ខេត្តបន្ទាយមានជ័យ ៖ នៅកម្ពុជា ពិសេសតំបន់ព្រំដែនទោះបីសង្រ្គាមបានបញ្ចប់ទាំងស្រុងនោះក៏ពិតមែន ប៉ុន្តែគ្រាប់មីននិងកាកសំណល់សង្រ្គាមនៅតែមានកប់រាយប៉ាយនៅក្នុងនិងលើដីក្នុងតំបន់ដែលមិនទាន់ធ្វើការបោសសំអាតរួចរាល់ ដែលជាបញ្ហាប្រឈមបង្កគ្រោះថ្នាក់ដល់អាយុជីវិតប្រជាពលរដ្ឋ។
ជាក់ស្ដែងប្រជាពលរដ្ឋបានប្រទះឃើញគ្រាប់មីនប្រឆាំងមនុស្សនិងគ្រាប់កាំភ្លើងត្បាល់សរុប១០គ្រាប់កប់ក្នុងដីចំការនៅទីតាំង២កន្លែងផ្សេងគ្នាតំបន់អតីតសមរភូមិសង្រ្គាមក្នុងស្រុកស្វាយចេក ខេត្តបន្ទាយមានជ័យ ហើយ ត្រូវបានកម្លាំងនគរបាលមូលដ្ឋានចុះទៅប្រមូលយក ដើម្បីរក្សាទុករងចាំប្រគល់ឱ្យមន្រ្តីស៊ីម៉ាកយកទៅបំផ្លាញចោលបញ្ចៀសគ្រោះថ្នាក់អាយុជីវិតប្រជាពលរដ្ឋជាយថាហេតុអាក្រក់ណាមួយកើតឡើង ៕
នៅព្រឹកថ្ងៃទី១៨ ខែកក្កដាឆ្នាំ២០១៩បានប្រទះឃើញគ្រាប់មីននិងគ្រាប់មិនទាន់ផ្ទុះនៅចំណុចដីចំការដំឡូងមីមួយកន្លែងក្នុងភូមិពន្សាយជើង ឃុំស្វាយចេក និងចំណុចដីចំការមួយកន្លែងទៀតនៅភូមិអូរវែងជើង ឃុំតាបែន ស្រុកស្វាយចេក។
វរសេនីយ៍ឯក ជា ស្លូញអធិការនគរបាលស្រុកស្វាយចេកប្រាប់ថាគ្រាប់មីននិងគ្រាប់មិនទាន់ផ្ទុះ១០គ្រាប់ខាងលើគឺគ្រាប់មីនស្គរប្រឆាំងនិងមនុស្សមាន៩គ្រាប់និងគ្រាប់កាំភ្លើងត្បាល់១គ្រាប់ប្រភេទ១៣០មីលីម៉ែត្រ។ការប្រទះឃើញគ្រាប់ទាំងនោះមានប្រជាពលរដ្ឋ ២ នាក់ទៅធ្វើដីចំការដំឡូងមីនិងធ្វើស្រែប្រទះឃើញខណៈដែលមានការដកស្មៅដំឡូងមីនិងភ្ជួររាស់ដី។
លោកអធិការបញ្ជាក់ទៀតថាគ្រាប់ទាំងនោះបានយកមករក្សាទុកកន្លែងសុវត្ថិភាពនោះហើយដើម្បីរងចាំប្រគល់ឱ្យមន្រ្តីជំនាញស៊ីម៉ាកយកទៅកំទេចចោល។
