រាជធានីភ្នំពេញ ៖ នៅថ្ងៃទី២០ មិថុនា ឆ្នាំ២០១៩ លោកម៉ៅ ស៊ីណា ចៅក្រមសាលាដំបូងរាជធានីភ្នំពេញ បានប្រកាសសាលក្រមសម្រេចផ្ដន្ទាទោស យិន ហេង ហៅចំប៉ីខ្មៅ ឲ្យជាប់ពន្ធនាគាររយៈពេល២ឆ្នាំ តែទោសនេះត្រូវអនុវត្តត្រឹមកំណត់១ឆ្នាំប៉ុណ្ណោះ និងពិន័យជាប្រាក់ចូលថវិការដ្ឋចំនួន៣លានរៀល។
តាមសាលក្រមដែលប្រកាសនៅព្រឹកមិញ គឺជនជាប់ចោទឈ្មោះ យិន ហេង ហៅ ចំប៉ីខ្មៅ កើតនៅថ្ងៃទី២៦ ខែកុម្ភៈ ឆ្នាំ១៩៩៦ នៅភូមិអណ្តូងពោធិ៍ សង្កាត់កំពង់ប្រណាក ក្រុងព្រះវិហារ ខេត្តព្រះវិហារ ត្រូវបានតុលាការចោទប្រកាន់ពីបទញុះញង់ឲ្យមានការរើសអើង និងបទជេរប្រមាថជាសាធារណៈ តាមមាត្រា៤៩៦នៃក្រមព្រហ្មទ័ណ្ឌ។
គួររំលឹកថា ចំប៉ីខ្មៅ ត្រូវបានសមត្ថកិច្ចចាប់ខ្លួនកាលពីដើមខែកុម្ភៈ ក្រោយពីយុវជនរូបនេះបានឡាយ តាមរយៈបណ្តាញសង្គម ដោយជេរដៀលប្រមាថដល់ជាតិសាសន៍ខ្មែរ បន្ទាប់ពីខឹងនឹងយុវជនចំនួន៣នាក់ជិះម៉ូតូមកខោកក្បាលខ្លួន។
ការជេរប្រមាថជាតិសាសន៍ខ្មែររបស់ចំប៉ីខ្មៅនេះ បានធ្វើឲ្យមានការថ្កោលទោសយ៉ាងខ្លាំង រហូតដល់មានការចាប់ឃាត់ខ្លួន និងកសាងសំណុំរឿងទៅកាន់តុលាការតែម្តង។
ក្រោយការប្រកាសសាលក្រមនេះ ចំប៉ីខ្មៅ បានបញ្ជាក់ថា ខ្លួនមិនប្ដឹងចំពោះសេចក្ដីសម្រេចនេះទេ ពោលគឺទទួលយកការកាត់សេចក្ដីរបស់តុលាការត្រឹមនេះ៕
