ខេត្តតាកែវ ៖នៅថ្ងៃសៅរ៍ ទី២៩ ខែមិថុនា ឆ្នាំ ២០១៩ ក្នុងពិធីសម្ពោធអគារសិក្សា សាលាបឋមសិក្សា សារិទ្ធ កក្កដា ត្រពាំងខ្នារ និងឆ្លងសមិទ្ធផលនានា ក្នុងវត្តវេឡុវ័ន្ត ស្ថិតក្នុងឃុំអង្គតាសោម ស្រុកត្រាំកក់ ខេត្តតាកែវ ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងនិងជាមេបញ្ជាការកងទ័ពជើងគោក បានថ្លែងនូវការអះអាងថា អស់រយៈពេល៤០ឆ្នាំ ប្រជាពលរដ្ឋនៅតែគាំទ្រការដឹកនាំរបស់សម្ដេច ហ៊ុន សែន ព្រោះការដឹកនាំរបស់សម្តេច គឺប្រកបដោយគុណធម៌ ធ្វើបុណ្យជាមួយប្រជាពលរដ្ឋ ធ្វើឱ្យប្រជាពលរដ្ឋមានសេចក្តីសុខ ។
លោក ហ៊ុន ម៉ាណែត ថ្លែងថា ធ្វើអ្នកដឹកនាំប្រទេសមួយត្រូវមានគុណធម៌ ហើយគុណធម៌ របស់អ្នកនាំ គឺជះឥទ្ធិពល និងថែរក្សាលទ្ធផលនៃការដឹកនាំ ហើយសម្តេច ហ៊ុន សែ ជាថ្នាក់ដឹក នាំប្រកបដោយគុណធម៌ ហើយសម្តេចបានធ្វើបុណ្យជាមួយពលរដ្ឋធ្វើឲ្យប្រជាពលរដ្ឋមាន សេចក្តីសុខ សប្បាយរីករាយដោយមិនប្រកាន់ទិន្នាការនយោបាយនោះឡើយ ហើយក៏ ផ្ទុយពី អ្នកនយោបាយមួយចំនួនដែលគ្មាន គុណធម៌ គឺដើរស្រែកជេររាជរដ្ឋាភិបាល បន្លាចប្រជាពល រដ្ឋនៅក្រៅប្រទេស ទៅអង្វរអឺរ៉ុបឲ្យ ដាក់ទណ្ឌកម្មសេដ្ឋកិច្ចមកលើខ្មែរឯងនិង មិនឱ្យបរទេស មកវិនិយោគនៅស្រុកខ្មែរដែលជានយោបាយដុតឆ្នាំងបាយប្រជាពលរដ្ឋ ។ ទន្ទឹមនោះពួក គេថែមទាំង អំពាវនាវឲ្យកម្លាំងប្រដាប់អាវុធបះបោរ បញ្ឆេះកំហឹងប្រជាពលរដ្ឋ គឺដើម្បីមហិច្ឆតា នយោបាយរបស់ខ្លួន។
លោកបញ្ជាក់ថា ការសម្រេចចិត្តរបស់ប្រជាពលរដ្ឋកន្លងមកដែលជ្រើសរើសសម្តេច ហ៊ុន សែន ជាមេដឹកនាំគឺពិតជាត្រឹមត្រូវណាស់ ហើយសូមប្រជាពលរដ្ឋបន្តជឿទុកចិត្តនិងគាំទ្រ សម្តេច ហ៊ុន សែន ដឹកនាំប្រទេស តទៅទៀតដើម្បីអភិវឌ្ឍប្រទេសឲ្យមានការរីកចម្រើន ។
អគ្គមេបញ្ជាការរងរូបនោះបានអះអាងថា ពីនេះទៅមុខទៀត រាជរដ្ឋាភិបាលនឹងខិតខំ ថែរក្សាសុខសន្តិភាព ដើម្បីឲ្យប្រជាពលរដ្ឋរស់នៅដោយមានសេចក្តីសុខ សម្បូរសប្បាយ និងអភិវឌ្ឍឱ្យរីកចម្រើន ជាបន្តបន្ទាប់ទៀត ។ លោកក៏បានថ្លែងអរគុណសប្បុរសជនជិតឆ្ងាយ ប្រជាពលរដ្ឋ អាជ្ញាធរគ្រប់ លំដាប់ថ្នាក់ ក្រុមការងារថ្នាក់ជាតិ ដែលបានចូលរួមកសាងសមិទ្ធផល តាមការអំពាវនាវ របស់រាជរដ្ឋាភិបាល។ នេះគឺជាអ្វីដែលរាជរដ្ឋាភិបាល និងគណបក្សប្រជាជន ចង់បានគឺធ្វើឲ្យ ប្រជាពលរដ្ឋមានភាពសម្បូរសប្បាយ យើងលែងច្បាំងគ្នា យើងចូលរួមកសាង សមិទ្ធផល ក្នុងប្រទេសរបស់យើង ។
លោក ហ៊ុន ម៉ាណែត បានបន្ថែមថា ទីអារាមនេះ បានចាប់ផ្តើមកកើតតាំងពីបាតដៃទទេ យើងរួមគ្នាក្រោមដំបូលផ្ទះតែមួយ ដែលដឹកនាំដោយប្រមុខរាជរដ្ឋាភិបាល និងគណបក្ស ប្រជាជនកម្ពុជា រួមគ្នា ដៃម្ខាងទប់ស្កាត់កុំឲ្យរបប ប៉ុល ពត ចូលមកម្តងទៀត ផ្តុំគ្នាដើម្បីជួយគ្នា និងបង្កបង្កើនផល ក្រោយមកយើងមានលទ្ធភាពកសាងបានសមិទ្ធផលច្រើន គ្រប់ទីកន្លែង ក្នុងស្រុក ឃុំ ភូមិ៕
ហ៊ុន ម៉ាណែត ៖ ការសម្រេចចិត្ត របស់ប្រជាពលរដ្ឋ កន្លងមកដែល ជ្រើសរើស សម្តេច ហ៊ុន សែន ជាមេដឹកនាំ គឺពិតជាត្រឹមត្រូវណាស់
Filed in: ព័ត៌មានជាតិ