រាជធានីភ្នំពេញ ៖ កម្ពុជា មានខេត្តចំនួន៤ហើយ ដែលផ្ទុះឡើងនូវជំងឺប៉េស្តជ្រូកអាហ្វ្រិក គឺខេត្តរតនគិរី ត្បូងឃ្មុំ ស្វាយរៀង និងតាកែវ ។ ជំងឺប៉េស្តជ្រូកអាហ្វ្រិកគិតត្រឹមថ្ងៃទី៨ ខែកក្កដា បានរាលដាលនិងផ្ទុះឡើងនៅខេត្ត២គឺ ខេត្តស្វាយរៀង និងខេត្តតាកែវ ។
លោក តាន់ ផាន់ណារ៉ា ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានសុខភាពសត្វនិងផលិតកម្មសត្វ បានឲ្យដឹងថា នៅខេត្តស្វាយរៀង ជំងឺប៉េស្តជ្រូកបានផ្ទុះឡើងនៅភូមិឫស្សីជួរខាងត្បូង ឃុំក្រោលគោ ស្រុកស្វាយជ្រំ ។ ចំណែកនៅខេត្តតាកែវ ជំងឺនេះផ្ទុះឡើងនៅភូមិអំពិល ឃុំពន្លៃ ស្រុកអង្គរបុរី ។
ក្នុងការទប់ស្កាត់ការរីករាលដាលនៃជំងឺប៉េស្តជ្រូកអាហ្វ្រិកនេះ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន បានផ្ញើលិខិតទៅកាន់អភិបាលខេត្តទាំង២ខាងលើ ដើម្បីស្នើឲ្យមានការចាត់វិធានការទប់ស្កាត់ចលនាជ្រូក សាច់ជ្រូក និងផលិតផលមានដើមកំណើតពីសត្វជ្រូកពីកន្លែងផ្ទុះជំងឺ ៕
