ខេត្តព្រះសីហនុ ៖ លោក ហ៊ុន សុខា ប្រធានក្លិបអ្នកកាសែតឯករាជ្យ និងលោក កែវ រតនា ដែលបានចុះទៅយកពត័មានបញ្ហាដីធ្លីនៅខេត្តព្រះសីហនុ ត្រូវបានតុលាការខេត្តព្រះសីហនុ ដោះលែង ឱ្យនៅក្រៅឃុំជាបណ្តោះអាសន្ន នៅល្ងាចថ្ងៃទី២៣ ខែកក្កដា ឆ្នាំ២០១៩នេះ ខណៈពលរដ្ឋ៥នាក់ទៀត ដែលពាក់ព័ន្ធនឹងករណីនេះ ត្រូវតុលាការឃុំខ្លួនជាបណ្តោះអាសន្ន។ នេះបើតាមមេបញ្ជាការអាវុធហត្ថខេត្តព្រះសីហនុ ឧត្តមសេនីយ៍ត្រី ហេង ប៊ុនទី ដែលបានបញ្ជាក់ប្រាប់អង្គភាពព័ត៌មានក្នុងស្រុក។
សូមរំលឹកថា លោក ហ៊ុន សុខា ប្រធានក្លិបអ្នកកាសែតឯករាជ្យ និងលោក កែវ រតនា ចាងហ្វាងកាសែត TN និងពលរដ្ឋ៥នាក់ខាងលើនេះ ត្រូវបានកម្លាំងអាវុធហត្ថខេត្តព្រះសីហនុ ឃាត់ខ្លួននារសៀលថ្ងៃទី១៩ ខែកក្កដា ឆ្នាំ២០១៩ ពាក់ព័ន្ធទៅនឹងបទល្មើសហិង្សាលើអ្នកកាន់កាប់អចលនវត្ថុ ដោយសុច្ចរិត នៅក្នុងខេត្តព្រះសីហនុ។
តុលាការបានដាក់លោក ហ៊ុន សុខា និងលោក កែវ រតនា ឱ្យស្ថិតនៅក្រោមការត្រួតពិនិត្យតាមផ្លូវតុលាការ។ ចំណែកពលរដ្ឋទាំង៥នាក់ត្រូវបានឃុំខ្លួននៅឡើយ ។
ការចាប់ខ្លួនអ្នកសារពត័មានទាំងពីររូបក្លាយទៅជាប្រធានបទដែលសង្គមអ្នកកាសែតជាតិកំពុងតាមដានយ៉ាងយកចិត្តទុកដាក់បំផុត៕
លោក ហ៊ុន សុខា ប្រធានក្លិប អ្នកកាសែតឯករាជ្យ និងលោក កែវ រតនា ត្រូវបាន តុលាការខេត្តព្រះសីហនុ អនុញ្ញាត្តឱ្យនៅក្រៅឃុំ ជាបណ្តោះអាសន្ន
Filed in: ព័ត៌មានជាតិ
