រាជធានីភ្នំពេញ ៖ នារសៀលថ្ងៃទី១ ខែកក្កដា ឆ្នាំ២០១៩ លោក ជិន ម៉ាលីន អ្នកនាំពាក្យក្រសួងយុត្តិធម៌ បានមានប្រសាសន៍ប្រាប់ បណ្តាញពត័មានក្នុងស្រុកមួយថា ៖ ក្រសួង បានបញ្ជូនទៅខាងអធិការកិច្ចក្រសួងយុត្តិធម៌ ដើម្បីសិក្សាលើករណីនេះ ហើយ បណ្តឹងនេះ កំពុងស្ថិតក្នុងដំណើរការនៃការសិក្សា និងអធិការកិច្ច»។
ក្រសួងយុត្តិធម៌ បានចាត់បញ្ជូនពាក្យបណ្តឹងរបស់បុរសម្នាក់ រួចជីវិតពីការចាប់ដុតទាំងស្រស់ នៅខេត្តព្រះសីហនុ ទៅមន្ត្រីអធិការកិច្ច ដែលប្តឹងសុំអន្តរាគមន៍ពីឯកឧត្តម អង្គ វង្សវឌ្ឍានា រដ្ឋមន្ត្រីក្រសួងយុត្តិធម៌ ជួយរកយុត្តិធម៌ ករណីលោកព្រះរាជអាជ្ញា សៀង សុខ មិនចោទប្រកាន់ជនល្មើស។
ក្រសួងយុត្តិធម៌បញ្ជូនបណ្តឹងឲ្យមន្ត្រីអធិការកិច្ចចាត់វិធានការនេះធ្វើឡើងតាមតាមពាក្យបណ្តឹងសុំធ្វើអធិការកិច្ចពីរដ្ឋមន្ត្រីក្រសួងយុត្តិធម៌ តាមសំណើរបុរសឈ្មោះ ស៊ុយ ប៊ុនថាន អាយុ៣៦ឆ្នាំ នៅភូមិបឹងវែង ឃុំវាលរេញ ស្រុកព្រៃនប់ ខេត្តព្រះសីហនុ ដែលបានប្តឹងលោក លី ស្រេង ពីបទប៉ុនប៉ងមនុស្សឃាត និងបំផ្លិញបំផ្លាញទ្រព្យសម្បត្តិអ្នកដទៃ ប៉ុន្តែលោក សៀង សុខ ព្រះរាជអាជ្ញាអមសាលាដំបូងខេត្តព្រះសីហនុ មិនចាត់ការចោទប្រកាន់ជនសង្ស័យ ដែលរហូតដល់ពេលនេះមានរយៈពេលជាងកន្លះឆ្នាំហើយ។
ក្នុងពាក្យបណ្តឹងបានរៀបរាប់ថា កាលពីព្រឹកថ្ងៃទី២១ ខែមករា ឆ្នាំ២០១៩ ខ្លួនបានស៊ីឈ្នួលបើកអេស្កាវ៉ាទ័រ ឈូសសម្អាតដីឲ្យឈ្មោះ ស៊ិន វិសាល ជាម្ចាស់ដី ដែលត្រូវតុលាការអនុវត្តដីកាសម្រេចប្រគល់ឲ្យ នៅចំណុចផ្លូវលេខ៨២២ ភូមិទី៥ សង្កាត់លេខ៤ ក្រុងព្រះសីហនុ ខេត្តព្រះសីហនុ ហើយពេលនោះ ឈ្មោះ លី ស្រេង និងមនុស្សមួយក្រុមទៀត បានចាក់សាំងដុត នៅចំពោះសមត្ថកិច្ចចម្រុះ មននគរបាល និងកងរាជអាវុធហត្ថខេត្តព្រះសីហនុ។
លោក ស៊ុយ ប៊ុនថាន បានបញ្ជាក់នៅក្នុងពាក្យបណ្តឹងទាំងពីរនេះថា ៖ អំពើរបស់ឈ្មោះ លី ស្រេងគឺជាបទល្មើសឧក្រិដ្ឋដ៏សាហាវ ឃោរឃៅ និងព្រៃផ្សៃបំផុត ដោយមានបំណងចង់សម្លាប់ខ្ញុំបាទ ដែលជាអ្នកស៊ីឈ្នួលបើកបរអស្កាវ៉ាទ័រ។
ពាក្យបណ្តឹងបានរៀបរាប់បន្តទៀតថា ឈ្មោះ លី ស្រេង និងបក្ខពួក នាំគ្នាគប់ដុំថ្មលើអេស្កាវ៉ាទ័រនិងយកសាំងដុតជនរងគ្រោះ រួមទាំងអេស្កាវ៉ាទ័រតែម្តង ដែលភ្លាមៗនោះ សមត្ថកិច្ចបានជួយអន្តរាគមន៍ជួយសង្គ្រោះជនរងគ្រោះ ដោយបញ្ជូនទៅមន្ទីរពេទ្យ និងឃាត់ខ្លួនឈ្មោះ លី ស្រេង និងបក្ខពួកផងដែរ។ ប៉ុន្តែក្រោយមក ក្រុមជនសង្ស័យ ដែលប្រព្រឹត្តអំពើដ៏សាហាវ ក្នុងបំណងសម្លាប់ជនរងគ្រោះទាំងរស់បែបនេះ ក៏ត្រូវបានដោះលែងឲ្យមានសេរីភាពវិញ រហូតមកដល់ពេលនេះ មិនត្រូវបានលោក សៀង សុខ ព្រះរាជអាជ្ញាអមសាលាដំបូងខេត្តព្រះសីហនុ ផ្តើមចោទប្រកាន់មកជននេះ នៅឡើយទេ។
ពាក្យបណ្តឹងបានរៀបរាប់ទៀតថា ៖ នៅថ្ងៃទី២៤ ខែមករា ឆ្នាំ២០១៩ ជនរងគ្រោះឈ្មោះ ស៊ុយ ប៊ុនថាន ក៏បានដាក់ពាក្យប្តឹងឈ្មោះ លី ស្រេង និងបក្ខពួក ចូលស្ថាប័នអយ្យការអមសាលាដំបូងខេត្តព្រះសីហនុ ប៉ុន្តែតាំងពីដាក់ពាក្យប្តឹង រហូតមកដល់ពេលនេះ លោក សៀង សុខ ដែលជាព្រះរាជអាជ្ញា ទទួលបន្ទុកចាត់ការសំណុំរឿងនេះ ហាក់មិនទាន់មានចំណាត់ការអ្វីទាំងអស់ចំពោះ ក្រុមជនល្មើស៕
