ខេត្តសៀមរាប ៖ ពលរដ្ឋរស់នៅសងខាងផ្លូវកណ្តាលក្រុងសៀមរាបបានរិះគន់ទៅលើអាជ្ញាធរមូលដ្ឋានទាំងពីសង្កាត់ និងមន្ត្រីពាក់ព័ន្ធមួយចំនួនថា ផ្លូវមួយខ្សែដែលបានប្រមូលលុយពីប្រជាពលរដ្ឋនៅសងខាងផ្លូវ៥០+៥០ក្លាយទៅជាផ្លូវចាក់បេតុង បច្ចុប្បន្នត្រូវបានក្រុមហ៊ុនធ្វើសិប្បកម្មកែឆ្នៃឈើបង្ហូរទឹកស្អុយមកលើផ្លូវសាធារណៈ ជារៀងរាល់ថ្ងៃ ព្រមទាំងស្មៅដុះចង់ជិតផ្លូវទៅវិញ ទើបធ្វើឲ្យពលរដ្ឋជិះម៉ូតូកាត់លើផ្លូវនេះបានសម្តែងការព្រួយបារម្មណ៍ក្រែងថ្ងៃក្រោយក្លាយទៅជាផ្លូវគ្មានមនុស្សដើរ តើឲ្យពលរដ្ឋទុកចិត្តអាជ្ញាធរមូលដ្ឋាននិងមន្ត្រីជំនាញម្ត៉េចបានបើផ្លូវមួយខ្សែនេះធ្វើមិនកើតផងនោះ? ។
ពួកគាត់បានសម្តែងការសោកស្តាយផ្លូវមួយខ្សែចាក់បេតុងហើយត្រូវបានសិប្បកម្មឈើដែលបង្ហូរទឹកស្អុយមកលើចំណីផ្លូវសាធារណៈមួយកន្លែងចែកជាពីរភូមិ៖ ភូមិតាវៀន សង្កាត់សាលាកំរើក និង ភូមិដកពោធិ សង្កាត់ស្លក្រាម ក្រុងសៀមរាបដែលធ្វើការប្រចាំគ្នាទៅវិញទៅមកតាំងពីទឹកមិនទាន់ហូរកាត់រហូតដល់បច្ចុប្បន្ននេះហើយនៅតែមិនឃើញអាជ្ញាធរមកអើតមើលម្តងណាសោះ បានត្រឹមតែដឹងឮប៉ុណ្ណោះ។
ប្រភពបានប្រាប់ថា ពីមុនផ្លូវនេះជាផ្លូវដីក្រហមទេ ស្តិតនៅក្នុងភូមិតាវៀនតែមកដល់បច្ចុប្បន្នត្រូវបានចែកជាពីរគឺភូមិតាវៀន សង្កាត់សាលាកំរើក និង ភូមិដកពោធិសង្កាត់ស្លក្រាមដោយអាជ្ញាធរបានប្រជុំគ្នា ព្រោះបានធ្វើផ្លូវចាក់ប៊ីតុងនេះរួចរាល់ជាស្ថាបពរហើយ ។ ក្រោយធ្វើរួច គេ មិនដែលឃើញថ្នាក់ដឹកនាំសង្កាត់មកមើល ឬបញ្ជាឲ្យថ្នាក់ក្រោមចុះពិនិត្យកន្លែងសិប្បកម្មឈើ ឬកាយលូ និងមើលលូណាបាក់ដោយសារមូលហេតុអ្វីនោះទេ ។ មកដល់បច្ចប្បន្ននេះ លុះត្រាប្រជាពលរដ្ឋទៅប្រាប់ពួកគាត់ក៏ដោយ ។
មេភូមិតាវៀនបានប្រាប់ថា រឿងផ្លូវចាក់បេតុងមួយខ្សែនេះគាត់បានដឹង តែគាត់បានចុះទៅ ពិនិត្យហើយដោយសារផ្ទះមួយចំនួនមិនទាន់បានដាក់លូ ទើបវាបណ្តាលឲ្យស្ទះលូហូរទឹកស្អុយមកពីសិប្បកម្មឈើនៅក្នុងដីឡូនោះ ទើបបណ្តាលឲ្យហូរមកកាត់លើផ្លូវសាធារណៈវិញ។លោកបន្តថា មកដល់បច្ចប្បន្ននេះលោកបានដើរ ប្រាប់តាមផ្ទះដែលពួក គេមិនទាន់បានដាក់លូ ។
លោក ខៀវ សត ចៅសង្កាត់ស្លក្រាមបានតាមប្រាប់ទូរស័ព្ទ ថា រឿងផ្លូវចាក់បេតុងមួយខ្សែនេះ គឺខាងសង្កាត់សាលាកំរើកជាអ្នកចាត់ចែងទេមិនមែនជារឿងរបស់លោកឡើយ តែលោកក៏បានដឹកបញ្ហានេះដែរ។ចំណែកលោក សាមឡន ចៅសង្កាត់សាលាកំរើក ក៏បានប្រាប់នៅ ព្រឹកថ្ងៃទី០៣ខែធ្នូនេះថា ផ្លូវចាក់បេតុងមួយខ្សែនេះលោកបានដឹងហើយ ដោយសារពលរដ្ឋមួយចំនួនដែលលោកហៅមកប្រជុំពីរលើកនេះ ពួកគាត់ខ្លះបាននិយាយនៅក្នុងអង្គប្រជុំថា ពួកគាត់មិនទាន់មានលុយដាក់លូទេ ដូច្នេះទើបបណ្តាលឲ្យទឹកស្អុយហូរចេញពីក្នុងសិប្បកម្មឈើនោះកាត់តាមផ្លូវសាធារណៈជារៀងរាល់ថ្ងៃព្រោះកន្លែងដែលទឹកហូរកាត់លើផ្លូវនោះដោយសារលូបាក់ ទើបធ្វើឲ្យស្ទះទឹក។
គួរបញ្ជាក់ផងដែរថា ផ្លូវចាក់បេតុងមួយខ្សែនេះគឺនៅខាងក្រោយផ្សារលើ ដែលអាជ្ញា
ធរបានយកលុយពីពលរដ្ឋ50+50 យកទៅធ្វើរហូតដល់ទល់នឹងផ្លូវលោកតាខៀវណឺយ តែនៅសល់ប្រហែល១០០ម៉ែត្រទៀតបែជាអាជ្ញាធរផ្អាក ដោយសារខ្លាចអំណាចម្ចាស់ដីឡូមួយដែលមានខ្នងធំ ។
ចំណែកលោក ភួង លីណា ស្តីទីបរិស្ថានខេត្តបានមានប្រសាសន៍តាមទូរស័ព្ទនៅរសៀលថ្ងៃទី៣ខែធ្នូឆ្នាំ២០១៤នេះថា ក្រោយពីទទួលបានព័ត៌មានរួមមក លោកនឹងឲ្យកម្លាំងក្រោមឱវាទចុះទៅពិនិត្យកន្លែងសិប្បកម្មឈើនោះដែលបានបង្ហូរទឹកស្អុយមកលើចំណីផ្លូវសាធារណៈ ដូចពលរដ្ឋរាយការណ៍មែន។លោកបន្តទៀតថា ប្រសិនសិប្បកម្មឈើនោះបង្ហូរទឹកស្អុយដែលចំរាញ់ចេញពីឈើនោះមកលើចំណីផ្លូវមែន លោកនិងឲ្យកម្លាំងជំនាញធ្វើការពន្យល់ឲ្យគាត់រៀបចំលូដាក់ឲ្យបានត្រឹមត្រូវ ៕
