឹកជញ្ជូន។ បញ្ហាជលផលត្រូវមានវិធានការទប់ស្កាត់ឲ្យទាន់ពេលវេលា នេះជារដូវត្រីពង ចំពោះព្រៃលិចទឹកចុះបង្ក្រាបនិងមានវិធានការព្រោះវាជាធនធានធម្មជាតិហើយជាជម្រករបស់ត្រីនៅរដូវវស្សានិងបង្កើតក្រុមចម្រុះចុះការពារបន្ថែមទៀតនៅតាមមូលដ្ឋាន។
ជាចុងក្រោយ ឯកឧត្តមបានផ្តាំផ្ញើសូមឲ្យមន្ត្រីទាំងអស់ត្រូវចេះស្រលាញ់ដើមឈើ ព្រោះដើមឈើស្ថិតនៅក្នុងវិស័យកសិកម្ម ត្រូវផ្លាស់ប្ដូរនូវអត្តចរិតក្នុងការងារសម្ដែងនូវភាពស្មោះត្រង់។ថ្នាក់ដឹកនាំនិងមន្ត្រីទាំងអស់ត្រូវពង្រីកបន្ថែមនូវការដាំដើមឈើទាំងនៅទីក្រុងទាំងនៅជនបទ ដើម្បីឲ្យមានសោភ័ណភាពស្រស់បំព្រងសម្រាប់ទុកឲ្យក្មេងជំនាន់ក្រោយចេះថែរក្សាព្រៃឈើអោយបានគង់វង្ស ៕ដោយ តេច ឆេង
