ខេត្តកំពង់ធំ ៖ មន្ទីរបរិស្ថានខេត្តកំពង់ធំព្រមទាំងរដ្ឋបាលស្រុកប្រាសាទបល្ល័ង្ក បានរៀបចំទិវាដាំកូនឈើ ក្រោមធិបតីភាពអធិបតីភាពឯកឧត្ដម សៅ សុភាព រដ្ឋលេខាធិការក្រសួងបរិស្ថាន និងឯកឧត្តម ចាន់ តារា អភិបាលរងខេត្តកំពង់ធំ និងលោក តុក កក្កដា ប្រធានមន្ទីរបរិស្ថានខេត្តកំពង់ធំ លោក វណ្ណៈ សោភានិត អភិបាលស្រុកប្រាសាទបល្ល័ង្ក ដោយមានការចូលរួមសហការជាមួយសហគមន៍ការពារព្រៃឈើនិងធនធានធម្មជាតិ នៅឃុំសាលាវិស័យ ស្រុកប្រាសាទបល្ល័ង្ក ខេត្តកំពង់ធំ ព្រមទាំងអ្នកពាក់ព័ន្ធនិងប្រជាពលរដ្ឋប្រមាណ២០០នាក់ នៅថ្ងៃ២១ ខែកក្កដា ឆ្នាំ២០១៩ ។
លោក តុក កក្កដា ប្រធានមន្ទីរបរិស្ថានខេត្តកំពង់ធំ បានធ្វើសេចក្ដីរាយការណ៍ ការដាំកូនឈើមានចំនួន៥០០០ ដើមក្នុងផ្ទៃដី ២០ ហិកតា ក្នុងនោះមានកូនគ្រញូង កូនបេង កូននាងនួន កូនធ្នុង កូនត្រសេក និងកូនព្រីង រួមទាំងកូនឈើច្រើនប្រភេទ ដែលដាំក្នុងសហគមន៍ជាំម្រេច ស្ថិតនៅភូមិតាឡែកចាស់ ឃុំសាលាវិស័យ ស្រុកប្រាសាទបល្ល័ង្គ ខេត្តកំពង់ធំ។
ឆ្លៀតក្នុងឱកាសនោះដែរ ឯកឧត្តម សៅ សុភាព បានមានប្រសាសន៍ថាទិវាដាំកូនឈើនេះពិតជាមានសារៈសំខាន់
ណាស់ក្នុងបរិបទបច្ចុប្បន្ននិងដើម្បីអនាគតកូនចៅយើងជំនាន់ក្រោយៗទៀតព្រោះ ជាទិវាស្ដានឹងធ្វើឲ្យស្ថេរភាពនូវធន
ធានធម្មជាតិពិសេសគឺព្រៃឈើដែលបច្ចុប្បន្នកំពុងរងនូវការហិនហោចនឹងបាត់បង់ម្ដងបន្តិចម្ដងបន្តិចនិងទន្ទ្រានដោយ
ខុសច្បាប់ពីសំណាក់ជនខិលខូចមួយចំនួន។ អ្វីដែលសំខាន់ទិវានេះនឹងរួមចំណែកដល់ការបណ្ដុះស្មារតីស្រលាញ់ថែ
រក្សាការពារព្រៃឈើដ៏មានតម្លៃក្នុងថែរក្សាតុល្យភាពធាតុអាកាសសម្រាប់ទ្រទ្រង់ជីវិតរបស់មនុស្សសត្វ ជីវៈចម្រុះ មិន
តែប៉ុណ្ណោះព្រៃឈើកាត់បន្ថយភាពងាយរងគ្រោះដែលបណ្ដាលមកពីផលប៉ះពាល់នៃការប្រែប្រួលអាកាសធាតុ សំដៅសម្រេចបាននូវការធ្វើឲ្យប្រសើរឡើងនូវសន្តិសុខស្បៀងរបស់សហគមន៍មូលដ្ឋាន។ ជាងនេះទៅទៀត ទិវាក្នុងថ្ងៃនេះមន្ទីរបរិស្ថានខេត្តកំពង់ធំបានសហការគ្នាយ៉ាងល្អក្នុងការស្ដារធនធានធម្មជាតិដែលបានសឹករីករិលក្នុងសហគមន៍មូលដ្ឋានដើម្បីធានាបាននូវនិរន្តរភាពក្នុងការចិញ្ចឹមជីវិតនិងការរស់នៅប្រកបដោយផាសុខភាព ស្របតាមទស្សនៈវិស័យនិងគោលនយោបាយរបស់ក្រសួងបរិស្ថាននិងរាជរដ្ឋាភិបាលកម្ពុជាក្រុមការដឹកនាំដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
ឯកឧត្តមក៏បានបញ្ជាក់ថា ក្រសួងនឹងផ្ដល់កូនឈើជាច្រើនដើមទៀត ដើម្បីយកមកដាំនៅសហគមន៍ជាំម្រេចជាបន្តបន្ទាប់។ ក្នុងនោះដែរឯកឧត្តម ក៏បានលើកទឹកចិត្តដល់ប្រជាពលរដ្ឋនៅត្រូវដាំដុះបន្ថែមទៀតនៅក្នុងព្រៃសហគមន៍ ការថែទាំនិងការយកចិត្តទុកដាក់នូវកូនឈើដែលបានដាំរួច ធនធានធម្មជាតិគឺជាជីវិតរបស់ប្រជាពលរដ្ឋយើងទាំងអស់គ្នាត្រូវមានផែនការបន្តទៀតនៅក្នុងព្រៃសហគមន៍ដើម្បីកាត់បន្ថយការកាប់បំផ្លាញនិងបង្កើនការដាំដុះឡើងវិញ ក្នុងព្រៃសហគមន៍ក្នុងការការពារធនធានធម្មជាតិនិងផ្សព្វផ្សាយពីសារៈប្រយោជន៍នៃធនធានធម្មជាតិដល់សហគមន៍ដែលពោលថា”ពលរដ្ឋម្នាក់ដាំដើមឈើមួយដើម”។ ជាចុងក្រោយឯកឧត្តមសូមស្នើឲ្យប្រជាពលរដ្ឋទាំងអស់ចូលរួមការពារនិងថែរក្សាធនធានធម្មជាតិឲ្យបានគង់វង្សជារៀងរហូត។
ជាមួយគ្នានោះដែរ ប្រជាពលរដ្ឋមានការសប្បាយចិត្តនិងចូលរួមថែរក្សាធនធានធម្មជាតិនេះឲ្យបានយូរអង្វែងតទៅ ៕ តេច ឆេង
