ខេត្តសៀមរាប ៖ ទំនងជាសមត្ថកិច្ចនិងមន្ត្រីជលផលពាក់ព័ន្ធមួយចំនួនត្រូវថ្នាំសណ្តំអស់ហើយមើលទៅទើបធ្វើមិនដឹង កូនត្រីឆ្តោរាប់ម៉ឺនក្បាលដែលឈ្មួញដុះស្លែធំម្នាក់ទើបនឹងចាប់មកចិញ្ចឹមឡើងវិញ នៅគ្រាដែលសមត្ថកិច្ចចំរុះធ្លាប់បានហាមឃាត់ជាច្រើនដង ប៉ុន្តែករណីនេះគេនៅតែសង្កេតឃើញ មានសកម្មភាពធំធេងលើសដើម ។
ទីតាំងស្រះចិញ្ចឹមកូនត្រីឆ្តោដ៏ធំសម្បើមនេះមាន
ចំនួន៦ស្រះ មានទំហំដីប្រមាណជា៥ហិចតាដែលជាកម្មសិទ្ធរបស់ឈ្មួញសំបូរខ្លាញ់ម្នាក់ឈ្មោះ ង្វៀង យ៉ាំងវ៉ើក ជាជនជាតិវៀតណាម មានទីលំនៅភូមិថ្មី សង្កាត់ស្វាយដង្គំ ក្រុងសៀមរាប។ និងមួយកន្លែងទៀតនៅក្នុងភូមិខ្នា សង្កាត់ជ្រាវ ដែលជាទីតាំងទើបនិងចិញ្ចឹមបានរយៈពេល៥ខែប៉ុណ្ណោះ តែគេពុំឃើញសមត្ថកិច្ចឬមន្ត្រីជំនាញណាម្នាក់មកហាមឃាត់ ឡើយ។
ក្រុមអ្នកចិញ្ចឹមត្រីឆ្ដោ បាននាំគ្នាសំរុកប្រមូល ទិញត្រីពីការនេសាទ រាប់សិបតោនក្នុង១ថ្ងៃៗសំរាប់ផ្គត់ផ្គង់ដល់កូនត្រីឆ្ដោរបស់គេឲ្យឆាប់ធំធាត់ ដើម្បីប្រមូលផលបើទោះជាមានការបង់ លុយកាក់យ៉ាង សន្ធឹកសន្ធាប់អស់ មួយចំនួនជូនថ្នាក់លើយ៉ាងណាក៏ដោយ ក៏ការចិញ្ចឹមត្រីនេះមិនបង់ខាតនោះទេព្រោះករណីចិញ្ចឹមត្រីមិនត្រូវបាន សមត្ថកិច្ចណាម្នាក់ចុះ បង្ក្រាបឬចាប់ឡើយដោយគ្រាន់តែឲ្យជាកាដូធំមួយឲ្យពួកគេក៏ត្រឡប់ទៅវិញបាត់អស់ ។
ប្រភពមួយផ្សេងទៀតបានឲ្យដឹងថាគេតែងតែនិយមចិញ្ចឹមត្រីឆ្ដោដែលទទួលបានផលច្រើន គឺនៅសង្កាត់ចុងឃ្នៀស ក្រុងសៀមរាបនិងឃុំកំពង់ឃ្លាំងក្នុងស្រុកសូទ្រិគម ឃុំអន្លង់សំណរ ក្នុងស្រុកជីក្រែងគេចិញ្ចឹមដាក់បែរ ឬដាក់ក្រោមផ្ទះ បណ្ដែតទឹក ។ ចំណែកនៅសង្កាត់សៀមរាបនិងសង្កាត់ស្វាយដង្គំគេចិញ្ចឹមតាមរបៀបជីកស្រះធំៗដាក់កូនត្រីរាប់សិបម៉ឺនក្បាល ដោយយកត្រី ជាចំណី ដល់កូនត្រីឆ្តោឲ្យឆាប់ធំធាត់ ដើម្បីឆាប់បានលក់នៅទីផ្សារ ។
ប្រភពពីប្រជាពលរដ្ឋដែលធ្លាប់ចិញ្ចឹមត្រីនោះបាននិយាយថាសំរាប់ពួកគាត់ក្រីក្រមិនអាចមានលទ្ធភាពចិញ្ចឹមត្រីឆ្ដោបានទេ ព្រោះអីណាមួយរកលុយសំរាប់ទិញចំនីត្រី ហើយរកលុយបង់ឲ្យសមត្ថកិច្ចមិនទាន់ ទើបមិនអាចប្រកបរបរនេះបាន បើមិនដូច្នេះទេប្រាកដជាត្រូវ គេចាប់ចងអស់ជាមិនខាន ។ ចំណែកក្រុមអ្នកចិញ្ចឹមត្រីឆ្ដោខ្នាតធំៗនៅក្នុងខេត្តសៀមរាបភាគច្រើនជាជនជាតិវៀតណាម ដែលមកប្រកបរបរនេះជាយូរឆ្នាំណាស់មកហើយ។
ទាក់ទិនទៅនឹងករណីខាងលើនេះដែរ នាយខ័ណ្ឌរដ្ឋបាលជលផលខេត្តសៀមរាប លោក ព្រិន្ទសាវិន មិនអាចទាក់ទងសុំការពន្យល់ពីលោកបានទេនៅរសៀលថ្ងៃទី០៧ខែធ្នូនេះ ដោយទូរស័ព្ទនៅក្រៅតំបន់សេវា ។ ចំណែកលោក សូ ប្លាតុង អភិបាលក្រុងស្តីបានមានប្រសាសន៍ប្រាប់អ្នកកាសែត នៅថ្ងៃទី០៧ ខែធ្នូនេះថា ករណីដែលឈ្មួញចិញ្ចឹមត្រីឆ្តោនៅសង្កាត់ចុងឃ្លៀស និងសង្កាត់ស្វាយដង្គំ និងសង្កាត់ជ្រាវខាងលើនេះ លោកនិងសហការជាមួយជំនាញជលផលដើម្បីធ្វើការចុះទៅត្រួតពិនិត្យជាក់ស្តែង។លោកបន្តទៀតថា បើករណីនេះមានដូចពលរដ្ឋរាយកាណ៍មែន លោកនិងធ្វើរបាយការណ៍ជូនទៅលោកអភិបាលខេត្តដើម្បីសុំចំណាត់ការបន្ត។
កម្លាំងជំនាញរបស់លោក និងបន្តផ្សព្វផ្សាយពីផ្លូវច្បាប់ឲ្យបានដឹងបន្ថែមទៀត រីឯការបង្ក្រាបយ៉ាងណានោះគឺរង់ចាំថ្នាក់លើជាអ្នកបញ្ជាមកប៉ុណ្ណោះ។
ផ្ទុយទៅវិញ បើសង្កេតមើលនៅឯខេត្តសៀមរាបវិញបទបញ្ជារបស់ប្រមុខរាជរដ្ឋាភិបាល
កម្ពុជាមិនត្រូវបានមន្ដ្រីពាក់ព័ន្ធមួយចំនួនយកមកអនុវត្តនោះទេជាក់ស្ដែងស្រះចិញ្ចឹមត្រីដុះស្លែនៅសង្កាត់ស្វាយដង្គំត្រូវបានក្រុមឈ្មួញនាំគ្នាចិញ្ចឹមត្រីឆ្ដោយ៉ាងរំភើយជារៀងរាល់ឆ្នាំ ។
សូមរំលឹកផងដែរថា ការបង្កើតគណៈកម្មាការទប់ស្កាត់បទល្មើសនេសាទនៅខេត្តសៀមរាប ទៅតាមបទបញ្ជារបស់ប្រមុខរាជរដ្ឋាភិបាលដែលធ្វើឡើងដោយមានការចូលរួមពីសំណាក់ជំនាញជលផល,បរិស្ថាន,ប៉ូលិស,ប៉េអឹម,អាជ្ញាធរភូមិ ,ឃុំ ,ស្រុក ,ក្រោមការដឹកនាំផ្ទាល់របស់លោកអភិបាលខេត្ត ដើម្បីចុះអនុវត្តន៍ទប់ស្កាត់បទល្មើសនេសាទឲ្យកាន់តែប្រសើរឡើង ដើម្បីឲ្យផលត្រីកើតមានច្រើនជាងឆ្នាំមុនទៅទៀត ប៉ុន្តែនៅតែមានជនឆ្លៀតឪកាសទៅទទួលសំណូកពីបទល្មើសនេសាទធ្វើឲ្យពួកឈ្មួញរឹតតែបន្តធ្វើសកម្មភាពបទល្មើសនេសាទកាន់តែខ្លាំងក្លាៗឡើងក្នុងខេត្តសៀមរាប ៕
