ខេត្តមណ្ឌលគិរី ៖ តំណាងអយ្យការអមសាលាដំបូងខេត្តមណ្ឌលគិរី លោក ម៉ម វ៉ាន់ដា បានបញ្ជាឱ្យជនសង្ស័យ២នាក់តំណាងក្រុមហ៊ុន ម៉ាស្ទ័រខេសាន់ ចូលខ្លួនបំភ្លឺពាក់ព័ន្ធការប្រមូល ដឹកជញ្ជូន និងសន្និធិផល អនុផលព្រៃឈើដោយគ្មានលិខិតអនុញ្ញាត។
ជនសង្ស័យតំណាងក្រុមហ៊ុន ម៉ាស្ទ័រខេសាន់ ទាំងពីររូបដែលតំណាងអយ្យការអមសាលាដំបូងខេត្តមណ្ឌលគិរីបញ្ជាឱ្យចូលខ្លួននេះរួមមាន ៖ លោក ណេង ម៉ៅ អាយុ ៥០ឆ្នាំ តួនាទីជាអ្នកចាត់ចែងការប្រមូលឈើរបស់ក្រុមហ៊ុន «ម៉ាស្ទ័រខេសាន់» មានទីលំនៅក្នុងភូមិក្បាលស្នួល ឃុំស្នួល ស្រុកស្នួល ខេត្តក្រចេះ និងលោក សាំង សុខុន អាយុ ២៧ឆ្នាំ ជាអ្នកចាត់ចែងរបស់ក្រុមហ៊ុន ម៉ាស្ទ័រខេសាន់ មានទីលំនៅក្នុងភូមិកោះសំរោង ឃុំកោះសំរោង ស្រុកកំពង់សៀម ខេត្តកំពង់ចាម។
ការកោះហៅនេះធ្វើឡើងបន្ទាប់ពីទទួលបានរបាយការណ៍របស់ក្រុមការងារទប់ស្កាត់ និងបង្ក្រាបបទល្មើសធនធានធម្មជាតិ នៃគណៈកម្មការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិ កាលពីថ្ងៃទី១១ ខែកក្កដា ឆ្នាំ២០១៩កន្លងទៅនេះ។
សូមបញ្ជាក់ថាក្នុងរយៈពេលប៉ុន្មានថ្ងៃចុងក្រោយនេះ ក្រុមការងារគណៈកម្មការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិ ក្រោមការបញ្ជាផ្ទាល់របស់នាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស បាននឹងកំពុងធ្វើសកម្មភាពយ៉ាងសកម្មចុះបង្ក្រាបបទល្មើសព្រៃឈើនៅភូមិភាគឦសានប្រទេស។ ឈើរបស់ក្រុមជនល្មើសបានកាប់ជាច្រើនកន្លែងត្រូវបានក្រុមការងាររុករកឃើញ ហើយរថយន្តដែលជាមធ្យោបាយធ្វើសកម្មភាពដឹកជញ្ជូនឈើជាច្រើនគ្រឿងត្រូវបានកម្ទេចចោល។
ប្រតិបត្តិការដ៏ក្តៅគគុកនេះកាលពីថ្ងៃទី០៩ ខែកក្កដា កន្លងទៅកម្លាំងសមត្ថកិច្ចបានសម្រេចឃាត់ខ្លួនលោក ស៊ឹង សំអុល ប្រធានក្រុមហ៊ុន មេការ និងអ្នកបើករថយន្តផងដែរ។ មកដល់ពេលនេះលោក ស៉ឹង សំអុល និងអ្នកពាក់ព័ន្ធ៣នាក់ផ្សេងទៀតនោះ ត្រូវបានតុលការខេត្តមណ្ឌលគិរីសម្រេចឃុំខ្លួនហើយ ។
ទន្ទឹមនិងនោះបទបញ្ជានាយឧត្តមសេនីយ៍ សៅ សុខា ទៅកាន់កងកម្លាំងដែលត្រូវបានយកមកបង្ហោះលើបណ្តាញសង្គម ហ្វេសប៊ុក ដោយលោក អេង ហ៉ី អ្នកនាំពាក្យកងរាជអាវុធហត្ថលើផ្ទៃប្រទេសនៅថ្ងៃចន្ទ ទី១៥ ខែកក្កដា ឆ្នាំ២០១៩នេះ។ នាយឧត្តមសេនីយ៍ សៅ សុខា បានគូសបញ្ជាក់យ៉ាងដូច្នេះថា «លើកនេះជនល្មើសមិនថា អ្នកមាន អ្នកក្រ អ្នកតូច ឬអ្នកធំទេ។ ច្បាប់ចែងច្បាស់ហើយ ព្រះរាជាណាចក្រកម្ពុជា ជាប្រទេសនីតិរដ្ឋ ពលរដ្ឋស្មើភាពគ្នាចំពោះមុខច្បាប់។ ឱ្យតែរកឃើញថា ទង្វើនោះជាបទល្មើស ត្រូវបង្ក្រាបទាំងមនុស្ស មធ្យោបាយប្រព្រឹត្តបទល្មើស»។
ក្នុងបទបញ្ជានេះ នាយឧត្តមសេនីយ៍ សៅ សុខា បានក្រើនរំលឹកដល់ក្រុមការងារគណៈកម្មការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិ ត្រូវពង្រឹងវិន័យ និងអនុវត្តន៍ច្បាប់ដូចគ្នា បើរកឃើញថាផ្សំគំនិត ឬពាក់ព័ន្ធ និងបទល្មើសនោះ។
នាយឧត្តមសេនីយ៍ សៅ សុខា ក៏បានគូសរំលេចផងដែរថា ដើម្បីធ្វើឱ្យការប្រយុទ្ធប្រឆាំងការបំផ្លាញព្រៃឈើ និងធនធានធម្មជាតិមានប្រសិទ្ធភាព គឺត្រូវមានការចូលរួមពីក្រសួងពាក់ព័ន្ធជាច្រើនទៀត ដោយមិនអាចពឹងផ្អែកតែលើគណៈកម្មការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិបាននោះឡើយ។
នាយឧត្តមសេនីយ៍ សៅ សុខា បានស្នើឱ្យក្រសួងស្ថាប័ន ដែលមានសមត្ថកិច្ចសុំពង្រឹងការសម្រេចចិត្តចេញលិខិតអនុញ្ញាតច្បាប់ និងត្រួតពិនិត្យកិច្ចការដែលជាតួនាទី ភារកិច្ច ចងដោយច្បាប់ឱ្យបានរឹងរឹង។ តាមការពិនិត្យដីសម្បទានមួយចំនួនមិនអាចដាំដំណាំ កសិឧស្សាហកម្មដូចជាកៅស៊ូបានទេ ព្រោះខាងក្រោមសម្បូរណ៏ដោយថ្ម និងគ្មានប្រភពទឹកខែប្រាំងទៀងផង។
នាយឧត្តមសេនីយ៍ សៅ សុខា ក៏បានស្នើឱ្យក្រុមហ៊ុនទទួលបានសិទ្ធិ ត្រូវគោរពបទដ្ឋានបច្ចេកទេស កិច្ចសន្យា ដោយស្មោះត្រង់ ហើយពន្ធដារត្រូវតែអនុវត្តន៍ដាច់ខាត។
ប្រជាពលរដ្ឋក៏ជាកត្តាដែលនាយឧត្តមសេនីយ៍ សៅ សុខា មើលឃើញថា ជាចំណែកដ៏សំខាន់ផងដែរក្នុងការទប់ស្កាត់ការបំផ្លាញព្រៃឈើ និងធនធានធម្មជាតិ។ នាយឧត្តមសេនីយ៍ សៅ សុខា បានលើកឡើងទៀតថាថា «បងប្អូនប្រជាពលរដ្ឋជាម្ចាស់ប្រទេសសុំមេត្តាយល់ថា កាលពីជំនាន់ដូនតាយើង មិនប្រកបរបរកាប់ឈើ ហេតុអ្វីលោកអាចរស់បាន? មុខរបរមានច្រើនដែលអាចចិញ្ចឹមជីវិតបាន គួរដូរទម្លាប់បំផ្លាញខ្លួនឯង ដូចប្រសាសន៍សម្តេចតេជោថា កុំសម្លាប់មេមាន់»។
សូមបញ្ជាក់ថាក្នុងរយៈពេលប៉ុន្មានថ្ងៃចុងក្រោយនេះ ក្រុមការងារគណៈកម្មការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិ ក្រោមការបញ្ជាផ្ទាល់របស់នាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស បាននឹងកំពុងធ្វើសកម្មភាពយ៉ាងសកម្មចុះបង្ក្រាបបទល្មើសព្រៃឈើនៅភូមិភាគឦសានប្រទេស។ ឈើរបស់ក្រុមជនល្មើសបានកាប់ជាច្រើនកន្លែងត្រូវបានក្រុមការងាររុករកឃើញ ហើយរថយន្តដែលជាមធ្យោបាយធ្វើសកម្មភាពដឹកជញ្ជូនឈើជាច្រើនគ្រឿងត្រូវបានកម្ទេចចោល។នៅដើមខែកក្កដា ឆ្នាំ២០១៩នេះ គណៈកម្មការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិ ដែលដឹកនាំ និងបញ្ជាផ្ទាល់ដោយនាយឧត្តមសេនីយ៍ សៅ សុខា បានបើកប្រតិបត្តិការក្តៅក្នុងការបង្ក្រាបបទល្មើសព្រៃឈើនៅខេត្តភាគឦសានប្រទេស។ ក្នុងនោះឧកញ៉ា ស៉ឹង សំអុល មេឈ្មួញឈើល្បីឈ្មោះមួយរូបនៅកម្ពុជា រួមជាមួយបក្ខពួក៣នាក់ផ្សេងទៀត ត្រូវបានឃាត់ខ្លួន និងត្រូវបានតុលាការចោទប្រកាន់ដាក់ពន្ធនាគារផងដែរ ៕
