រាជធានីភ្នំពេញ ៖ លោក ផៃ ស៊ីផាន អ្នកនាំពាក្យរដ្ឋាភិបាលកម្ពុជា បានថ្លែងនូវការអរគុណចំពោះរដ្ឋមន្ត្រីការបរទេសអាមេរិក ដែលបង្ហាញនូវការស្វាគមន៍ ចំពោះការបដិសេធរបស់កម្ពុជាទៅនឹងព័ត៌មាន ដែលថា កម្ពុជាបានចុះកិច្ចព្រមព្រៀងសំងាត់ឲ្យចិនដាក់មូលដ្ឋានទ័ពក្នុងខេត្តព្រះសីហនុ ។ លោកក៏បានចាត់ទុកការស្វាគមន៍របស់លោក MiKe Pompeo រដ្ឋមន្ត្រីការបរទេសអាមេរិក ថាជាការផ្តល់យុត្តិធម៌ដល់រដ្ឋាភិបាលកម្ពុជា។
លោក ផៃ ស៊ីផាន អ្នកនាំពាក្យរដ្ឋាភិបាលកម្ពុជាបានសរសេរនៅលើទំព័រហ្វេសប៊ុករបស់លោកនៅថ្ងៃសុក្រនេះ។ លោកបានបន្ថែមថា រាជរដ្ឋាភិបាលកម្ពុជា ដែលដឹកនាំដោយសម្តេចនាយករដ្ឋមន្ត្រី ហ៊ុន សែន គឺតែងតែខិតខំប្រឹងប្រែងគ្រប់បែបយ៉ាង ដើម្បីរក្សាមិត្ត មិនជ្រៀតជ្រែកកិច្ចការផ្ទៃក្នុង និងជាដៃគូសហការគ្រប់វិស័យជាមួយនឹងប្រជាជាតិទាំងអស់នៅលើពិភពលោក ដោយមិនរើសអើង។
លោក MiKe Pompeo រដ្ឋមន្ត្រីការបរទេសអាមេរិកបានប្រកាសស្វាគមន៍នូវការបដិសេធរបស់រដ្ឋាភិបាលចំពោះព័ត៌មានដែលថា កម្ពុជានឹងអនុញ្ញាតឱ្យចិនដាក់មូលដ្ឋានទ័ពលើទឹកដីរបស់ខ្លួន។ លោក MiKe Pompeo លើកឡើងដូច្នេះនៅក្រោយជំនួបថ្នាក់រដ្ឋមន្ត្រីការបរទសអាស៊ាន-អាមេរិកលើកទី៥២ ដែលបានធ្វើឡើងនៅក្នុងទីក្រុងបាងកក ប្រទេសថៃ កាលពីថ្ងៃព្រហស្បតិ៍។
លោករដ្ឋមន្ត្រីការបរទេសអាមេរិក បានគូសបញ្ជាក់ថា សហរដ្ឋអាមេរិកស្វាគមន៍ការការពារអធិបតេយ្យភាពដ៏ខ្លាំងក្លារបស់កម្ពុជា ហើយអាមេរិកក៏លើកទឹកចិត្តដល់ប្រទេសផ្សេងទៀតក្នុងតំបន់ឲ្យធ្វើតាមលំនាំរបស់កម្ពុជាផងដែរ ៕
មាសសុទ្ធមិនខ្លាចភ្លើង កម្ពុជា អរគុណ រដ្ឋមន្ត្រីការបរទេសអាមេរិក ដែលផ្តល់យុត្តិធម៌ ដល់កម្ពុជា
Filed in: ព័ត៌មានជាតិ
