ក្នុងស្រុក ៖ លោក លី បូរិន អ្នកនាំពាក្យក្រសួងសាធារណការ និងដឹកជញ្ជូន បានឲ្យដឹងថា ក្រសួងត្រៀមប្រើប្រាស់កញ្ចប់ថវិកាជាតិរហូតដល់ជាង២០លានដុល្លារអាមេរិក ដើម្បីបន្តកែលម្អផ្លូវដែកកម្ពុជាពីភ្នំពេញទៅកាន់ព្រំដែនកម្ពុជា-ថៃ តាមរយៈផ្លាស់ប្ដូរផ្លូវដែក ដើម្បីអាចផ្ទុកទំនិញលើសពី៦០តោនឡើងទៅក្នុងមួយទូ។
ផ្លូវដែកពីភ្នំពេញទៅកាន់ក្រុងប៉ោយប៉ែតព្រំដែនកម្ពុជា-ថៃ នឹងត្រូវធ្វើការកែលម្អបន្ថែមទៀតក្នុងពេលឆាប់ៗនេះ ដើម្បីសម្រួលដល់ការដឹកជញ្ជូនទំនិញ និងមនុស្សឲ្យបានច្រើនហើយលឿនរហ័សជាងមុនស្របតាមតម្រូវការតំបន់។
អ្នកនាំពាក្យក្រសួងសាធារណការ និងដឹកជញ្ជូនរូបនេះ បញ្ជាក់ថា គម្រោងកែលម្អ ផ្លូវដែកនេះមានផលចំណេញច្រើនខាងផ្នែកសេដ្ឋកិច្ច គឺអាចដឹកជញ្ជូនទំនិញបានច្រើនមិនផ្លាស់ប្ដូរទូរថភ្លើងនៅពេលធ្វើដំណើរឆ្លងកាត់ខ្សែខុសគ្នា ធ្វើឲ្យផលិតផលលក់នៅលើទីផ្សារកាន់តែថោក សម្រួលដល់ការចំណាយរបស់ប្រជាពលរដ្ឋ។
បើតាមការបញ្ជាក់របស់លោក លី បូរិន ថា ផែនការកែលម្អផ្លូវដែកនេះ គ្រោងលើកជាសំណើរទៅកាន់រាជរដ្ឋាភិបាលនៅក្នុងឆមាសទី២ ឆ្នាំ២០១៩នេះ បន្ទាប់ពីផ្លូវដែកពីភ្នំពេញ ទៅប៉ោយប៉ែតព្រំដែនកម្ពុជា-ថៃអាចដឹកជញ្ជូនទំនិញបាន ត្រឹមតែជាង៣០តោនហើយរត់ក្នុងល្បឿនយឺតមិនទាន់សភាពការណ៍។ បន្ថែមពីនេះទៀតផ្លូវរថភ្លើងខ្សែទី១នេះ ក៏បានបង្កការរំខានដូចជាការផ្ទេរទំនិញឬផ្លាស់ប្ដូរទូឡើងចុះខណៈដែលផ្លូវរថភ្លើងខ្សែទី២ ពីភ្នំពេញទៅខេត្តព្រះសីហនុអាចផ្ទុកបានរហូត៦០តោនក្នុងមួយទូ៕
