ខេត្តកំពង់ធំ ៖ ឯកឧត្តម សុខ លូ បានជំរុញដល់អាជ្ញាធរក្រុង ស្រុក និងមន្ត្រីជំនាញពាក់ព័ន្ធទាំងអស់ត្រូ វនាំគ្នាពន្លត់ភ្លើង កុំនាំគ្នាអង្គុយបក់ផ្សែង ឯកឧត្តមបានថ្លែងយ៉ាងដូច្នេះនៅក្នុងកិច្ចប្រជុំប្រចាំខែគណៈបញ្ជាការរដ្ឋបាលឯកភាព ថ្ងៃទី ២២ ខែកក្កដា ឆ្នាំ២០១៩។ ដោយមានការអញ្ជើញចូលរួមពីអភិបាលរងខេត្ត ប្រធានមន្ទីរអង្គភាពជុំវិញខេត្ត អាជ្ញាធរក្រុងស្រុក និងមន្ត្រីជំនាញពាក់ព័ន្ធប្រមាណជិត១០០ នាក់ ។
ក្រោយពីបានលើកឡើងអំពីបញ្ហាប្រឈមមួយចំនួនទាក់ទងទៅនឹងបទល្មើស ក៏ដូចជាបញ្ហាប្រឈមក្នុងការអនុវត្តកន្លងមក ឯកឧត្តមបានលើកឡើងថារាល់បទល្មើសទាំងឡាយដែលបានកើតឡើងនៅក្នុងខេត្តកំពង់ធំយើងទាំងអស់គ្នាត្រូវចូលរួមទប់ស្កាត់និងបង្ក្រាបជាបន្ទាន់ ជាពិសេសត្រូវត្រួតពិនិត្យលើសិប្បកម្មទាំងអស់ឲ្យបានច្បាស់លាស់ដែលនៅក្បែរតំបន់អភិរក្ស អាជ្ញាធរក្រុង ស្រុក ត្រូវចុះបង្ក្រាបជាប្រចាំរាល់បទល្មើសដែលបានកើតឡើងជាក់ស្ដែងនៅក្នុងមូលដ្ឋានរបស់ខ្លួន ត្រូវនាំគ្នាពន្លត់ភ្លើង កុំនាំគ្នាអង្គុយបក់ផ្សែង ត្រូវគ្រប់គ្រងព្រៃក្នុងតំបន់របស់ខ្លួនឲ្យបានល្អ ជាពិសេសព្រៃ សហគមន៍ ត្រូវមានការត្រួតពិនិត្យឲ្យបានម៉ឺងម៉ាត់ដោយមានគណៈកម្មការចុះតាមដានព្រៃនៅតំបន់នោះជាប្រចាំ ដោយឡែកមន្ត្រីណាដែលពាក់ព័ន្ធទៅនឹងបទល្មើស ត្រូវដកខ្លួនជាបន្ទាន់ដើម្បីកុំឲ្យមានទោសទណ្ឌទៅតាមផ្លូវច្បាប់។ ឯកឧត្តមបានបន្តថា រាល់ការចាប់បទល្មើស បើសិនមានអ្នកខលមកអន្តរាគមន៍ ត្រូវកត់ត្រាទុកដើម្បីធ្វើការស្រាវជ្រាវវែកមុខអ្នកដែលចូលមកអន្តរាគមន៍នៅរឿងបទល្មើសផ្សេងៗ ដើម្បីឱ្យស្របទៅនឹងគោលការណ៍របស់សម្ដេច ដែលបានលើកឡើងនូវអភិក្រមទាំង៥ ចូលរួមកែលម្អរររាល់កំហុសនិងវះកាត់មន្ត្រីណាដែលពាក់ព័ន្ធទៅនឹងបទល្មើស ដោយផ្ដោតសំខាន់យកច្បាប់ជាធំ។
ជាចុងក្រោយ ឯកឧត្តម បានជំរុញឱ្យមន្ត្រីទាំងអស់ត្រូវយកចិត្តទុកដាក់បង្ក្រាបរាល់បទល្មើសដែលកើតមាននៅក្នុងភូមិសាស្ត្រខេត្តកំពង់ធំមានដូចជាបទល្មើសព្រៃឈើ បទល្មើសនេសាទ បញ្ហាគ្រឿងញៀន និងការទប់ស្កាត់នូវការគ្រោះថ្នាក់ចរាចរណ៍ជាដើម ៕
