ខេត្តព្រះសីហនុ ៖ នាព្រឹកថ្ងៃទី២៩ ខែមិថុនា ឆ្នាំ២០១៩នេះ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ អញ្ជើញជាអធិបតីដ៏ខ្ពង់ខ្ពស់ក្នុងពិធីប្រកាសចូលកាន់មុខតំណែងអភិបាល នៃគណៈអភិបាលខេត្តព្រះសីហនុ នៅសាលាខេត្តព្រះសីហនុ។
តាមព្រះរាជក្រឹត្យរបស់ព្រះមហាក្សត្រ ព្រះបាទនរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បានត្រាស់បង្គាប់ផ្ទេរភារកិច្ច និងដំឡើងឋានន្តរសក្តិលោក យន្ត មីន ជានាយឧត្តមសេនីយ៍ផ្កាយមាស៤ និងជារដ្ឋលេខាធិការក្រសួងការពារជាតិ បន្ទាប់ពីលោក យន្ត មីន បានស្នើសុំសម្តេចតេជោ ហ៊ុន សែន លាលែងពីតំណែងអភិបាលខេត្តព្រះសីហនុ ក្រោយពេលដែលមានឧប្បទ្ទវហេតុដួលរលំបាក់អាគារកម្ម្ពស់០៧ជាន់ កាលពីថ្ងៃទី២២ ខែមិថុនា ឆ្នាំ២០១៩ កន្លងមកនេះ និងបានត្រាស់បង្គាប់ ផ្ទេរភារកិច្ចតែងតាំង លោក គួច ចំរើន អតីតជាអភិបាលខេត្តកំពង់ចាម មកជាអភិបាលនៃគណ:អភិបាលខេត្តព្រះសីហនុវិញ។
សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានលើកឡើងអំពីបញ្ហាប្រឈមដែលខេត្តព្រះសីហនុកំពុងជួបប្រទះ នៅតំបន់ប៉ូលសេដ្ឋកិច្ចដ៏សំខាន់មួយនេះ ហើយទាមទារឲ្យដោះស្រាយជាបន្ទាន់នៅចំពោះមុខ ឯកឧត្តម គួច ចំរើន អភិបាលខេត្តព្រះសីហនុថ្មី និងថ្នាក់ដឹកនាំ មន្ត្រីរដ្ឋបាលខេត្តព្រះសីហនុជាច្រើន។
សម្តេចក្រឡាហោម ស ខេង បានបញ្ជាក់អំពីបញ្ហាប្រឈមទាំងនោះ ដែលរួមមាន ៖១-ទំនាស់ដីធ្លី ការគ្រប់គ្រងដីធ្លី
២-គុណភាពសំណង់ ៣-សន្ដិសុខនៅកោះរ៉ុង និងបណ្ដាកោះដែលចំណុះក្រុងព្រះសីហនុ ៤-ហេដ្ឋារចនាសម្ព័ន្ធផ្លូវគមនាគមន៍ ៥-រួមគ្នាដោះស្រាយបញ្ហាលូ ទឹកកខ្វក់ ទឹកភ្លៀង៕
