រាជធានីភ្នំពេញ ៖ លោក ខៀវ សុភ័គ អ្នកនាំពាក្យក្រសួងមហាផ្ទៃបានថ្លែងប្រាប់សារព័ត៌មានក្នុងស្រុកកាលពីថ្មីៗនេះថា អាជ្ញាធរកម្ពុជាបានសម្រេចលុបចោលគម្រោងពន្ធនាគារទំនើប (VIP) វិញហើយ ក្រោយពេលដែលក្រសួងមហាផ្ទៃបានធ្វើការសិក្សារកពុំឃើញមានប្រទេសណាមួយ ធ្វើពន្ធនាគារទំនើបបែបនេះ សម្រាប់ឃុំខ្លួនអ្នកជាប់ឃុំ ដែលមានលទ្ធភាពបង់ប្រាក់ ខណៈពន្ធនាគារដែលវិនិយោគជាមួយក្រុមហ៊ុនឯកជននេះ បានសាងសង់ជិតរួចរាល់។
ឧត្តមសេនីយ ខៀវ សុភ័គ អ្នកនាំពាក្យក្រសួងមហាផ្ទៃបានថ្លែងថា ក្រសួងមហាផ្ទៃបានសម្រេចបោះបង់គម្រោងសាងសង់ពន្ធនាគារ វីអាយភី (VIP) ដោយតម្រូវឲ្យអ្នកទោសបង់ប្រាក់តិចបំផុតពេលជាប់ឃុំនេះចោល បន្ទាប់ពីបានធ្វើការសិក្សាពីតាមបណ្ដាប្រទេសផ្សេងៗមិនមានប្រទេសណាធ្វើពន្ធនាគារបែបនេះទេ រួមនឹងការខ្វះលទ្ធភាពធ្វើផងដែរ។
យ៉ាងណាក៏ដោយ លោក ខៀវ សុភ័គ បានបញ្ជាក់ថា គម្រោងខាងលើនេះ ត្រូវបានលុបចោលវិញហើយ ព្រោះតែប្រទេសផ្សេងៗទៀតពុំមានពន្ធនាគារបែបទំនើបនោះទេ ។ ចំណែកកម្ពុជាក៏ពុំទាន់មានលទ្ធភាពធ្វើដែរ ៕
