ខេត្តកំពង់ឆ្នាំង ៖ លោក សុខ ផល្លី និពន្ធនាយកមជ្ឈមណ្ឌលពត៌មានថ្ងៃនេះ បានទទួលរងនូវជម្ងឺមហារីកច្រមុះយ៉ាងធ្ងន់ធ្ងរ ដែលធ្វើអោយភ្នែកទាំងគូរងងឹតមើលពុំឃើញគួរអោយអាសូរ បច្ចុប្បន្នត្រូវបានគ្រួសារបញ្ជូន មកព្យាបាលជាបន្ទាន់នៅផ្នែកជម្ងឺមហារីក នៅមន្ទីរពេទ្យ មិត្តភាពខ្មែរ-សូវៀត ។
អ្នកស្រី ហាន សុភា ភរិយាលោក សុខ ផល្លី បានឲ្យដឹងថា បច្ចុប្បន្នជម្ងឺមហារីកច្រមុះរបស់លោក សុខ ផល្លី ឈានដល់តំណាក់កាលចុងក្រោយ មានសភាពធ្ងន់ធ្ងរណាស់ អ្នកស្រី និងគ្រួសារដែលមានជីវភាពក្រីក្រ ពុំមានលទ្ធភាពគ្រប់គ្រាន់ក្នុងការចំណាយទៅលើសេវាការព្យាបាលនោះឡើយ។
ចំណែកលោក សុខ សុវណ្ណ ប្រធានមជ្ឈមណ្ឌលពត៌មានថ្ងៃនេះ និងជាប្រធានក្រុមប្រឹក្សាសារពត៌មានកម្ពុជា បានអោយដឹងថា លោក សុខ ផល្លី គឺជាអ្នកសារពត៌មានសកម្មក្នុងការងារ ប្រកបដោយវិជ្ជាជីវៈល្អ ក្នុង នាមនិពន្ធនាយកមជ្ឈមណ្ឌលពត៌មានថ្ងៃនេះ លោកបានចុះផ្សាយនូវពត៌មានពិតជូនទៅអាជ្ញាធរ និង ប្រជាពលរដ្ឋ រួមគ្នាអភិវឌ្ឍន៍មូលដ្ឋានជាបន្តបន្ទាប់ ។ តែជាអកុសល ជម្ងឺមហារីកច្រមុះដែលជាជម្ងឺកាចសាហាវ បានមក ញាំញីរាងកាយលោករហូតបណ្តាលអោយពិការភ្នែកថែមទៀតផង។
លោក សុខ សុវណ្ណ បានអំពាវនាវសុំអោយមិត្តអ្នកសារពត៌មានទាំងអស់ មេត្តាចូលរួមជួយឧបត្ថម្ភ ជួយដល់លោក សុខ ផល្លី ដែលកំពុងខ្វះខាតថវិកាយ៉ាងខ្លាំងក្នុងការព្យាបាលជម្ងឺដ៏កាចសាហាវនេះ។
ចំណែកភរិយាលោក សុខ ផល្លី ក៏បានលើកម្រាមដៃដប់សំពះសុំជួយឧបត្ថម្ភពីសប្បុរសជននានា ជាពិសេសសុំការសន្តោសពីឯកឧត្តម រដ្ឋមន្រ្តីក្រសួងពត៌មាន សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា សម្តេចគតិព្រឹទ្ធបណ្ឌិត ប៊ុនរ៉ានី ហ៊ុន សែន ប្រធានកាកបាទក្រហមកម្ពុជា មេត្តាជួយ ឧបត្ថម្ភដល់គ្រួសារអ្នកស្រី ដែលកំពុងមានការខ្វះខាតយ៉ាងខ្លាំងក្នុងការព្យាបាលប្តីរបស់អ្នកស្រី។
អ្នកស្រីក៏បានថ្លែងអំណរគុណដ៏ជ្រាលជ្រៅចំពោះលោកគ្រូពេទ្យមន្ទីរពេទ្យមិត្តភាពខ្មែរ-សូវៀត ដែល បានយកចិត្តទុកដាក់ព្យាបាលប្តីរបស់អ្នកស្រី។ ទូរស័ព្ទអ្នកស្រី ហាន សុភា ៖ 088 371 5555 / 098 68 49 74
