ខេត្ដសៀមរាបៈ ការតវ៉ាដីធ្លីដ៏យូរអង្វែងរបស់ពលរដ្ឋនៅស្រុកជីក្រែងបានធ្វើឡើងកាលពីព្រឹកថ្ងៃទី០៣ខែធ្នូឆ្នាំ២០១៤ នៅមុខសាលាដំបូងខេត្តសៀមរាប ដែលមានពលរដ្ឋចូលរួចតវ៉ាប្រមាណជាជិត១០០នាក់ ។ ប្រជាពលរដ្ឋ៨២គ្រួសារ មកពីស្រុកជីក្រែង ខេត្ដសៀមរាប បានប្រមូលផ្ដុំគ្នាខាងមុខតុលាការ ដើម្បីទាមទារឲ្យចៅក្រមសាលាដំបូងខេត្ដសៀមរាប ផ្ដល់យុត្ដិធម៌ ដោយរក្សាដីស្រែប្រាំងចំនួន៣០៥ហិកតា ជូនពលរដ្ឋ៨២គ្រួសារកាន់កាប់ឡើងវិញ ខណៈចៅក្រមហៅតំណាងពួកគេ៣នាក់ មកឲ្យបង្ហាញហេតុផល រឿងជម្លោះដីធ្លីដ៏រ៉ាំរៃកាលពីពេលកន្លងទៅ ។
ពលរដ្ឋរស់នៅភូមិល្វា ឃុំស្ពានត្នោត ស្រុកជីក្រែងមួយរូបបានឲ្យដឹងថា ដីស្រែប្រាំងពលរដ្ឋចំនួន៣០៥ហិកតា ដែលរដ្ឋាភិបាលកាត់ឆ្វៀលឲ្យពលរដ្ឋនៅឆ្នាំ២០១២ ត្រូវបានក្រុមឈ្មួញ៥នាក់នៅស្រុកប្រាសាទបាគង កាន់កាប់ និងធ្វើស្រែប្រាំងជារៀងរាល់ឆ្នាំ ដោយអាជ្ញាធរមូលដ្ឋានមិនមានដោះស្រាយជួនពួកគេឡើយ។លោកបន្ដថា ពួកគាត់ទាមទារឲ្យចៅក្រមសាលាដំបូងខេត្ដ លោក អឿង វណ្ណា ផ្ដល់យុត្ដិធម៌ ដោយប្រគល់ដីស្រែប្រាំង៣០៥ហិកតា ជូនពលរដ្ឋ៨២គ្រួសារកាន់កាប់វិញ ដើម្បីធ្វើស្រែប្រាំងនៅរដូវប្រាំងខាងមុខនេះ ព្រោះដីនោះពួកគាត់មានឯកសារបញ្ជាក់ត្រឹមត្រូវពីតំណាងរាស្ដ្រខេត្ដសៀមរាប។
ពលរដ្ឋ៨២គ្រូសារនោះ មិនអាចធ្វើស្រែប្រាំងបាន បន្ទាប់ពីចៅក្រមសាលាដំបូងខេត្ត លោក ឌុច សុខសារិន ចេញដីការរក្សាការពារឲ្យពួកគាត់នៅក្នុងអំឡុងខែកញ្ញាឆ្នាំ២០១៤កន្លងមក ដោយក្រុមអាជ្ញាធរបានគំរាមចាប់ពួកគេដាក់ពន្ធនាគារ ដោយចោទថា ខុសច្បាប់ ។ ចំណែកក្រុមឈ្មួញទាំង៥នាក់នោះវិញ អាជ្ញាធរមិនរារាំងនោះឡើយ ។ បើសិនតុលាការមិនផ្ដល់យុត្ដិធម៌នោះទេពួកគាត់ និងចូលធ្វើស្រែប្រាំង៣០៥ហិកតានោះនៅពេលខាងមុខនេះ។
ពលរដ្ឋបានធ្វើដំណើរមកកាន់តុលាការជាង៤០នាក់នៅព្រឹកថ្ងៃទី០៣ ខែធ្នូ នេះ ហើយជាងពាក់កណ្ដាលទៀត ពួកគេត្រូវបានសមត្ថកិច្ចប៉ូលីស និងកងរាជអាវុធហត្ថរារាំងនៅពាក់កណ្ដាលផ្លូវ ។
ចំណែក លោក យង់ ហ៊ាន តំណាងពលរដ្ឋមួយរូបក្នុងចំណោមបីនាក់ដែលតុលាការហៅចូលបំភ្លឺនោះ និងត្រូវជាមេភូមិល្វា ថ្លែងថា ចៅក្រមនឹងលើកទៅប្រកាសសាលក្រម នៅថ្ងៃទី១៨ខែធ្នូនេះ។
គួររំលឹកថា កាលពីដើមខែមេសា ឆ្នាំ២០១២ ដីស្រែប្រាំងពួកគាត់៣០៥ហិកតានោះ ត្រូវបានតំណាងរាស្ដ្រ ខេត្ដសៀមរាប លោក សៀង ណាំ ប្រកាសប្រគល់ ឲ្យប្រជាពលរដ្ឋ៨២គ្រួសារជាបណ្ដោះអាសន្ន បន្ទាប់ ពីប្រគល់ឲ្យរួចមក ទំនាស់ចាប់ផ្ដើមកើតឡើងជាបន្ដបន្ទាប់ ជាមួយពលរដ្ឋ៥នាក់ នៅស្រុកប្រាសាទបាគងនេះ។ ពលរដ្ឋបញ្ជាក់ថា នៅខែសីហា ឆ្នាំ២០១៤នេះ អនុប្រធានតុលាការខេត្ដ បានចេញដីការសម្រេចការពារ និងរឹបអូសពីពលរដ្ឋ៥នាក់នៅស្រុកប្រាសាទបាគង នោះដោយរក្សាទុកនៅស្ថានភាពដើមនៃអចលនវត្ថុ ។ ប៉ុន្ដែ នៅថ្ងៃទី២១ ខែតុលាឆ្នាំ២០១៤ ចៅក្រមសាលាដំបូងខេត្ដសៀមរាប លោក អឿង វណ្ណា បានចេញដីកាសម្រេចបគល់ដីឲ្យទៅពលរដ្ឋទាំង៥នាក់នោះដើម្បីបង្កបង្កើនផលវិញ យ៉ាងដូច្នេះហើយ ទើបធ្វើឲ្យពលរដ្ឋនាំគ្នាមកតវ៉ាសាជាថ្មីនៅមុខសាលាដំបូងខេត្តសៀមរាប៕
