ខេត្តកណ្តាល ៖ ហេតុការណ៍នេះបានកើតឡើងកាលពីវេលាម៉ោង ៥ និង៣០នាទីល្ងាចថ្ងៃទី០៥ ខែកក្កដា ឆ្នាំ២០១៩ នៅវត្តស្តៅស្ថិតក្នុងភូមិស្តៅ ឃុំដីឥដ្ឋ ស្រុកកៀនស្វាយ ខេត្តកណ្តាល កូនសិស្សលោកខឹងព្រះសង្ឃស្តីបន្ទោស យកចបកាប់វាយលោកឱ្យរបួស ជាច្រើនកន្លែង។ ជនរងគ្រោះជាព្រះសង្ឃព្រះនាម ឃីន ខុនណា ព្រះជន្ម ៣៤វស្សា គង់នៅទីអារាមវត្តស្តៅកន្លែង ភូមិស្តៅកន្លែង ឃុំដីឥដ្ឋ ស្រុកកៀនស្វាយ ខេត្កកណ្តាល រងរបួសលើផ្ទៃមុខខាងស្តាំ ក្រោមភ្នែកចំនួន០១កន្លែង ដៃខាងស្តាំចំនួន០៣កន្លែង (ស្រាល) ។ ចំណែកជនសង្ស័យឈ្មោះ ផល សំណាង ហៅសឹង្ហា ភេទប្រុស អាយុ២៧ឆ្នាំ ជនជាតិខ្មែរ ស្រុកកំណើតភូមិដូង ឃុំបឹងរាំង ស្រុកកំរៀង ខេត្តបាត់ដំបង បច្ចុប្បន្នជាកូនសិស្សលោកស្នាក់នៅក្នុងទីអារាមវត្តខាងលើ ។
វត្ថុតាងចាប់យក ៖ ចបកាប់ចំនួន០១ដងឈើ ផ្លែដែកមានប្រវែង១,២៥ម៉ែត្រ។ នៅមុនពេលកើតហេតុ ជនរងគ្រោះ បានប្រើជនសង្ស័យជាកូនសិស្សទៅទិញសាប៊ូម្សៅ តែជនសង្ស័យមិនទៅ ទើបជនរងគ្រោះស្តីបន្ទោសឲ្យជនសង្ស័យបន្តិចបន្តួច ស្រាប់តែជនសង្ស័យខឹងក៏យកចបកាប់វាយទៅលើជនរងគ្រោះ បណ្តាលឲ្យរងរបួស។
ក្រោយមកជនរងគ្រោះ បានមកដាក់ពាក្យបណ្តឹង នៅប៉ុស្តិ៍នគរបាលរដ្ឋបាលដីឥដ្ឋ ដោយបន្ទាប់ពីទទួលបានបណ្ដឹង កម្លាំងប៉ុស្តិ៍បានចុះដល់កន្លែងកើតហេតុ រួចឃាត់ខ្លួនជនសង្ស័យ និងវត្ថុតាង យកមកកាន់ប៉ុស្តិ៍ ដើម្បីសួរនាំ និងបញ្ចូនទៅអធិការដ្ឋាននគរបាលស្រុកកៀនស្វាយ ដើម្បីបន្តចាត់ការបន្តនិតិវិធី៕
