រាជធានីភ្នំពេញ ៖ លោក ផៃ ស៊ីផាន រដ្ឋមន្ត្រីប្រតិភូអមនាយករដ្ឋមន្ត្រី និងជាអ្នកនាំពាក្យរាជរដ្ឋាភិបាល បានថ្លែងប្រាប់សារព័ត៌មានក្នុងស្រុកដោយបញ្ជាក់ថា « នៅក្នុងកិច្ចប្រជុំពេញអង្គគណៈរដ្ឋមន្ត្រី កាលពីថ្ងៃទី១២ កក្កដា សម្តេច ហ៊ុន សែន បានបញ្ជាក់ថា ប្រសិនបើគណនីហ្វេសប៊ុកណាមួយប្រឌិត បំភ្លៃព័ត៌មាន (Fake News) ដែលធ្វើឱ្យមានការជ្រួលច្របល់មតិសាធារណៈ ជាហេតុផលធ្វើឱ្យប៉ះពាល់ដល់សន្តិសុខជាតិ ដោយប្រឌិតស្ថានភាពអាក្រក់ពីសុខភាពរបស់នាយករដ្ឋមន្ត្រី នៅក្នុងតំណែង គឺជាបទល្មើសព្រហ្មទណ្ឌ ហើយរាជរដ្ឋាភិបាល និងចាត់វិធានការយ៉ាងម៉ឹងម៉ាត់ចំពោះសកម្មភាពឧក្រិដ្ឋនេះ»។
សូមជម្រាបថា កាលពីពេលថ្មីៗនេះ មានជនទុច្ចរិតមួយចំនួននៅលើបណ្តាញសង្គម Facebook តែងតែបង្ហោះព័ត៌មានប្រឌិត និងប្រមាថមកលើអាយុជីវិតរបស់សម្តេចនាយករដ្ឋមន្ត្រីនៃកម្ពុជា។ ជាក់ស្តែង គ្រាន់តែសម្តេច ហ៊ុន សែន អញ្ជើញចេញទៅពិនិត្យសុខភាពនៅប្រទេសសិង្ហបុរី ក៏មានក្រុមជនទុច្ចរិតលើបណ្តាញសង្គមបង្ហោះព័ត៌មានបំភ្លៃការពិតជាច្រើន ពាក់ព័ន្ធសុខភាពរបស់សម្តេច ៕
