បាត់ដំបង ៖ កម្លាំងអាវុធហត្ថការិយាល័យស្រាវជ្រាវបទល្មើស ខេត្តបញ្ជូនបុរសម្នាក់ចាប់រំលោភ នារីម៉ាស្សា មិនបានសម្រេច ទៅតុលាការ នៅរសៀលថ្ងៃទី៥ ខែធ្នូ ឆ្នាំ២០១៤ ចាត់ការតាមនិតិវិធី ។
ហេតុការណ៍ចាប់រំលោភប្រព្រឹត្តកាលពីម៉ោង៩ ព្រឹកថ្ងៃទី០៤ ខែធ្នូ ឆ្នាំ២០១៤ នៅក្លឹបម៉ាស្សាជ័យជំនះ ស្ថិតក្នុងភូមិកម្មករ សង្កាត់ស្វាយប៉ោ ក្រុង-ខេត្តបាត់ដំបង ។
លោក ឡាច ប្រុស នាយអាវុធហត្ថការិយាល័យស្រាវជ្រាវបទល្មើស សុ ណាល់ នាយរងការិយាល័យប្រឆាំងគ្រឿងញៀនខេត្តបានឲ្យដឹងថា បុរសសង្ស័យ ដែលឃាត់ខ្លួនមានឈ្មោះ សុខ ឌឿន ហៅលីហ្វុង អាយុ៣៤ឆ្នាំ ជនជាតិវៀតណាមរស់នៅ ភូមិ១៣មករា សង្កាត់ព្រែកព្រះស្តេច ក្រុង-ខេត្តបាត់ដំបង ។ ចំណែកស្ត្រីរងគ្រោះមានឈ្មោះ ឈិន ស្រីឡាញ់ ហៅអាយួន អាយុ២១ឆ្នាំ របរជាអ្នកម៉ាស្សា នៅក្លឹបជ័យជំនះ រស់នៅ ភូមិអន្លង់ស្វាយ ឃុំតាគ្រាម ស្រុកបាណន់ ខេត្តបាត់ដំបង ។
ស្ត្រីរងគ្រោះមានឈ្មោះ ឈិន ស្រីឡាញ់ ហៅអាយួន បានប្រាប់សមត្ថកិច្ចថា នៅព្រឹកថ្ងៃកើតហេតុជនសង្ស័យ បានទៅម៉ាស្សានៅកន្លែងកើតហេតុពេលចូលបន្ទប់ម៉ាស្សាខ្លួនបានបិទភ្លើង និងវាំងននភ្លាមនោះ ស្រាប់តែជនសង្ស័យ បានចាប់ឱបថើប និងសើយអាវចាប់ច្របាច់សុដន់ទាំងសងខាង និងចាប់សម្រាតខោ ហើយរំលោភតែនាងរើបំរាស់គេចខ្លួនចេញទៅក្រៅហៅសន្តិសុខទាន់ពេលវេលា ។
ជនសង្ស័យបានសារភាពដូចការចោទប្រកាន់របស់នារីរងគ្រោះ។
លោក ឡាច ប្រុស បានបញ្ជាក់ថា បច្ចុប្បន្នបុរសជនជាតិវៀតណាម សង្ស័យបានកសាងសំណុំរឿងបញ្ជូនទៅតុលាការ នៅរសៀលថ្ងៃទី៥ ខែធ្នូ ឆ្នាំ២០១៤ ចាត់ការតាមនិតិវិធី ៕
