ខេត្តពោធិ៍សាត់ ៖ ប្រតិបត្តិការធ្វើឡើងនៅវេលាម៉ោង១១៖៤៨នាទី នៅថ្ងៃទី០១ ខែសីហា ឆ្នាំ២០១៩ នៅចំណុចភូមិអូរស្តៅ សង្កាត់ស្វាយអាត់ ក្រុងពោធិ៍សាត់ ខេត្តពោធិ៍សាត់ ដោយកម្លាំងនគរបាលបានសហការចុះបង្ក្រាបនិងចាប់វ៉ៃខ្នោះមេក្លោងជួញដូរគ្រឿងញៀន៣នាក់និងបានដកហូតសារធាតុញៀនជាង៣គីឡូក្រាម ។
តាមសមត្ថកិច្ចនគរបាលបានឲ្យដឹងថា មេក្លោងជួញដូរគ្រឿងញៀន ១៖ ឈ្មោះ ឡាច មុន្នី ភេទប្រុស អាយុ២៨ឆ្នាំ រស់នៅភូមិបាក់រទេះ សង្កាត់ព្រៃញី ក្រុងពោធិ៍សាត់ ខេត្តពោធិ៍សាត់។ ២៖ ឈ្មោះ ជា ហូស៊ីម ភេទប្រុស អាយុ២៣ឆ្នាំ រស់នៅភូមិបាក់រទេះ សង្កាត់ព្រៃញី ក្រុងពោធិ៍សាត់ ខេត្តពោធិ៍សាត់។ ៣ ៖ ឈ្មោះ អ៊ឹម ឆៃលី ភេទស្រី អាយុ៤៩ឆ្នាំ រស់នៅភូមិអន្លង់ហាប ឃុំកោះជុំ ស្រុកកណ្តៀង ខេត្តពោធិ៍សាត់។
ក្រោយពីសមត្ថកិច្ចចាប់ឃាត់ខ្លួនជនសង្ស័យទាំង៣នាក់នេះ សមត្ថកិច្ចបានរកឃើញវត្ថុតាងរួមមាន៖ គ្រឿងញៀន ICE០៣ដុំ ទម្ងន់(៣០៨២ក្រាម) រថយន្ត០១គ្រឿង ជញ្ជីង០១ កាបូបដៃ០១ កាបូបស្ពាយ០១ កាតគ្រីរថយន្ត០៤សន្លឹក, អត្តសញ្ញាណបណ្ណ០២សន្លឹក ថង់ច្រកមួយចំនួន ស្លាកលេខរថយន្ត 2D-8572 (០២សន្លឹក) ខ្សែក០១ខ្សែ, ចិញ្ចៀន០១វង់ ទូរស័ព្ទដៃ០១គ្រឿង លុយខ្មែរ៨៦ម៉ឺនរៀល និងស្បោងព័ណ៌ខៀវ០១ ៕
